La zovine origjinarie de Pulie e lavore
cu lis clapis di turiscj che a vegnin a cori
in biciclete in regjon. Un patrimoni di no crodi
Di cualchi an incà, ducj chei che a zirin pes stradis dal Friûl si son inacuarts di trope int che si cjate, massime intal fin setemane, sù e ju, dal mâr ae mont, in biciclete. Turiscj, apassionâts, amadôrs, fameis. Une selve di coridôrs che a rivin di dute la Italie e, just dîlu, di dut il mont, par gjoldi de bielece e de trancuilitât dal teritori furlan. E no dome: une corse, un panorame, un frico, un tai di vin, persut, formadi, pâs. La gnove frontiere dal turisim e je la biciclete.
◆ Un fenomen che al cjape dentri no dome la art di sburtâ indenant une biciclete, par passion. Si pues fevelâ propit di une ativitât che e vûl dî tignîsi in sest. Dut par scjampâ fûr de confusion des citâts, de tension dal lavôr, par stâ cui amîs o cui familiârs intun ambient indulà che si rive a preseâ lis piçulis robis in serenitât. E fâlu intun teritori che al stimât une vore verglemât e cun stradis cuasi pardut cence trafic, che a ufrissin cetant divertiment, e je la mode plui preseade dal moment. Almancul pai forescj che a rivin inte Patrie dal Friûl par pedalâ.
◆ Tal mieç di chest mont, une zovine che e ven sù de Pulie e à vude la idee di vignî a stâ in Friûl par lavorâ propit cul mont des bicicletis e cu la idee di dâ il miôr valôr pussibil al teritori furlan. Si clame Paola Bergamo e e à metût sù une ativitât a Maran, dongje dal mâr. Dut câs, e cor sù e jù par dut, di Lignan a Tarvis, lant in bande dai turiscj che a rivin di dapardut. Une ativitât che si clame “Sognando in Bici”: un non che al conte bielzà dut.
◆ “La spiegazion e je semplice – e dîs Paola Bergamo, che un tic di furlan lu capìs -: o vin voie di fâ insumiâ lis personis che a vegnin in Friûl in biciclete. O lavorìn par dâ a ducj i cicliscj servizis di dutis lis fatis. De assistence inte corse, ae prenotazion dai albiercs e dai puescj indulà lâ a mangjâ e a bevi, aes indicazions des stradis plui preseadis par gjoldisi une o plui zornadis in biciclete intal miôr maniere pussibile. I turiscj a son diviers: al è l’amadôr che al cor dîs mil chilometris ad an, a son i cussì clamâts cicloturiscj e chei che a presein il “turisim lent”. Si scuen apaiâ ducj, di bot ancje cul nauli des bicicletis, se al covente, e fintremai furnint il biroç pai frututs e pai cjans. E, clâr, in Friûl o ai cjatât un mont che mi à dade cheste pussibilitât”.
_
No dome biciclete pe strade. La mode dal moment al è il “gravel”, ise vere?
“Intai ultins timps, massime il gravel e la biciclete eletriche a àn vude une esplosion di no crodi. Sentâts su la siele di une biciclete, dut ce che al è ator al cjape une identitât divierse. Il mont al cambie in miôr: si cjate serenitât e conession cul teritori. Si rive a viodi cetant ben la nature e il paisaç. Si respire lontan de confusion e dal trafic. E il biel al è spartî chestis sensazions cun altre int, cu la famee e cui amîs. Cognossi il teritori, la culture, i puescj, lis tradizions e cualchi cjanton di mont che no si rivarès a viodi in altris situazions. In graciis de biciclete tu rivis indulà che, cu la machine e ancje a pît, no si rive. La biciclete eletriche e je un jutori ancje par chei che no son cetant usâts a pedalâ. E il gravel, che al è une vie di mieç jenfri l’asfalt e il classic “off road”, mountain bike o ciclocross che al sedi, al dâ la pussibilitât di cori in percors pardabon lontans di dut il trafic, inte nature”.
_
De Pulie al Friûl: parcè?
“In prin, la bielece dal teritori. Jo o soi nassude tal Salent e mi soi inamorade de diversitât di teritoris che si cjatin in Friûl. Cuntun viaç di une ore e mieze si rive a lâ de mont plui alte al mâr, di Triest al Plan dal Cjaval. O cor in biciclete dibot di disesiet agns e, vignint achì, o ai discuviert une regjon che mi è subit jentrade intal cûr. O ai vude la fortune di viodi, vivi, pedalâ par dut il Friûl, ancjemò cuant che nol jere il fenomen dal turisim in biciclete. E o ai capît ae svelte lis potenzialitâts di ce che si cjate achì. Intal 2020 o ai decidût di provâ a dâ ancje aes altris personis lis emozions che o ai vudis jo, di cognossi lis maraveis che al à il Friûl e o ai tacât cun ‘Sognando in Bici’. O soi une vore braurose di ce che o fâs”.
