Intal 2021 la cressite
de agriculture biologjiche regjonâl
e fâs segnâ la dople cifre
Ise sunade la svearine pe transizion ecologjiche in Friûl-VJ? A lei l’ultin rapuart Ismea (Istitût di Servizis pal Marcjât Agricul Alimentâr) su la agriculture biologjiche (cui numars dal 2021), al pararès propit di sì. Par agns o jerin tes ultimis posizions de graduatorie bio taliane e, di chel, si jerin ancje lamentâts (La Patrie dal Friûl, Dicembar dal 2020). Chê volte, la nestre posizion e jere al numar 16 su lis 20 regjons de penisule. Cumò o sin “lâts jù” al numar 17, ma il contest des cifris al è ad implen diviers, tant che la stesse Ismea e note, intes sôs conclusions: “Il cuadri talian nol è omogjeni tra lis diviersis regjons. In cualchi teritori tant che, par esempli, la Campanie (+55,0%), la Toscane (+25,0%) e il Friûl-VJ (+23,4%) lis superficiis biologjichis a cressin cun ritmis mai viodûts fintremai cumò…”.
◆ In efiets, intant che in Italie lis superficiis bio a cressin in medie dal 4,4% (intal 2021 sul 2020), in Friûl-VJ la cressite e je a dôs cifris, o ben +23,4%, daûr dome de Campanie e de Toscane. Se, intal 2020, i nestris etars dedicâts ae agriculture biologjiche a jerin 17.267, cumò a son 21.299. Ancje la cressite dai operadôrs e je significative, cuntun +21,9%, cuintri de medie taliane dal +5,4%. Ancje in chest câs, a fasin miôr di nô dome dôs regjons: la Basilicade e la Campanie. I operadôrs biologjics regjonâi a jerin 910 intal 2020, passâts a 1.109 intal 2021. Bogns risultâts? Sì, ma si pues fâ di miôr.
I AMBIZIÔS OBIETÎFS EUROPEANS
Se, di fat, o cjalìn lis percentuâls di superficiis bio a pet dal univiers agricul intîr, o notìn che a nivel talian la incidence e je dal 17,4%, intant che in Friûl-VJ e je dal 9,2%. Compagn al va dit pal numar des aziendis biologjichis, che inte statistiche no son ripuartadis: in Italie a rapresentin il 6,6% di dut l’univiers agricul, intant che in regjon si fermisi al 4,8%. O ricuardìn che il valôr target de strategjie europeane Farm to Fork al è chel dal 25% di superficie bio di rivâi dentri de fin dal deceni. Se e fos confermade la cressite regjonâl a dôs cifris, l’obietîf al sarès sigûr a puartade di man.
◆ Ma a ce ise dovude, dut câs, cheste cressite regjonâl tant viamente? L’Ismea no lu detaie ancje se al fâs notâ cemût che la poie finanziarie al compart biologjic, intal ultin trieni, e sedi stade considerevule (Program di disvilup rurâl regjonâl includût, par chel che nus rivuarde).
SOSTIGNIBILITÂT E SIGURECE ALIMENTÂR
O disevin sul imprin de transizion ecologjiche, ma al è palês che il rispiet dal ambient nol è plui l’unic teme dulà si à di confrontâ la agriculture biologjiche di vuê e chê dai prossims agns, stant che e je in at une transizion gjenerâl de agriculture che si cjate a vê di coniugâ il teme di une plui grande sostignibilitât dal procès produtîf a chel de sigurece alimentâr e dal acès ae mangjative di cualitât par ducj.
◆ Pal un disvilup plui grant dal compart, al sugjerìs l’Istitût, “al sarà fondamentâl lâ indenant a impegnâsi cun invistiments su la ricercje e sul disvilup di gnovis pratichis e tecnologjiis che a coventin par permeti un cambi di pas che al rindi la agriculture biologjiche la plui moderne tra lis agriculturis. Il disvilup tecnologjic al varès prin di dut di tocjâ la gjenomiche e la produzion di semencis pal biologjic, la mecaniche agrarie specifiche pes operazions dal biologjic, la fitoiatrie e la difusion di mieçs tecnics regjistrâts che a risultin zovevui. Par diviersis culturis o inte zootecnie in gjenerâl, il model dal biologjic al domande invistiments, cognossincis e esperience che no puedin jessi detignûts di dutis lis impresis”. ❚
