Fulvio Romanin: il cjapitani dai sîts par furlan
Par cui che al trafiche cu la lenghe furlane, il so non al è une bale mate che e salte cence polse dal cjamp musicâl a chel leterari, madracant jenfri une “Urtio” e un “cercli di stelis”, par dopo passâ di “Niari” ae “stagjon de mude” e trasformâsi intal scritôr di “L’iva funesta”, un manuâl che al è deventât scuasit une taule dai dîs comandaments par cui che al à a ce fâ cu la partide iva.
No content des esperiencis artistichis, Fulvio Romanin al è ancje un professionist dal setôr digjitâl e de comunicazion, in plui di jessi fondadôr di Ensoul, une aziende specializade intal svilup di sîts internet e prodots pal web che e svante clients tant che Fantoni, Moroso, Fondazion Feltrinelli e v.i.
Jenfri i progjets pe difusion de lenghe furlane inte rêt, al à curade la version furlane di WordPress e al è un dai svilupadôrs di Telegram par furlan.
__
Parcè un come te, che al à za avonde impegns intal lavôr, al à cheste voie di metisi in zûc pe difusion de lenghe furlane intes gnovis tecnologjiis?
Al è un pôc un cuintrisens fevelâ di gnovis tecnologjiis: a son bielzà 15-20 agns che a son ator, dome che cumò, cun cheste storie dal covid, no son plui une ufierte, ma une commodity e no tu puedis tornâ indaûr. O passìn un bon tierç de zornade a cjalâ la tecnologjie, li che si cjatìn denant di altris lenghis. Mi pâr normâl pensâ che al vedi di jessi ancje il furlan. Se une lenghe e esist, inalore e à di jessi presinte inte rêt. No je une cuistion di cjampanilisim, o di antagonisim. E je cheste idee che il furlan al sedi un Fort Apache menaçât dal talian, jo invezit o crôt che nol sedi mai stât la uniche lenghe dal Friûl, ma o sin simpri stâts un popul bilengâl. No mi cjati intune situazion di difindi alc. E je une cundizion obleade dal jessi e dal stâ al pas cui timps.
__
Cemût isal nassût WordPress par furlan?
Al nas come strument di democratizazion dal web, stant che al è un strument “open source” par creâ sîts. Nô o vevin tacât cun chel parcè che jo lu dopri ogni dì e o vevi viodût che al jere in tantis lenghis ma no par furlan, duncje o ai domandade une man a Ferdinando Passone e o sin lâts indenant. Par Telegram invezit a àn tacât di bessôi, mi àn clamât parcè che o vevi fat WordPress e jo ju ai metûts in contat cu la ARLeF. Al è stât biel viodi chescj zovins che si son movûts in maniere indipendente, preseant ancje il fat che Telegram al è un sisteme democratic, a diference di Whatsapp.
__
Duncje no tu ti proponarâs par voltâ Whatsapp par furlan?
Se tu mi ponis un obietîf, ancje se une vore sfidant, in chest moment bisugnarès lavorâ suntun program di detature par furlan. Se tu i pensis, plui dal 50% des ricercjis a vegnin fatis midiant dal assistent vocâl. Cun di plui, il furlan al è simpri stât stimât un dialet parcè che a son un grum di variantis diferentis. Al è clâr che une koinè e covente, propite come che al è sucedût cul toscan pe lenghe taliane.
__
Ma rivâ a inserî dutis chestis variantis nol saressial un lavoron?
No disarès. Ae fin no vin cuissà tropis variazions, rispiet a chei che a son i database di altris lenghis. O sin un paîs piçul: 1 milion di abitants, tant che un condomini in Coree.
__
A proposit di numars: cemût vadie la aventure cun WordPress e cun Telegram? Tropis voltis sono stâts discjamâts?
Wordpress al jere un program plui par “nerd”, cuntun cjamp di azion limitât, Telegram invezit al sta lant benut. Tignìn ben ad a ments che in internet i numar a son impuartants, ma no son dut. Culturis che fin cumò a someavin piçulis e cence valôr a stan biel planc concuistant il lôr spazi.
__
Ce altris azions bisugnaressial puartâ indenant?
Stant a cemût che le viôt jo, si varès di continuâ a pocâ su lis tecnologjiis, parcè che al è un puest facil di agredî, limitât e che nol risint di gjeografiis: al rive dapardut, che e sedi la Basse Furlane o Colonia Caroya in Argjentine. ❚