_
Fevelant di struturis, cuale ise la situazion e indulà si podaressial fâ miôr?
“Scomencìn des struturis ricetivis. Jo o lavori massime a Maran e la situazion no je cuissà ce, intal sens che il fenomen dal turisim in biciclete al è daûr a pandisi juste cumò e i paîs a àn bisugne di capî la situazion e sestâsi un tic plui ae svelte, par sfrutâ il vantaç. Al sarès ben che ancje i privâts che a àn puest, cjamaris, struturis sieradis, a capissin lis pussibilitâts di davuelzi une ativitât di supuart. I numars di turiscj in biciclete al è simpri plui grant e il futûr al podarès jessî une cucagne. I vûl sburtât ducj inte te stesse direzion, parcè che il teritori furlan al rint une vore. Forsit tancj furlans no si rindin cont de bielece che a àn ator. Deventâ une regjon “bike friendly”, come che si dîs a nivel internazionâl, i darà al Friûl une suste cetant impuartante intai prossims agns”.
_
Stradis e percors pes bicicletis: cemût sino?
“Inte Basse furlane al è stât fat un lavôr preseât e impuartant. Un risultât che si viôt propit intal numar di cicliscj che a corin su lis stradis di asfalt e pai cjamps. Si pues dî il stes pes stradis che a puartin a Tarvis. La piste ciclabil “Alpe Adria” e fâs cori ogni setemane pardabon miârs di turiscj in biciclete, che a vegnin jù dal Nord de Europe. Di chel percors a partissin tantis stradis indulà che un al pues cori in sigurece, fra lis monts. Borcs e aziendis sù par là a cjatin un vantaç di no crodi di chest ambient. Si scuen fâ une vore miôr di là da la Aghe, intal teritori di Pordenon, e in Cjargne, parcè che no son ancjemò colegaments bogns. Al mancje une vore pôc par rivâ a vê le situazion juste par vê une regjon che e fasi invidie a dut il mont”.
__
Cjalant viers il Çoncolan e Sapade, ce si puedial fâ?
“I vûl cognossudis lis categoriis di cicliscj che a gjoldin dal turisim in biciclete. Al è chel “lent” che al zire cu famee, il pensionât che al zire cui amîs o chel dal turist sportîf. Inte Basse si viodin massime i prins. Ator pe Cjargne si pues contentâ ducj, parcè che i percors a son pardabon adats a cualsisei esigjence: di chel che al vûl dome gjoldisi il teritori a chel che al ponte a rivâ su la cime dal Çoncolan, come i professioniscj, par contâ il gust di jessi rivât là parsore”. ❚
::::::::::::::::::::::::::::::::::::::::::::::::::::::::::::::::::::::
Cicloturisim: la gnove frontiere
Cinc miliarts di euros di faturât
ogni an in Italie: une suste di grant valôr pe nestre economie
Intai ultins agns, il turisim ciclistic in Friûl – Vignesie Julie al è cressût in maniere significative, in gracie di un aument des infrastruturis e de promozion ative de regjon come destinazion par ducj. I percors plui famôs a son la Alpe Adria e le Pedemontana FVG3, ricognossudis a nivel talian e internazionâl. Massime la ciclovie Pedemontana e à vinçût l’Oscar talian pal turisim ciclistic tal 2024 pe cualitât dal percors e pe ufierte di servizis ai cicliscj.
◆ I invistiments a àn contribuît a une incressite significative dai turiscj in biciclete, tirâts dongje ancje de varietât di paisaçs, des monts aes cuestis adriatichis. La piste Alpe Adria e riclame turiscj di dute la Europe, in gracie dai siei 400 km che a pein la Austrie cu la Italie, cuntun panoramis che a puartin vie il fiât e une strade adate pai cicliscj di ducj i nivei.
◆ Dai studis e des ricercjis dai esperts de materie, si capìs che il valôr dal turisim in biciclete in Italie, un setôr indulà che il Friûl al rapresente une part impuartante, al è stimât a plui di 5 miliarts di euros par ogni an. La popolaritât cressinte di cheste forme di turisim e rivarà a jessi une suste di no crodi pal futûr de nestre tiere. ❚