Plebissît pustiç

“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, come i standarts cuant che a jentrin in glesie ae fin de procession.”
“Simpri voie di fâ il mataran, eh, nono?” “Simpri! Mi manten zovin! Ce mi contistu?”
◆ “Îr o soi lât in comun, par fâ il passepuart.” “Orpo, indulà âstu di lâ?” “In Americhe. I miei mi regalin il viaç tant che premi che mi soi diplomât une vore ben, 100 su 100” “Brâf, compliments! Ma covential lâ in Americhe?” “Sù po, nono, no stâ a movi cantins che mê mari no vedi di cambiâ idee! Par me e je une ocasion di aur.” “Âstu cumbinât, in comun?” “Eh, mi à tocjât spietâ une vore. Un grum di int denant di me. Intant che o spietavi sentât o ai cjalade la lapide che e je te jentrade dal municipi.” “Chê dal plebissît?” “Sì, chê. No le vevi mai lete ben. Ma, intant che o spietavi e che le vevi denant di me, le ai lete e tornade a lei plui di une volte.” “E ce âstu capît, nevôt?” “Che chei di Cjarlins a vevin di jessi pardabon seneôs di deventâ talians, dopo di jessi stâts sot de Austrie: 222 a pro de Italie e zero contraris! Bulos!” “Tu varâs cjapât 100 tal esam di maturitât ma te storie no tu sês avonde madûr!” “Parcè po, nono? O sai dut de tierce vuere di indipendence, o ai studiât l’armistizi di Cormons…” “Ma cemût puedistu jessi braurôs di chê cragne di lapide!” “Ma nono… ce disistu?!” “O dîs che un fantat brâf di liceu come te no sa la veretât e al crôt come un biât che la storie contade tai libris di scuele e sedi veretât! Lafè no, frut!” “Nono, cjale che jo o sai che te tierce vuere di indipendence il Venit e il Friûl a son deventât talians no parcè che o vevin vinçût (che o vin pierdudis lis bataiis di Custoza e di Lissa) ma in gracie che nô e jerin aleâts de Prussie, e chê e veve batude la Austrie. Dut câs chê lapide e dîs che ducj chei di Cjarlins, propit ducj e cun entusiasim, a àn votât di lâ cul re di Italie. Al è scrit cussì! O ai fate une foto cul celulâr cussì ti lei:

Il dì 21 Ottobre 1866
CARLINO
per unanime plebiscito
entusiasticamente aderiva
alla monarchia costituzionale italiana con
RE VITTORIO EMANUELE II
ed ultima ignorata terra
per natural geografica posizione
palesavasi di tal modo fra le prime
nell’affetto della gran madre comune
ITALIA
Voti favorevoli 222 contrari 0
Il patrio consiglio a ricordo perenne
POSE”

