Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse
II. PROFETE COME VÔS DI DIU
Profete al è chel che al fevele tal puest di… Par solit tal puest di Diu. Poben, cun dut il so rapuart problematic e conflituâl cun Diu e il mont religjôs, soredut cu la istituzion gleseastiche, al è dificil cjatâ un altri artist o pensadôr cussì peât a strent cul mont religjôs. And è personis ch’a àn la bocje simpri plene dal non di Diu, ancje e soredut a sproposit, a garanzie e legjitimazion dai lôr interès e des lôr fufignis. Un Diu che lu àn in esclusive, come in regjim monopolistic. Epûr daûr des lôr peraulis no si sint la presince incuietant di Diu. O ven fûr di une tiere e di une esperience là che la blesteme e à cjapât, in certis situazions disperadis, il savôr e il valôr di une preiere, come che certis preieris a podevin benon passâ par blestemis. Pre Bepo Marchet, par altri un dai pôcs ch’a àn let e preseât il zovin professôr furlan, intune des sôs poesiis al à preade la “Madonute des nestris blestemis”.
◆ Poben, daûr des peraulis, dai resonaments, de ricercje fadiose e tantis voltis scandalose di Pasolini, si sintive une presince di Diu continue e ossessive. O disarès ch’al jere dibot condanât a no podê stâ cence Diu, intun rapuart di amôr-odio che al è di sigûr miôr che no l’indiference de nestre gjenerazion passude, vueide e disperade. No vin di dismenteâ che la nestre int, cussì colegade cul popul ebraic par liendis storichis, e à une religjositât vetero-testamentarie. La domande che si fasevin i ebreus tai savalons arsinîts di Masse e di Meribe: “Jahvè esal de nestre bande sì o no?” (Es 17, 7), tropis voltis no le àe ripetude la nestre int tes sôs mil tragjediis personâls e coletivis?
◆ Parcè che Diu al è essenzialmentri ricercje, enigme, trassendence, misteri, probleme ancje spasimant. Cuintriponûts a lui, creadôr e paron de storie, a son i idui, lis creaturis alçadis a dignitât di creadôr, trasformadis di robe di doprâ a robe di adorâ. La vôs dai profetis si è alçade alte cuintri dal unic, autentic pecjât, l’idolatrie, considerade la colpe di ducj i ecès e di dutis lis macacadis e banalitâts.
CUINTRI OGNI IDOLATRIE, ANCJE INTE GLESIE
Pasolini al à combatude cence padìn e cun dolôr la moderne idolatrie dal possès, de inmagjine, de assolutizazion di robis che no vevin il valôr di assolût. Al à vût il coragjo, râr par no dî unic, di combati la plui fine e periculose des idolatriis, di rude mari catoliche, che, impen di servî Diu in umiltât e veretât, si servìs di lui sicu garant des propiis trainis, ridusintlu a idul.
◆ Lis pagjinis che Pasolini al à dedicât al teme: “Glesie e podê” a son des plui tormentadis e lusorosis. Al bastarès tornâ a lei ce che al à scrit sul “Corriere della sera” tal setembar dal 1974 a proposit di un litrat di Pauli VI fotografât cuntun cjapiel Sioux sul cjâf, embleme di une Glesie che, no vint vût il coragjo profetic di riscjâ ancje di sparî par mertâ la gracie de resurezion, e veve firmât il so suicidi, ridusintsi a rût folclôr. ❚