La «declarazion finâl» e rive a un an di distance dal so disarmament complet
«O cjapìn sù cheste ultime decision cun chê di judâ l’inviâsi di une fase storiche gnove. ETA e jere saltade fûr di chest popul e cumò si sfante in chest popul». A son lis peraulis che a sierin la «declarazion finâl» che e je stade dade fûr di ETA (Euskadi Ta Askatasuna, Patrie Basche e Libertât), la storiche organizazion armade indipendentiste, ai 3 di Mai stâts.
Il document, indreçât al popul basc, al conferme in maniere definitive e «uficiâl», ce che al jere stât anticipât di une comunicazion cence precedents za vie pal mês di Avrîl: passe sîs agns dopo de fin de sô ativitât armade e a un an di distance dal so disarmament complet, cu la consegne dai siei arsenâi che a jerin ancjemò ator pal Paîs Basc dal nord, fate aes autoritâts de polizie francese cul control de bande di une comission internazionâl di verifiche, ETA e siere il percors cu la sô dissoluzion totâl. Cheste decision, che e je la «consecuence logjiche» di chei altris passaçs che a son stâts fats, e je stade cjapade sù cul intindiment che «il procès a pro de libertât e de pâs al ledi dilunc daûr di une altre strade».
La «declarazion finâl» e je stade compagnade di un video là che doi militants storics, Josu Urrutikoetxea e Marixol Iparragirre, a dan leture par basc e par spagnûl dal test. Sessante agns dopo de sô creazion, la organizazion rivoluzionarie socialiste pe liberazion nazionâl metude adun di un trop di zovins militants nazionaliscj bascs, tal plen de ditature franchiste, si disfe in maniere complete e definitive cun dutis lis sôs struturis organizativis.
Il document al marche che la decision di considerâ tant che finîts sedi «il cicli storic di ETA» che «la sô funzion storiche» e duncje «la sô ativitât politiche» e je stade fate buine de bande dai siei militants e che par chel «nol sarà plui nissun di lôr che al palesarà posizions politichis, al fasarà indenant iniziativis e al coinvolzarà altris sogjets» in non di ETA, ancje se i stes militants «a laran dilunc a scombati a pro di un Paîs basc riunificât, socialist, di lenghe basche e no patriarcjâl in ducj i ambits che ju calcolaran chei plui juscj, cu la responsabilitât e cu la onestât di simpri». Cun di plui, la declarazion e vualme tant che disfide principâl chê di «fâ sù, tant che popul, un procès che si fondi sul meti adun lis fuarcis, su la mobilitazion popolâr e su la colaborazion tra sogjets diferents». La intenzion e je chê di cjatâ une soluzion politiche pal conflit che par tancj agns al à segnât i rapuarts tra la societât basche e i stâts spagnûl e francês.
La «declarazion finâl» e à fat scjas, tal Ream di Spagne, te Republiche di France e un pôc dapardut, in Europe e pal mont. E veve za vût un ciert impat la comunicazion che e visave che e sarès stade proclamade la dissoluzion di ETA e là che si domandave perdon pes vitimis de lote armade judicadis «inocentis». Za in chê volte, la plui part dai partîts e des istituzions baschis a vevin ricognossût une sielte definitive di chê fate tant che un pas impuartant a pro dal superament dal conflit. Cundut achel, almancul pal Partît nazionalist basc, Elkarrekin-Podemos, Geroa Bai, Izquierda-Ezkerra e il Partît socialist, ETA e varès vût di domandâ perdon par «dutis lis vitimis».
Compagn che l’an passât, in ocasion dal disarmament complet, il guvier di Parîs al à mostrât atenzion e preseament viers dai ultins pas fats di ETA e al à mandât un messaç di viertidure cui prins trasferiments dai militants che a son in preson in centris detentîfs plui dongje dal Paîs Basc. A Madrid, impen, la ande e je diferente: de Moncloa a àn fat savê che la assunzion di responsabilitât e la dissoluzion de organizazion no puartaran a nissun cambi, nancje tes politichis metudis in at cuintri dai passe 250 presonîrs bascs.
di Marco Stolfo
