III. Valôr dal profete
Atac vilan de bande dal gjornâl vatican
Mi visi, su chest, che l’”Osservatore Romano” al tacà Pasolini in maniere pesante e vilane pai siei films “di un decjadentisim enigmatic e inacetabil”, pal so “scrivi corosîf” e par “cierts ategjaments pluitost fûr di scuare”. Cheste “indegnitât” i gjavave naturalmentri ogni autorevolece a ce che al diseve. Simpri in chê ocasion, mi visi di vê mandât, midiant dal gjornâl milanês, une letare a Pasolini, firmade ancje di altris amîs, là che o palesavin dute la nestre braùre di vê par paisan un om tant limpi, libar e profont. La letare e finive cussì: “Cun tancj gardenâi che in chescj timps di confusion e di crisi no disin nuie o no àn nuie ce dî, vessino, inte Glesie catoliche, un gardenâl Pasolini!”.
Dignitât dal profete e validitât de profezie
Chi si vierzarès il discors, par nuie inutil, fra la dignitât dal profete e la validitât dal so mes. Za il concili di Trent al à proclamât in maniere infalibile, cu la dutrine dal ex opere operato (Sess. VII, 3 di Març dal 1547, cc. 8 e 12), che la validitât di cierts ats no dipent par nuie de dignitât de persone. O crôt che la plui interessade ae cuistion e fos propit la Glesie catoliche, incolpade di ogni bande di dineâ par sisteme inte pratiche ce che e diseve in teorie, pierdint cussì ogni autorevolece. In plui, la Bibie nus à contât câs di profetis infedêi che a profetavin cun fedeltât. Parcè che la profezie, come ogni carisme, e je dade dal unic Spirt “pal ben di ducj” (1 Cor 12, 7).
◆ Personalmentri mi fâs plui impression se une grande lezion mi ven di un che, almancul cjalantlu di fûr, al sarès il mancul adat a fâlu e se Diu al sielç lis robis o personis plui puaris par fânus rivâ i siei mes plui alts. E risalte di plui la paronance di Diu, che nol cjate stralencs inte infermitât des realtâts creadis.
Une rose regalade de liberalitât di Diu
Cjatâ une biele rose tun zardin di siôrs nol è nuie di straordenari. Ma cui no si sintial a slargjâ il cûr denant di une rose floride framieç des maseriis e des scovacis? Fûr di paragon, che ciertis robis lis disi un pape o un vescul al è dibot scontât, ma che lis disi un che uficialmentri al è “lontan” al fâs plui impression. Che se dopo il “lontan” o l’”indegn” al rive a lei la realtât cun plui profonditât e spirt evangjelic che no la jerarchie, chest nol pues che fânus pensâ. Come minim o varessin di convignî che lis stradis che Diu al sielç par rivâ fin chi di nô a son infinidis, come che infinide e je la sô liberalitât e fantasie. E che, se e esist tal mont une blesteme, no je la negazion di Diu ma la presunzion di vênt il monopoli. E je la Glesie e il profete che a àn dibisugne di Diu, no Diu di lôr. Chest al sclarìs la libertât e la liberalitât des sôs sieltis. ❚