Bandonâ la agriculture al è bandonâ la nestre culture
– Al è un virus tes lidrîs – dissal chel di là dal banc de agrarie cun fâ di savint a un omenut, di ca dal banc, che i veve puartât un ramaçut di sespâr malât.
La malatie, jo le cognòs ben, e jere un normâl câs di monilie intune Vierte di ploie. La monilie e je un fonc, une mufe, che e cjape lis menadis frescjis e lis flôrs di sespârs, cjariesârs e armelinârs. E chel di là dal banc al poie sul banc, cun rumôr a efiet, un bussul di chilo di benomyl. Il benomyl al cope i foncs, ma no i virus. Nissune chimiche no rive adore di copâ i virus.
– Ve ca – dissal chel di là dal banc fevelant di tecnic espert – tu sgarfis la tiere ator ator dal arbul e tu spandis chest polvar, cussì tu copis il virus tes lidrîs –.
◆ Come dî: tu vâs dal miedi parcè che ti clope un zenoli, il miedi ti diagnostiche un mâl di cûr che no tu âs, e par vuarîti il mâl di cûr, ti dîs di lavâti i pîts cul arsenic.
Di sigûr, chel omenut cu la frascje plene di monilie al à copât ducj i lumbrins dal so bearç. E il benomyl, ancje par dut il rest, nol è miôr dal arsenic.
◆ Chest, cualchi an indaûr. L’an passât intune altre agrarie o jeri li a fevelâ cul diretôr, une fevelade lungje, e par dut il timp, un timp lunc che o disevi, doi zovins, anzit doi nuviçs, a àn fevelât cul tecnic de agrarie. Dai fîs? De politiche? Dai fasûi cul bau? De cartufularie plene di mariutis? Dai cunins? Dai poleçs? No, dal pradessit fûr di cjase, chel prât che lôr a clamavin “inglês”.
Bizantinisims, strolegheçs, preocupazions, conseis, pôris, une asse di chês cui lumbrins, e se al ven il muscli, e se la tiere e devente masse dure (garantît al limon che e devente come peton) e la jerbe no tire flât… Insome, par fâle curte, i doi nuviçs a son saltâts fûr de agrarie cun doi sacs, di chel pôc grancj, di velens.
◆ Doi esemplis paradigmatics de nestre agriculture. Un arbul e un pradessit provait a moltiplicâju pai miârs e miârs di cjamps, o di etars, di blave, di soie, di pomârs e di vîts e viodêt trops velens che si butin.
– Ma un cont a son chei che a fasin par hobby, un cont a son i professioniscj – mi disarà cualchidun. Sì, che a son doi conts diferents, ma la logjiche e je simpri chê, compagne spudade. Vendi. Cuant che si vent no si bacile daûr di nuie che nol sedi vendi. Se jo o fos daûr dal banc di une agrarie, o un rapresentant di velens, vadì che o fasarès ancje piês. Par chel che, pûr jessint in zoventût un che si intindeve di fitopatologjie, o ai sielt di no lâ a vendi prodots pe agriculture. Podês nome crodi, po, se une multinazionâl dai velens e à di chestis preocupazions. Vendi.
A murin i lumbrins (a son sot tiere e nissun i fâs câs), a murin lis âfs (i apicultôrs si invelegnin, ma nome lôr), i cristians (ma ancje i musulmans, i budiscj e i animiscj) si inmalin ma nol è “sientifichementri provât” (no evidence), fruts a nassin cence voi (benomyl) ma si pues simpri fâur un fregul di caritât.
◆ Intant che i gjornâi a scrivin de ultime pidade di un balonîr, e la radio e fevele saldo de ultime pidade di un balonîr (vadì che il balon al conte pal PIL plui de agriculture), la propagande e sune simpri chel tambûr: bisugne produsi. Bisugne produsi parcè che tal mont tante int e à fam. Cuant che tai agns Setante la agriculture furlane e à fat il marideç cu la monoculture de blave, i furlans a disevin che “bisugne produsi parcè che tal mont e je ancjemò tante fam”.
