Pahor e Battelli, paladins di dôs minorancis

Domenie ai 14 di Avrîl dal 2024: une date che magari cussì no e restarà te storie di dôs minorancis che a vivin dongje dal Friûl. Di fat, a pocjis oris un di chel altri, a son muarts Roberto Battelli e Samo Pahor: 15 i agns di diference, ma ducj i doi a àn spindude la lôr vite a pro dai popui minorizâts. Chel sloven che al vîf dilunc dal (ex) confin par Samo Pahor, professôr di Storie tes scuelis mediis e superiôrs di lenghe slovene di Triest, mancjât a 84 agns. Preside e ancje rapresentant dal sindicât dai docents slovens, al fo elet pe Union Slovene tal Consei comunâl de citât te prime metât dai agns Novante. Pahor al à simpri scombatût a pro de tutele dai dirits de sô minorance, tant di podê jessi tignût un vêr esempli di lote politiche e sociâl. Un pas impuartant pe bataie di Pahor al è stât tal 1992, cuant che la Cort costituzionâl di Rome e declarà la necessitât che ancje la Aministrazion Publiche, te suaze di une tutele complete des lenghis di minorance, e vedi di permeti di doprâ chestis lenghis, vint il dirit di ricevi rispueste dal personâl dai uficis te stesse lenghe. Un dai siei siums, ancje midiant de associazion ‘Edinost’ (‘Unitât’) metude in pîts di lui, al jere il bilinguisim totâl a Triest. Pe sô ativitât indurante, tal Dicembar dal an passât al à vût un ricognossiment speciâl di bande de presidente de Republiche slovene Nataša Pirc Musar.
◆ Te stesse zornade, come dit, corot ancje pe minorance taliane (istrovenite) in Slovenie e in Cravuazie. Roberto Battelli, rapresentant elet in maniere continuade tal seç garantît ae minorance te Cjamare di Stât di Lubiane dal 1990 al 2018, al è mancjât a 69 agns. Une vite pardabon spindude par puartâ indevant la tutele de minorance taliane che e vîf in Istrie, Flum/Rijeka, Cuarnâr e Dalmazie. Di zovin gjornalist a Tv Capodistria e redatôr dal cuotidian di Flum ‘La Voce del Popolo’, al à tacât a stâ daûr ae Comunitât taliane, unide sot de Jugoslavie ma po dividude tra Slovenie e Cravuazie. Battelli al à vût une part impuartantone tal definî la situazion di ca e di là dal confin dopo dal sfantâsi dal Stât unitari: l’obietîf principâl al jere chel di fâ in mût che i membris de minorance a vessin i stes dirits si ben che si cjatassin in doi Paîs diviers, ognidun cu lis sôs leçs. Battelli al à judât a meti a puest no dome l’aspiet juridic, ma ancje chel scolastic e economic (cui finanziaments anuâi garantîts des dôs Republichis).
◆ Samo Pahor e Roberto Battelli: dôs figuris che a lassin un grant vueit. ❚