Un avatar furlan nus fevele di «Second Life»

SECOND LIFE – CE ISAL?
«Second Life» al è un mont virtuâl tridimensional che, come che al dîs il sît uficiâl www.secondlife.com al è “imagjinât, creât e possedût” dai utents che lu frecuentin.
Di fat ogni avatar al pues comprâ un teren, modificâlu, fâ sù cjasis e inventâ robis che, a pene creadis, a son di sô proprietât e duncje a podin sei vendudis a altris utents. La monede uficiâl e je il linden, dal non de societât che e à creât SL: la americane Linden Lab. Ogni dì miars di personis si cjatin tal mont virtuâl par interagjî come se a fossin tal mont reâl savint che daûr di ogni avatar e je une persone vere. Ma ce si puedial fâ su Second Life? Al è pussibil viodi concierts, partecipâ a events, viodi mostris e comprâ robe, ma soredut cognossi int di dut il mont e divertîsi! Par jentrâ in «Second Life» al baste lâ sul sît uficiâl, regjistrâsi e discjamâ il program par scomençâ a movisi tal mont virtuâl. Un account base al baste par scomençâ e nol coste nuie; un account premium invezit al coste 72$ par an (o 9,95$ par un mês) e ti da 1000 linden iniziâi e 300 ogni setemane.
Fintremai al mês di Lui dal 2007 i utents di SL (residents) a jerin passe vot milions tal mont (250 mil in Italie) e si spindevin plui di un milion e mieç di dollars (reâi) in dì. Tai ultims mês tantis aziendis e istituzions si son creadis une emanazion virtuâl su Second Life: da la Apple a la Sony, da la IBM a Gabetti, ma ancje il stes Di Pietro e Radio 24.
Un avatar furlan nus fevele di «Second Life»
Cemût ti clamistu?
Nemesis Giger
Om o femine?
Om
E chel che ti à creât, isal om o femine?
Vino di metisi cumò a discuti dal ses dal creatôr? E che al cjali che ancje nô ae nassite no vin i gjenitâi…
Pardabon?
Sì, Second Life no ti furnìs i caratars sessuâi primaris. Se tu âs voie di vêju tu âs di comprâju. La dite Exicite che ju prodûs, di fat, e je deventade miliardarie.
O signôr, ce mont dificil… E ce lenghe fevelaiso?
Principalmentri inglês ma si pues fevelâ ce lenghe che tu âs voie. Jo o feveli inglês cussì o eviti di becâ talians…
«Second Life» isal un mont finît o in evoluzion e a son continuis scuviertis?
«Second Life» al è fat a isulis e a ‘nd è une sdrume. Ogni volte che o jentri a son gambiaments e evoluzions. La tiere li che o soi nassût facil che no esisti plui!
La tiere ise plate o taronde?
Plate!
Tra i teritoris podaressie esisti une isule furlane?
Po sigûr, nissun probleme baste meti dongje i bêçs e comprâ teritori. O aprofiti des vuestris pagjinis par un apel a ducj i avatar furlans: se mi viodeis ator metìnsi insiemit e fasìn sù un «Second Fogolâr»! Fin cumò però no ai incuintrât furlans.
Fevelant di bêçs: ce lavôr puedial fâ un, par tirâ un carantan?
Tu puedis metiti a costruî cualchi ogjet o pensâ a dâ servizis variis. Disìn che «Second Life» al è il paradîs dal terziari avanzât!
Cemût si fasial a vierzi une buteghe?
No son licencis, baste vê il puest e tu sês libar di tacâ la ativitât.
Tu âstu mai lavorât?
No, il lavôr al strache.
Ma ce furlan sêstu? E i bêçs di dulà ti rivino?
Ducj a àn une piçule dotazion in dì, dade di «Second Life», e dopo il gno creatôr un pâr di voltis par an al spint une decine di euros cul «Pay Pall». Cussì mi permet di vê «Lindon Dollars» che tu puedis spindi par divertiments o vistîts o afit di cjase, par esempli.
E âstu une cjase?
No le ai e no mi interesse, no ai il mâl dal modon (propit un furlan atipic! ndr).
Ma in tancj le àn, par ospitâ i amîs o fâ i lôr fats in privât.
Ma âstu di comprâle o tu te puedis fâ bessôl?
Tu puedis ancje fate di bessôl ma i vûl tante pazience. Jo une volte le ai fate (ti pareve, a la fin il vêr furlan al salte fûr, ndr): tu rivis a tirâ sù mûrs ma dopo al è il probleme che par fâlu tu dopris masse memorie e a ‘nd è un limit par zone, se no dopo tu âs problemis di visualizazion. Miôr comprâle che si sta di mancul. A mi no mi covente, o preferìs lâ ator.
E cemût si movêso? In machine?
Jo mi môf cul teletraspuart: baste che tu indichis la direzion e tu ti cjatis li che tu vuelis. Lis stradis no son nancje: lis machinis lis vendin, ma a coventin nome par fâ i bulos.
Come te vite reâl alore…
Come mieç di traspuart – ma soredut par fâ il bulo – e je plui plausibil la barcje, viodût che su «Second Life» il mâr al esist.
Isal cualchi puest dal mont li che no tu puedis lâ?
Jo no ju ai mai incuintrâts ma sigûr al è pussibil che un si sedi fat o comprât une zone privade li che al fâs jentrâ nome cui che al à voie lui.
