Il contestoriis Loris Vescovo nus rispuint cul gnûf album Adalt
Loris Vescovo, il cjantautôr contestoriis furlan, al è tornât cuntune gnove aventure discografiche. Al jere il 2014 cuant che al vincè la Targhe Tenco tant che miôr album in lenghe minoritarie cun “Penisolâti”. Prime di chest, al à vierzude la cariere cul album “Borderline”, che si moveve dilunc dai confins e des rostis, e “Penisolâti” al esplorave i margjins e lis cuestis. Chest gnûf album, dal titul “Adalt”, si jeve a contâ lis altecis e la verticalitât.
◆ Chest lavôr, come che al scrîf l’artist «Al è dedicât ae mê compagne di cjants Claudia Grimaz che e je lade adalt masse adore. E a mê fie Emilia, che a distance di pôcs dîs invezit, dal alt e je rivade pe mê gjonde e par chê de me “kochanie” Karolina.»
◆ A fondament dal album, une semplice domande “parcè pensino che dut chel che al sta “parsore” al sedi miôr? La rispueste Loris le da intai dîs tocs di “Adalt” che a esplorin gnûfs suns in direzion dal zenit. Al conte di temis leâts al podê, ae spiritualitât, ae tecniche, ae nature e ae pierdite.
◆ “Adalt” e je la dimension verticâl che no ducj o vivìn e che e definìs i nestris limits. L’album al tradûs in musiche la altece, che e continue idealmentri bande la sfere celeste e il zenit.
◆ La altece e je une linie invisibile che e imbrace la fisiche e la metafisiche.
◆ Il zenit al è popolât di tors sacris, cjampanii, glesiis, fortificazions e cjistiei, ma te ete de tecniche e inovazion al è ancje plen di drons, avions, antenis di ogni gjenar, satelits e stazions spaziâls.
◆ A compagnâlu ta chest gnûf album a son Leo Virgili ae ghitare eletriche, glockenspiel, xilofon, tastiere, bas, cun campions sonôrs, la produzion artistiche, regjistrazion e mixaç. Cun lui, il violoncel di Massimo Silverio e i timbris di Nicholas Remondino ae batarie, percussions e scarpis. Il mastering al è curât di Daniele Speed Dibiaggio. E ancjemò, Roman Sakowski, Linda Fierro, Paolo Cantarutti, Claudia Ferigo e Valter Colle. «A ducj ur va il gno plui grant agrât par vê fat jevâ lis storiis di chest lavôr.»
◆ L’album al scomence cu la cjançon “I toi cjamps”, cuntun motîf ritmic e i arpeçs de ghitare classiche, e dal guitalele e guzheng che a crein notis di colôr.
“…Privatizât libars balâts/ intun resort a ponts/ cristai licuits, ve i gnûfs vuardians!/ tirant rêts par colomps/ Jo buti vie le password,/ deventais ue, e jo volp/ feveli lenghis muartis/ us sconet di me di colp…” al cjante in “Criptografiis”. Toc cun sbrufs di eletroniche, fraseâ di xilofon e slambris di violoncel.
◆ Il tierç toc, “Sotans” al conte di cemût che “…Piardûts sin pai capanons/ sin dentri a spedî pacons/ ma al sudôr sul carton codiçs scrivarà/ che e disaran: “ducj o sin sot paron”…, cun fraseçs acits de ghitare eletriche e cuntune atmosfere ruvide. Il côr di “Sotans” a son lis vôs di Mojra Bearzot, Alvise Nodale e Davide Raciti.
“Dome” al introdûs i sintetizadôrs cun plats e batarie che a colorin paisaçs sonôrs. Daspò, cun “Nô ce vino piardût”, al da une scosse al album cuntune ritmiche cuasi militâr che e romp la dinamiche dal album. “Riff Raff (orazion paiane)” al vierç la strade a un crescendo ritmic cuntune batarie tonant e cuntun violoncel ustinât.
◆ Dopo di “A plomp”, la cjançon “Sontga Margriata” e onore la tradizion culturâl alpine. Chest toc al tradûs par furlan un cjant popolâr, tramandât in forme orâl te lenghe retoromaniche de Surselva. Po dopo il toc che al da il titul al album, “Adalt”, che al da spazi ai arpeçs dal guzheng. Al siere cheste conte “Perdonaimi”, cuntune poesie di Francesca Marini Barnaba voltade in musiche: …al infinît e tal eterno, us sint,/ e tal amôr, e tal dolôr/ Ma no sierât/ tune frede,/ cjase di piere…
◆ Il contestoriis furlan cun chest album e cu la sô diversitât des melodiis, di struments che a vegnin introdusûts e cun peraulis che a son poesiis, al à savût concludi une trilogjie “de tiere”, come che le definìs lui stes.
L’album al è disponibil su https://www.nota.it/prodotto/adalt/
Stait daûr a Loris Vescovo su la sô pagjine Facebook par scuvierzi di plui su ogni composizion e par savê dutis lis gnovis sul artist. ❚