◆ “E duncje, par te, se al scrit cussì, chê e sarès la veretât, no mo?” “Parcè di no?” “Scolte, nevôt. Jo o capìs che no te àn contade juste e che no tu sâs ce che al è capitât, ma za ta cheste scrite al è alc che al varès di fâti meti in forsit e fâti vignî cualchi dubi. Intant il stîl plen di retoriche. La retoriche, tu le âs studiade tal liceu, vere, al è cirì di fâ colp cuntun stîl sflocjât di peraulis vuedis e fentis lant daûr a lûcs comuns banâi. No ti somee che al sedi esagjerât scrivi entusiasticamente aderiva o chê di jessi prins nell’affetto della gran madre comune Italia?” “O sin tal ‘800, nono. A jerin ducj contents, che a àn votât unanim!” “Alore fevelin de unanimitât. No ti nase di rustiç che nancje un al vedi votât no? E parcè 222? Jerino cussì pôcs a Cjarlins chei che a podevin votâ, ven a stâi i oms parsore dai 21 agns?” “Chel no sai. Ma, a pensâ ben, al è strani che nancje cualchidun al sedi stât contrari. Mi ven di scrupulâ, nono, che chei contraris no sedin lâts a votâ.” “Brâf, nevôt! Cumò tu scomencis a vierzi i voi.” “Ma no rivi a capì parcè, nono. Se a jerin contraris, a jerin libars di votâ, tant nissun lu varès savût e al sarès vignût fûr un risultât plui crodibil.” “Ti spietavi juste achì. Tu tu crodis che il vôt ad sedi stât libar e segret, vere?” “Sì.” “Bon, alore ti conti come che si à votât. Ten cont che in chê volte plui dal 70% de int e jere analfabete e, intun paisut come Cjarlins, a saran stâts un vincj o trente di lôr bogns di lei e scrivi par talian. Cemût podevino capì ce che al jere scrit te schede dal vôt? Duncje i tocjave al plevan e ai sorestants insegnâur cemût votâ.” “Ancje cumò, nono, a son chei che ti disin cemût votâ, ma dopo tu votis come che tu vûs. Cui ti controlie?” “Achì al ven il biel. Par che i puars contadins no sbaliassin – che i ordins dal alt e jerin stâts precîs – i sorestants e i parons a devin a ognidun la schede scrite di meti te urne. Parsore al jere za stampât SI Dichiariamo la nostra unione al regno d’Italia sotto il governo monarchico costituzionale del Re Vittorio Emanuele II e de’ suoi successori. Ju puartavin in procession a votâ, ancje cu la bande, a cjatavin la urne dal SI su la taule e chê dal NO sot de taule, cussì che ducj a podessin viodi dulà che a metevin la schede. Di ca e di là doi carabinîrs. E tal regjistri a notavin cui che al votave SI e cui che al votave NO. Âstu capide la unanimitât!” “Robis di no crodi, nono. E cussì dapardut?” “In dut il Friûl a son stâts dome 36 NO. Ca e là cualchi vôt râr di cualchi cjaviestri che o nol varà capît o che al à volût fâ il bastiancontrari. Ma dopo al varà purgadis lis fricis pe sô pensade. Di chei 36 NO, 25 a son stâts a Cosean. Alì il plevan pre Vigji Riva al à dit inte predicje che si jere libars di votâ daûr cussience. Forsit, ma no si sa, no i jere rivade la letare dal vescul cu lis diretivis di cemût votâ. Chê di Cosean e fo pandude come une grande vergogne. Tal doman pre Riva, tal marcjât di S. Denêl, al fo vuadolât a sanc dai massons – Massonarie anime dal Risorziment, visiti – e lu varessin sassinât se no si fos sierât intune cjase di amîs fin aes dôs di gnot. Di in chê volte il paîs lu clamin Cosean dal no.” “Ce robis. Ma, nono, sino deventâts talians cussì?” “O vin scugnût deventâ talians, nevôt. Se si va a cucâ te politiche alte di chê volte, la robe e je ancjemò plui stomeose. La Austrie e veve pierdude la vuere cu la Prussie e, daûr dai pats, e veve di dâi il Venit e il Friûl ae Italie. Ma l’Imperadôr Franz Josef si refudave di tratâ cu la Italie. Nol voleve nancje fevelâ. Par lui no jere degne. E a scugnût metisi a fâ di sensâr la France. Alore Venit e Friûl a son stâts cedûts de Austrie ae France e cheste e veve di zirâju al Ream di Italie ma, al è scrit tal tratât di pâs, dome se e fos stade la aprovazion des popolazions consultadis di pueste. Il guvier talian al jere une vore in pinsîr sul risultât di cheste votazion parcè che al nasave just che ae plui part de int no interessave une ostie di nuie di deventâ taliane. Alore, prime dal plebissît, si à fat consegnâ chestis tieris de France, che e varès vût di jessi fâ di garanzie de imparzialitât, lis à jempladis di trupis e polizais, e al à fat une vore mostre parcè che la votazion a vignedi fûr unanime, doprant ogni mieç. E o ‘nt varès di contâ une vore. Pense ancje che l’oblic che la int e des la sô aprovazion al sarès stât un biel spieli dal principi di autodeterminazion dai popui. Pecjât che al è lât pe bande contrarie. O sin deventâts talians cussì, nevôt!” “Nono, tu âs dade une biele sdrondenade a ce che o crodevi. Tu mi âs viert i voi, ti ringracii e o sarai plui prudent tal stazâ la storie taliane.” “Ma staze la storie furlane, fantat! Ah, cuant che tu âs dit che nô o vin pierdût lis bataiis di Custoza e di Lissa, visiti che nô di Cjarlins e dal Friûl no lis vin pierdudis parcè che o vin scombatût no sot ma cu la Austrie!” ❚