Di resint o ai let su La Stampa che lis ditis americanis a tachin a bandonâ Second Life parcè che i abitants a pensin nome al ses e ai divertiments. Compliments, eh!
Che al scusi, ma al è come te vite reâl: il ses al è insom ae clasifiche, cjale i vuestris programs televisîfs – fìs di feminis semicrotis – come che al à vût scrit il Times. Ten cont che nô no vin di nudrîsi: duncje il ses tra lis dibisugnis al à ancjemò mancul concorints. Po dopo dut al è estremizât pe facilitât de facende, mi disin che te vite reâl e je dute plui complicade. Achì al baste un clic sul pont just e tu âs bielzà cumbinât. Simpri a vê comprât i gjenitâi, clâr.
A part i scherçs, «Second Life» al è un imprest di socializazion e la int e socialize come che e à voie.
A proposit di socializazion, i divertiments cuâi sono? Cine, teatri, concierts…
Cine no: no soi mai stât e no sai se al esist. Nancje teatri o concierts. Ten presint che par un fat di memorie e risoluzion a ‘nd è un limit a la int che e pues stâ intun stes puest.
Problemis di «ordin public?»
No, o ai dit memorie: il probleme di «Second Life» al è che al covente un grum di “mega” par visualizâ i personaçs in 3D. Se a son masse poligons (i personaçs a son fats di tancj piçui poligons, ndr) te stesse aree, il sisteme al va in dificoltât e si crein bugs (leteralmentri “carûi”: busis tal program che no lu fasin funzionâ ben, ndr). Al sucêt che no si visualize ben il panorame o a vegnin fûr moviments stramps. Di fat la Lindon – i governadôrs dal nestri mont – e à lançât di resint l’alarmi: se la incressite e continue cussì, la memorie dai services (stazions cjamadis di memorie colegadis jenfri di lôr, ndr) no bastarà e il sisteme al riscje il colàs. Insome, o vin ancje nô un probleme di sostegnibilitât ambientâl come voaltris.
Nuie concierts e manifestazions, cemût si divertîso alore?
Il divertiment principâl e je la musiche e la discoteche, oltri a la conversazion. Tra l’altri la discoteche e à la carataristiche che tu cognossis int – e feminis – une vore facilmentri, dut il contrari che te vuestre realtât, mi disin. L’unic che al reste mâl al è il gno creatôr: magari jo o cumbini cuntune avatar, ma dopo la sô creatore e je dal Nebraska e duncje nol pues verificâ di persone la cognossince.
I gjornâi sono?
Sì ma no àn cuissà ce sucès. I media struturâts no àn vite facile intune realtât fate par une comunicazion plui direte.
Domande finâl metafisiche. Esistie une vite dopo Second Life?
Sigûr, jo o crôt in «Third Life»: une vite future cence bugs, cui gjenitâi di serie e cence problemis di risoluzion.


Glossari
Avatar: un avatar intune realtât virtuâl come Second Life al è un personaç digjitâl che al ven manovrât di un utent reâl. In pratiche e je la rapresentazion virtuâl di une persone reâl.
Linden Dollar: e je la monede che si dopre in Second Life. 1000 linden a corispuindin plui o mancul a 4 dollars americans. Par scambiâ dollar americans in linden (e linden in dollars) al baste lâ sul sît uficiâl ta la sezion “linden dollar Exchange”. Si pues deventâ residents ancje cence bêçs e cence spindi (account base).
Isulis: a son lis zonis dulà che si pues fâ sù lis costruzions. Par deventâ parons di une isule bisugne paiâ une “tasse di proprietât”: 2.000 metris cuadrâts di isule a costin 25 dollars (6.600 linden) al mês.
Residents: un utent regjistrât in Second Life che al jentre intal mont virtuâl al ven clamât “resident”.
Business o bufulis?
La cjase creatore di «Second Life» e à declarât di vê vot milions di utents par dut il mont. A samein tancj, ma isal pardabon un grant numar? Lin a viodi lis cifris talianis: 250.000 utents. Come chei che probabilmentri a vegnaressin fûr metint insiemit i 10 blog plui innomenâts. Nome 30.000 dai utents lu doprin in maniere continue. L’aspiet positîf par SL al è che a àn un timp di permanence in dì une vore alt, ma il numar nol è cuissà ce. E se si ten cont che – come che al acene l’«avatar» te nestre interviste – a son daûr a vignî fûr i prins problemis di memorie par rivâ a calcolâ dut, la espansion dal zûc e je in pericul.
Ma la grande fortune de Linden (la societât creatore) e je che al plâs un grum a gjornaliscj e impresis. I gjornaliscj si son fats inmagâ di chest mont paralêl li che a sucedin – o al samee che a sucedin – tantis robis stranis. Po dopo a podin difondi bufulis use chê che al sarès il paradîs dai pedofii o che i mafiôs si cjatin li par cumbinâ afârs: bocje ce vuelistu!
La imprese ce interès aie? Se tu vierzis alc su «Second Life», i gjornâi ti publichin subite la notizie come curiositât. Intune aziende struturade, al è l’unic spazi dulà creâ alc di gnûf e duncje i manager zovins si butin li, fuarts dal rilêf mediatic che a varan su la stampe. Ma, une volte rivâts in chest mont virtuâl, cui negozis vueits…
Insome, starìn a viodi. Ce vitis, ce Lifes!