Plusôrs autôrs, “Usmis, riviste par culturis rivoluzionariis furlanis e planetariis, n. 5”, S. Denêl, 1995

“Rivoluzion molecolâr. Diversitâts dentri diversitâts dentri diversitâts… lengaçs dentri lengaçs dentri lengaçs…, vê sensibilitâts e je une sfide, tignî cont des diversitâts par insiorâsi di une cjalade loscje, rivâ a tignî cont di un segno cirint di tradusilu intun altri contest. Chest numar al nas TOCJANT CU LA MAN lis diversitâts dentri lis diversitâts, i lengaçs dentri i lengaçs, al nas dal desideri di fâju deventâ intercessôrs di mudament, di tradusi la lôr fuarce pervasive in sensibilitât savoltadore”.
◆ La riviste Usmis e nas intal 1990 e e vîf par cinc numars, fin a chest che al è l’ultin. Al baste butâ un voli al formât (28 par 21), ae grafiche, ae sielte dai caratars, ae impagjinazion, aes fotografiis par capî che si trate di une robe fûr dai schemis. Ma fûr dai schemis a son soredut i contignûts di chestis 108 pagjinis (une cuindisine a son par talian). O fasìn cognossince cun Rosi Braidotti, filosofe di divignince furlane, che e pant la sô idee di un Friûl antirazist, cosmopolitic, multiculturâl, viert e eletronichementri pront par jentrâ in contat cul mont intîr. Cun Giulio Camillo Del Minio, un inteletuâl furlan dal ‘500, precursôr de informatiche. Cu lis Dumbles, lis feminis furlanis libertariis, e cul program dal lôr moviment, vâl a dî pensâ cence confins, cence sierâsi dentri e cence sierâ nissun difûr. Cu la oposizion jenfri la part drete e chê çampe dal nestri cerviel, la magjie di une bande, l’ordin di chê altre. Cun musiciscj tant che chei dal grup Lou Dalfin, cun Giancarlo Toniutti, cun Taki, ghitarist dai Negu Gorriak. Cun Bernardo Atxaga, scritôr basc. Cun Luigi Rapuzzi Johannis, pitôr futurist e scritôr di fantasience, che intai agns ’50 dal secul passât al à vût fondât a Udin la riviste Galassia. Cul Pasolini strike, vâl a dî un siopar par Pasolini, iniziative di sotrazion creative, par no lassâ che ducj i corvats a sprofondin il bec tal cuarp de sô opare (al jere l’an dal vincjesim de muart). E po a son poesiis (nol podeve mancjâ Federico Tavan) e ancje biei saçs su la art, su la musiche, sul feminisim, su lis gnovis tecnologjiis, su la cinematografie. Une miniere di culture alternative (che si nudrive di filosofs tant che Guattari e Deleuze) che no à pierdût nuie dal so snait cul passâ dai agns. ❚