Ma chei che a àn fat il prin pas a son ancjemò pôcs
e incentivâ chei altris a lâur daûr al è compit de politiche
Par corezi une economie in crisi al covente sielzût ce direzion cjapâ: e par judâ lis impresis che no corin, si à di indreçâlis suntun troi gnûf di svilup. Ma cuâl? In spiete di misuris di bande dai guviers talian e regjonâl, che par cumò no mostrin di vê soluzions cetant origjinâls, la uniche vôs e je la vision dai industriâi che a pontin drets ae “industrie 4.0”, une tindince a sburtâ simpri di plui viers de automazion e des gnovis tecnologjiis par miorâ lis cundizions di vore, creâ gnûfs modei di business e fâ cressi la produtivitât. Sino pronts? Cemût cambiial il sisteme economic furlan? Ce dinamichis si puedino notâ inte evoluzion de nestre struture produtive? Lis riflessions su chest teme no son cuissà cetantis, e alore al è just resonâ.
Il panorame produtîf furlan al à vude une trasformazion di fonde tai ultins 30 agns: la globalizazion e à fat integrâ i cumierçs a nivel planetari, ma e à disintegrât il senari de produzion slargjantlu a Paîs che a ufrissin un cost dal lavôr cetant plui bas. Se a chest si zonte la recession internazionâl, la pression su la nestre economie e je pardabon penze e i numars de manifature a son clârs: la pierdite secje in dîs agns e je dal 20% des aziendis, e il numar dai impleâts al è calât dal 15%. Ise cualchi pussibilitât di tornâ ai nivei di ocupazion di prin? Bisugne cirî rispuestis gnovis.
A son diviersis problematichis di considerâ. Prin di dut bisugne cjalâ i dâts su la natalitât aziendâl, intun contest come il nestri dulà che lis impresis a son simpri stadis piçulis e mediis pluitost che grandis. Isal di stiçâ la nassite di gnovis impresis o, come che al dîs cualchidun, covential tignî in pîts dome chês che a son buinis di stâ sul marcjât di bessolis, magari sburtantlis a agregâsi? La nassite par gjerminazion o spin off di impresis za sul marcjât e je lade calant, e lis realtâts che a mostrin une tindince propulsive a son dome lis Kibs (Knowledge intensive business services), ven a stâi lis impresis di servizis a contignût alt di cognossince, che a regalin “valôr zontât” ae economie di chenti. Chescj sogjets a cressin soredut tal cjamp informatic, inzegniristic e statistic, il dopli rispiet aes manifaturis classichis: e plui di lôr a dan lavôr a cetancj zovins laureâts e feminis. Par chest, une Regjon che e vûl cjapâ la strade dal avignî no pues no scometi su realtâts dal gjenar.
Tant par dâ une idee di ce che o stin fevelant, intal 2014 a jerin 56 i spin off universitaris (il 4,9% dal totâl talian, cuntune densitât dal 0,6 ogni miâr di impresis) e 59 lis start up inovativis, che a rapresentavin il 3,4% dal totâl talian e il 5,5 par mil di densitât rispiet al totâl des aziendis. Intal 2017, a distance di trê agns, lis start up inovativis in Friûl-Vignesie Julie a son deventadis 200, 71 in provincie di Udin. La nestre regjon e je la tierce in Italie par incidence sul totâl des societâts di capitâls ativis, cuntun rapuart dal 9,9 par mil, ancje se e je dome la seste in fat di finanziaments: dal Font di Garanzie di Mediocredito Centrâl a rivin di fat plui di 30 milions di euros par judâlis, ma la sensazion e je che si podarès cressi ancjemò. Vê triplicât il numar di start up in trê agns e soredut vê cuasi dopleade la lôr densitât al è un biel risultât, ancje se o sin ancjemò sot dal 1%. E i nivei di zonis tant che la Baviere, il Baden Wurttemberg, Lausanne o Zurich, dulà che si rive al 5%, a son pardabon ancjemò lontans.
