“Dislidrisament al è in dì di vuê il pericul platât, chel di scovâ vie il passât, la storie. Mi ven iniment un savoltament meteorologjic sucedût un pâr di Istâts indaûr, cuant che une bissebove e veve fat svolâ vie i cuvierts di capanons; ma chel che di plui mi veve fat pensâ a jerin stadis lis desenis di arbui dai zardins da lis nestris vilutis ribaltâts o gjavâts fûr sul prât”.
◆ Chest libri di 114 pagjnis, formât 30 par 21 cm., si vierç cun cheste introduzion di Gotart Mitri. Daûr di lui, Maurizio Driol – dirigjent scolastic dal Istitût a cjâf di un progjet che al à cjapât dentri undis scuelis inte golaine Docuscuele, promovude de Societât Filologjiche Furlane – al ilustre la struture de opare, cuntun voli particolâr bande la sô valence didatiche e pedagogjiche. E Pauli Pastres al invide al studi intal so intervent L’incjant da la art furlane tal spieli da la storiografie. Un saç penç e meticolôs sul significât de dissipline de storie da la art traviers des oparis che i critics ur àn dedicât dilunc dai secui. Oparis che a son stadis condizionadis ancje dal contest storic: cuant che Aquilee e faseve part dal Imperi austroongjarês, la vision des sôs ricjecis artistichis e jere diferente di chê di cuant che e je passade sot de Italie.
◆ Setante schedis didatichis, scomençant cul Sulcus Primigenius di Aquilee par finî ai nestris dîs.
Ogni schede e fevele di une opare di cualchi artist furlan o che al à vût lavorât chenti. Fotografie, periodi di realizazion, indicazion di dulà che si le cjate, istruzions di leture, descrizion tecniche. In plui, ogni schede e je inricjide di domandis par judâ i arlêfs a capî ben di ce che si trate e ancje par stimolâ ricercjis di caratar storic, gjeografic o artistic.
◆ Un panorame une vore siôr di nons di grant valôr, ancje di là dai trê plui grancj, ven a stâi il Pordenon, Vitale di Bologne e Zuan BatisteTiepolo.
No mancje la descrizion dai lûcs che a tegnin dentri chescj tesaurs dal nestri teritori: la basiliche di Aquilee, e po galariis e museus archeologjics, civics, diocesans, cristians, logâts a Udin, Gurize, Pordenon, Cividât, Glemone.
◆ A completin la opare un biel glossari, la tabele des oparis presentadis e une bibliografie. ❚