La 27e edizion dai incuintris “In File”, che a son stâts fats come simpri te vecje stale dai Colonos, a àn un tai speciâl: di fat a son une edizion di “ripartence” dopo che l’an passât la Associazion che ju inmanee di agnorums, adun cu la rassegne estive “Avostanis” (rivade a 40 agns di vite), si jere cjolte une anade di polse par fastidis organizatîfs che cumò a somein dome un brut ricuart. La clape culturâl vuidade di Federico Rossi e à studiât, cu la consulence di Agnul Floramo, un program une vore stuzighin sul teme dal “Magisterium”, ven a stâi dai personaçs che a àn marcât “Olmis, siums e utopiis di oms e feminis bogns di lassâ il segn”.
◆ Il prin incuintri (ai 26 di Zenâr) al à puartât un confront su la crisi dal pinsîr e su la banalizazion di un timp dulà che no esistin plui mestris ni dissepui. Bruno Forte, za diretôr dal Ufici Scolastic regjonâl e Walter Tomada, diretôr da “La Patrie dal Friûl” a àn fevelât te conference “Di Socrate a Musk (passant pal Friûl)” esemplis e peraulis a puedin fâ “miracui o pericui”: e dispès si visisi masse tart se i mestris a son bogns o triscj. Par sigûr al jere un bon “Mestri di mont” Tito Maniacco: e Martina Delpiccolo e Fabiano Fantini a àn rievocade (ai 2 di Fevrâr) la sô opare cul stes titul intun “live-book” che al met in sene la sô ativitât eroiche e umane tal stes moment, inte spierdude Muiesse.
◆ Se Maniacco al è stât un model di om, Cora Slocomb (1862-1944) e je stade un fâr pe emancipazion feminine: pacifiste, leterade, cultore dal artesanât e de art, e jere rivade a trasmeti imprescj di sfrancjament sociâl e di gjenar. Agnul Floramo e Marisa Sestito a disvelaran ai 9 di Fevrâr la gure e il contest, cul jutori dal doi Canti Erranti (Patrizia Bertoncello e Nilla Patrizio).
◆ Di grant interès al sarà l’incuintri dai 23 di Fevrâr “Friûl, scune e laboratori pai mestris di doman. Storiis di zovins talents furlans” cu la partecipazion di fantats che a stan deventant ponts di riferiment de poesie (Gianluca Ceccato, Premi Pilutti 2021), de musiche (Nicole Coceancig, Premi Ciampi 2024, e Alvise Nodale, Premi Daolio 2024), de art (Davide Degano, Premi “Giovane fotografia italiana 2023”) e intal dirit (Giulia Sassara, Premi Pierluigi Di Piazza 2024).
◆ Il grant finâl al sarà ai 2 di Març cuntune conference speciâl di Francesco Messina suntun visionari come pôcs, Georges Ivanovič Gurdjie, che al veve disvilupât un sisteme par podê incuintrâ chê spiritualitât che l’Orient al veve conservât miôr, vivint tal stes timp dal dut dentri inte straordenarie evoluzion sientifiche ocidentâl. In Italie, i siei libris a jerin stâts tal imprin publicâts di Adelphi e di Ottava, la cjase editore metude sù di Franco Battiato cun Henry Thomasson e propit cun Francesco Messina.
◆ La rassegne e ven inmaneade cu la poie de ARLeF e de Regjon, cul sostegn impuartant des Distileriis Nonino e cu la colaborazion di Glesie Furlane e de Clape Culturâl Patrie dal Friûl, societât editore di chest gjornâl. ❚
Cun 224 produzions assistudis e 76 finanziadis tal trieni, il cine e l’audiovisîf si confermin un motôr strategjic pe economie regjonâl, gjenerant un indot totâl di cuasi 75 milions di euros e confermant il Friûl-Vignesie Julie tant che destinazion di atrat pes produzions no dome locâls, ma ancje a nivel talian e internazionâl (tal trieni di riferiment a son stadis adiriture sîs chês che a àn sielzût la nestre regjon) graciis ae eficience dai servizis ufierts, ae preparazion alte dai tecnics e des maestrancis, ae bielece dai siei paisaçs e ae lôr varietât intun spazi contignût dal pont di viste gjeografic. ❚