✽✽ «O sin furlans di lenghe furlane, che a son convints di fâ part de nazion furlane. Che al è come dî che o sin un popul, une etnie, une nazion, che dopo tancj parons, che a àn balinât di chestis bandis dilunc i secui, cumò di cent agns indaûr o sin cjapâts dentri tal tramai dal Stât talian». Al scriveve cussì pre Toni Beline, sul so prin editoriâl de “La Patrie dal Friûl”. Al jere il Dicembar dal 1978.
✽✽ A son passâts 46 agns di chê declarazion di intindiments, di chel proclame che al sarès deventât la bussule par chei che a vevin a cûr la cuistion furlane. Nol jere sigûr il prin a doprâ chês peraulis, a afermâ principis che a varessin vût di costituî la jentrade a ogni statût di chês organizazions o moviments che a fasin riferiment ae autonomie dal Friûl.
✽✽ Ma il mont al è cambiât cuntune velocitât discognossude a altris timps, savoltant dispès il valôr e il significât di tantis ciertecis. Pensìn par esempli a doi concets tant che etnie e nazion. La prime e à pierdût i siei conotâts cui moviments di masse dentri di ogni Paîs e, intai ultins decenis, cul fenomen des imigrazions di altris continents.
✽✽ La seconde e à pierdût la bataie cuintri la confusion dai tiermins, identificant la stesse cul concet di Stât cul risultât che dome che la istituzion statuâl e risulte la sô “proprietarie”. In barbe a chês che Sergio Schiavi al definive in maniere juste “lis nazions cence stât”. A complicâ ancjemò di plui lis robis, al torne sù in Europe e in variis parts dal mont chel nazionalisim dal Nûfcent che nol è nuie altri che la afermazion di une supremazie ancje cheste statâl.
✽✽ Si puedial duncje calcolâ la cuistion furlane tant che ancjemò subiete a cheste terminologjie che dopo si trasforme intun program politic, e intune vision dal mont? La storie dal Friûl nus insegne che no esist une etnie furlane, ma che nô o sin alc che al è un risultât magnific, e benedît di Diu, dal incrosament di ints diviersis, dai Celtis ai Langobarts, dai Latins ai Slovens, dai Todescs ai Francês. Oms e feminis che a àn sielt di vivi chestis tieris, di coltâlis, di difindilis creant une lenghe, une storie, une tradizion, un sintî comun. Chest al è il popul furlan di îr e di vuê: no une ereditât etniche ma etiche.
✽✽ E intun mont globalizât, la nestre diversitât e fâs simpri plui pôre. Al sucêt za dai timps dai Patriarcjis, de Glesie di Aquilee e al va indenant rivant ai nestris dîs, cun plui intensitât e cun gnûfs struments par discancelâle, uniformâle al pinsîr dominant di une Italie che e torne a scuvierzi la sô muse reazionarie e centraliste.
✽✽ Parcè che ae fin pe Italie i gnûfs barbars o sin nô. ❚