◆ L’efiet al è stât juste il contrari. Se tal puart di un stât african e rive une nâf plene di blavis americanis o europeis, fatis in gracie di tratorons, ureis, nitrâts, 8-24-20, atrazinis e diserbants di ogni fate, stait sigûrs che e cope la agriculture dal puest, dulà che lis blavis si fasin cu la sape e cul sudôr. Lis nestris blavis a rivin fin là ancje parcè che l’ent public (stât o Union europeane) ur da un premi a chei che a espuartin. Il risultât al è che il contadin nostran al vuadagne pôc, rive e no rive a stâ dentri, e il contadin african al va te bidonville dulà che, se al à une palanche, al compre la salse di pomodoro cinese (metìn che e vedi dentri ancje alc di pomodoro) cul non talian, e magari ancje la bandierute taliane sul bossul.
– Bon, pare dongje – mi sint a dî – che lis robis lungjis a deventin madracs –.
◆ Jo o dîs che in Friûl o vin di bisugne di une altre agriculture. Sì, lu sai mo che ancje in Ocitanie e in Alabama a varessin bisugne di une altre agriculture, ma jo o soi a stâ in Friûl e no in Ocitanie o in Alabama e o feveli dal Friûl.
◆ O varessin dibisugne di une agriculture che e fasi ce che e à simpri fat di cuant che e je nassude un dîs mil agns indaûr: produsi aliments. Par cui? Prime di dut pai umans, vignarès a stâi pai furlans (va ben, ancje pai triestins, che sul Scjars no si godole). E po pai animâi, i animâi furlans, no chei de Lombardie o de Baviere o di sepi Diu dulà. Cussì al è dut sot control. La regjon e je piçule e la int e mormore.
Fasìn un esempli cui liùms (la cjar si mangjile di domenie e vonde). La soie e je un liùm, un fasuli, dome che, a part une piçule percentuâl (tofu e altris robis lamiis), e va dute ai animâi.
◆ In Friûl o vin passe 50.000 etars di soie, i stes etars che une volte si coltivave a fasûi, cuant che une famee a ’nt consumave ancje un cuintâl ad an. E in Friûl si metevin ancje fasulins, cesarons, favis, lints, piçûi, lintosis e luvins (manaruele se e jere slisse). Insome, dut ce che al covente pes proteinis e par fâ la rotazion dai terens come cu va e come che ogni agriculture e varès di fâ.
◆ Cumò di chescj liùms (fasûi e vuaìnis, cesarons, piçûi e favis) o vin une otantine di etars… cuintri i passe 50.000 di soie!
◆ Jo o dîs che chi no sin in Californie che e à un PIL grant come chel de France (e che sal tegni), no sin tal Wisconsin, no nus interesse ce che al cuote il Chicago Board of Trade su la soie e su la blave. O sin une piçule regjon, si cognossìn ducj, si pues cambiâ, i bêçs de Union europeane a son: ancje là sù, tal grisum di Bruxelles, si fevele di “Farm to Fork” (dal cjamp al piron) e Ursula von der Leyen, une siorute che no mi displâs, come prime robe e à fevelât di un “Green Deal”.
Plui di cussì ce volìno?
◆ Bisugne che cualchidun si nici a fâ rivâ chescj bêçs tal mût just e ai agricultôrs juscj. I furlans no san scuedi, chest al è un fat. A san, almancul a disin lôr, “fâ di bessôi”. Po ben, fasìn di bessôi, ma fasìn alc, çugnìnsi, distrighìn, spesseìn. Se no, fantats, si larà indevant cun velens, cun patatinis cric croc, cun merendinis cence vitaminis e cun ducj i mâi de vecjaie. O sin un popul di viei, anzit di vecjos, cence vosarili di fruts tai nestris paîs. Si pues ancje sierâle chi, deventant par simpri furlanvenezianjulians o, par fâle curte, talians. Al volarà dî che o vin pardabon un virus tes lidrîs, e alore metìnsi in çavatis a cjalâ la television taliane, crustulant patatinis cric croc. Mandi Friûl. ❚