Viertis lis aziendis, dut câs, cemût si rivial a fâlis cressi? I procès di slargjament o di acuisizion di altris grups a son cressûts intai ultins agns e za cumò un cuart des societâts di capitâl inte nestre regjon al aparten a altris societâts o ur è colegât. Ma lis formis plui modernis di agregazion a son par sigûr chês des rêts di impresis. La condivision di informazions e di cognossincis par miorâ i procès produtîfs o par disvilupâ insiemi inovazions tai prodots, te organizazion e tal marketing: adun a rivin a fâ invistiments che di bessolis no podaressin, e a rivin a frontâ marcjâts dulà che di bessolis no rivaressin o a comprâ materiis primis a presits plui bogns. Tal 2014 in dute Italie a esistevin 1770 contrats di rêt jenfri plui di 9 mil impresis, e in Friûl-Vignesie Julie a ‘ndi jerin dome 60 che a metevin dongje 191 impresis. In trê agns, secont i dâts di Infocamere e de Universitât Ca’ Foscari di Vignesie, la Italie e à triplicât il numar di contrats di rêt (che a jerin 5 mil tal 2017) e des aziendis che si son zontadis, che a son deventadis 30 mil e 700.
La sorprese e je che il Friûl-Vignesie Julie al è lât sù al prin puest in cheste classifiche a nivel talian pal tas di agregazion che al à savût dimostrâ. O sin ancjemò a numars minims, ma la comprension dai vantaçs che un imprest di cheste fate al pues dâ e je za plui alte chenti a pet di altris regjons talianis: i nestris imprenditôrs a somein i plui puartâts a colaborâ, stant che la densitât des impresis in rêt e je dal 13,5 ogni 1000, e il dât al è par sigûr ancjemò miorabil.
I spazis di miorament a derivin ancje dai setôrs dulà che chestis associazions di impresis si crein: de trasformazion digjitâl 4.0 ae internazionalizazion, dal marketing teritoriâl ae economie circolâr. Gnovis formis di imprese par gnûfs setôrs economics: si disarès che i zovins imprenditôrs a vedin scuviert, par passion o par “sante scugne”, che – come che si dîs sui social network – “sharing is sexy” e che a zontâ lis fuarcis par un fin comun no si piert, ma si vuadagne. Dut chest al contraste cul mît dal furlan “salt, onest, lavoradôr”, ma vitime di un individualisim che al è sintetizât dal sproc “fasìn di bessôi”: slogan che al è coventât dispès te storie dai furlans a fâju restâ in pîts, ma che cjapât ae letare al rapresente une cjastradure autolimitante.
Lis gnovis gjenerazions, sedi par condividi i coscj di gjestions di sedis (interessant al è il fenomen dal coworking) e servizis, sedi par vê rêts di promozion plui largjis, a somein jessi ladis di là des barieris dal “fasìn di bessôi” e dal “piçul al è biel”: ma chei che a àn fat il prin pas a son ancjemò pôcs e incentivâ chei altris a lâur daûr al è compit de politiche. Nus àn simpri tontonât che “pal avignî di une piçule regjon al covente fat sisteme”: cumò che e je une cove di zovins che e somee daûr a percori chest troi, la politiche e varès di passâ des cjacaris ai fats. Anzit, ai bêçs e a dutis lis formis di incentîf che si puedin dâ ae nestre economie par fâ cressi la fiducie, par stimolâ la imprenditorie e par tirâ dongje capitâi. E sarès dome ore che il Friûl-Vignesie Julie al deventàs la prime isule regjonâl “a burocrazie zero” e al concentràs dutis lis risorsis pussibilis a pro des rêts di imprese che a metin adun coscj e servizis, liberant invistiments par dâ gnove ocupazion, o a pro di dutis chês altris formis di agregazion tant che consorzis o joint venture societaris. La economie furlane e sta za cambiant piel, parcè che e à capît di bessole in ce direzion che e à di lâ. La classe dirigjente e varès dome di vierzi i voi e di judâ cheste trasformazion, la uniche che e pues dânus un avignî. E alore, no stin a vê pôre di vê coragjo! ❚
Walter Tomada
