REAZIONS
Intal clericât furlan tantis corintis critichis
Des pagjinis dal setemanâl diocesan “la Vita Cattolica” dai 23 di Mai passâts si viôt une disposizion unanime di entusiasim e otimisim dai sacerdots e dai laics furlans bande il percors di riforme de diocesi. Al somee che dut al procedi intal segn di une grande condivision. Ma al è alc che al stone. Dai 12 di Jugn, l’Arcivescul al sta cjatant i sacerdots e i diacuns des 8 foraniis che a nassaran intal gnûf ordenament pe presentazion dal document di base di cheste riforme. Ma, escludûts i membris dai Conseis presbiteriâl e pastorâl diocesan e dal Coleç dai vicjaris foranis, nissun nol à podût consultâ chest document intal detai. Presentâ une riforme di cheste puartade, cence dâ la pussibilitât di aprofondî i contignûts in maniere preventive, a tancj ur somee un truc par scjafoiâ ogni dibatiment pussibil.
A chest si rispuint che il progjet al sarès stât elaborât cuntune grande discussion intai organisims plui rapresentatîfs dal “popul di Diu” che al vîf inte Arcidiocesi di Udin: il Consei presbiteriâl (parlamentut dal clericât udinês), chel pastorâl (là che a son ancje i rapresentants dai laics) e il Coleç dai vicjaris foranis, che al da vôs a ducj i teritoris de diocesi. Cun di plui, dutis lis parochiis a saressin stadis invidadis a mandâ contribûts scrits.Lis robis, però, a saressin ladis in mût tant diviers. Il dibatiment al è stât une vore debil e i apuarts pôc significatîfs. Insume, al è un test calât in maniere eminente dal alt.
«La veretât e je che al mancje un rapuart di fiducie e di stime dal Arcivescul bande il so clericât – nus dîs, domandant l’anonimât, un esponent prestigjôs dai sacerdots furlans, une colone storiche de diocesi di Udin, o podaressin definîlu -. Specie di fûr diocesi, a rivin judizis no propit entusiastics dal Arcivescul bande il so clericât. Lis critichis dai predis viers de Curie a son un fat storic apurât, aromai cuasi un pecjât veniâl, ma che un Pastôr al feveli mâl in maniere gjeneralizade dai siei sacerdots e je une feride tant grave. Di ca al nas un sens di abandon, di strache, di rassegnazion».
La mancjance fin cumò di un dibatiment vivarôs no sarès duncje un segn di aprovazion, ma di malfidence sostanziâl sui risultâts li che e podarès puartâ une discussion plui francje. Cussì il discontent al cove sot de cinise.
Par rimedeâ a cheste situazion, e je stade butade (in particolâr di bons. Rizieri De Tina, vicjari forani di Nimis) la propueste di convocâ une Assemblee dai cristians, simile a chê che intal 1977 e à dât une grande svolte al contribût che la Glesie Udinese e voleve dâ ae ricostruzion post taramot, ma soredut al riscat dal Friûl di une situazion di margjinalitât economiche, culturâl e in tiermins infrastruturâi.
E si pues ben dî che chel avigniment al à dât une grande svolte ae storie dal Friûl. Parcè no ripeti cheste esperience vuê, intun moment di dificoltât par tancj aspiets analics a chei dal post ’76? L’Arcivescul si jere impegnât a consultâ i organisims diocesans principâi, ma dopo al à parade sot la propueste, sostignint che nol veve cjatât la poie necessarie dai vicjaris foranis. In realtât, cuant che cheste ipotesi e je stade esaminade, a forin trê intervents a pro e nissun contrari.
La idee e jere chê di fâ un check up corâl sul stât des diocesis. «Intai incuintris dal clericât cul Arcivescul ducj a tasin – nus conte un sacerdot -, parcè che lui al interprete ogni element di dibatiment come une contraposizion personâl, tant che nol lasse mai disvilupâ un dibatiment tra predis, ma al rispuint subit in maniere personâl a ogni intervent. Al è sucedût invezit che, dopo de sô assence pal infortuni patît intal Novembar passât, intai stes incuintris tra sacerdots si è disvilupât un dibatiment tant ampli e articolât su la riforme diocesane. Cuant che al è tornât, al è calât di gnûf il mutisim. Il probleme al è che nô furlans devant de autoritât, pluitost che protestâ, o vin miôr tasê. Ma il cidin dai furlans al dîs za tant…».
La Assemblee dai cristians e sarès stade une ocasion impuartante par capî cemût che dutis lis componentis de comunitât eclesiâl, dal clericât ai laics, a vivin la realtât cuotidiane, e par cirî lis rispuestis plui adatis a un doman che, pai cristians furlans, al presente sfidis tant griviis e soredut la dibisugne di une gnove impostazion par continuâ a fevelâ a une societât mudade in profonditât. ❚
di Roberto Pensa
