Al veve un alc di resistenziâl e, par une tiere dulà che resisti, resisti e resisti, al è un mantra che al dure da desenis di agns, al colpive. E cemût che al colpive. Un titul di bestseller: Brigate del fieno. Pacifist e agressîf, vert e ros. Zovins che a “ocupavin” la mont in chei dibatûts agns Setante.
Chestis a son stadis chês “brigadis”, nuie a ce viodi cun altris storiis dramatichis. E jere la societât che si ricjapave il teritori, cence storytelling, cence narazions di sorte. Seâ, netâ i prâts, fermâ il bosc. A son rivâts i zovins, e in Cjargne a àn sperimentât forsit ancje cualchi cal, oltri che, come che si diseve une volte, un lavôr coletîf che al jere lavôr pardabon. Ancje il Corriere della Sera al veve scrit di chest. In chê volte, al jere come lâ su Al Jazeera in dì di vuê. Ancje li e jere la sô impronte.
Di Leo Zanier al sarès biel discuvierzi cheste capacitât adesive tai confronts des realtâts di Cjargne. Il fen, “las cjasas sieradas” – come che al diseve -, la int e lis sôs storiis. L’albierc difondût. Une altre alçade di inzen. Un viaç jal ai scrit: “E je stade propit une alçade di inzen”. “Parcè, chês altris no?”, mi veve rispuindût. Il grup di zovins, ognidun pe sô strade vuê, che al à savût metisi dongje ator di un progjet: viodi cemût che si fâs, imparâ, ricreâ. Il turisim, cemût si fasial? E vie a San Viglio di Marebbe.
Capî ce che e je la ospitalitât. Lei, studiâ. Ben al di là dai bastons fra lis ruedis che il podê di chê volte i à regalât. Lu ai cjatât tal Setembar passât. Maranzanis. Int che e vignive, che e puartave une butilie. E saludave. Si complimentave. Leo al scoltave plui che altri. Une, dôs domandis. «Une interviste su pe Cjargne? ». «Une interviste-libri su pe Cjargne». «Tu che tu contis cheste Cjargne di vuê». Magari. «Cumò o torni a lâ in Svuizare». «Tornarâstu? ». «A Nadâl, forsit». Forsit. E je stade une scosse chê di Leo, une vitalitât lungje un venteni, al di là de sô straordenarie capacitât di usâ lis lenghis par contâ. Rivarino a cjatâ ancjetante energjie? ❚
✒ Alberto Terasso