Tropis clamadis aial cjapât, daspò de sô letere publicade sui gjornâi locâi su la crisi de Leghe Nord e su ce che – lui al à definît – “vueit a livel dirigenziâl locâl”?
Tantis: di ex leghiscj e di int che ancjemò e je iscrite. Diviers mi àn domandât ancje scuse parcè che cuant che lis disevi in passât no mi crodevin.
Cualchi non?
Mai. No vuei ruvinâju. La lôr solidarietât e je il riconognossi il mert di une militance che e à dât cence vê.
Lui, a un ciert pont, al scrîf che al saveve che prime o dopo al sarès rivât il moment di cheste crisi dentri de Leghe.
Al è di cuant che o soi lât fûr che o ai dite che dentri de Leghe o sintivi la stesse puce di cadavar e di m**rde dal partît socialist. Magari il lengaç nol sarà stât signorîl, ma chel al è! Di fat, jo o pues sigâ vuê e nissun mi tache parcè che o dîs robis za ditis.
E percè la puce di cadavar no le sintirin altris personaçs politics, par esempli un Fontanini?
Cui che al jere a cjâf si scugnive inacuarzi. Fontanini al scugnive savê ce che al sucedeve te Leghe par vie che in Consei Federâl a son robis che a saltin fûr claris.
Ce rapuarts aial cui leghiscj di vuê?
Gjavant une o dôs personis, no ai rancôrs viers nissun.
Cun cuâi dirigjents aial ancjemò contats?
Si ti dîs i nons a son ruvinâts. In LN e funzione cussì: cuant che un al va fûr, si scuen fâ il vueit ator di lui. A mi àn provât a fâ di dut. Mi diserin ancje che o jeri cjoc ogni sere, par vie che o jeri ros di muse. E invezit o ai la psoriasi.
La Guerra, le sintie?
Une vite che no le viôt. No dinei une mê storiche frase “il Friûl al à vût trê disgraciis: il Vajont, il Taramot e la Guerra presidente”. E dut câs daûr de Guerra, e jere ancje une scuadre.
Te letare ai gjornâi, al fevele di un Bossi amorâl, che al à struturât il partît tor de sô figure. Lui però al dismentee che Visentin, in Friûl, al jere la Leghe e la Leghe e jere lui. No ise la stesse robe?
Cuntune diference. I iscrits mi darin credit cence che jo lu domandàs. E jo tes sedis o ziravi ancje par fâ il manovâl, l’idraulic, il sblancjin. O varai sistemâts puartis e barcons, ma mai amîs, femine o amantis.
Lui al jere il pari – paron de Leghe Friûl.
No crôt che si podeve fâ il pari paron cun Fasola o cun Cecot. Bossi ju varès fats fûr il dì dopo. Jo ju ai ancje sostignûts.
Bon ma ciertis assembleis di sezion… a somevavin une robe bulgare. Par sielzi i candidâts sindics, prime o fasevis lis primariis. E il vincidôr al veve di frontâ in dibatiment finâl Visentin.
Al jere il partît che al puartave i vôts, se tu metivis un purcit in liste al jentrave ancje chel. Bisugnave selezionâ e garantî il miôr, al eletôr. Si clame selezion.
Crodial ancjemò tal federalisim?
O crôt tal decentrament amministrtîf che si clame federalisim. Ma chel al è un tiermin aromai abusât e ruvinât. A àn fat chel fiscâl par ruvinâ su dut. Il grues erôr al è stât vê acetât di fâlu juste par mostrâ di vê fat alc. Dome che se tu lu fasin intun moment di magre, a lis tassis centrâls si zontin chês periferichis. Cussì la int e pense “chest al è il federalisim, tu pais un fracade di bêçs!” E si paie l’efiet contrari.
Saveviso ancje dai investiments in Cravuazie?
Si che o savevin come ducj chei che a fasin part dal diretîf. Jo mi soi refudât. No vevi intezion di massedâ afârs, politiche e partîts. Ancje l’ex assessôr regjonâl Pietro Arduini, che al jere plui tecnic di me, al veve capît che e jere une robe che no steve in pîts.
Ma parcè chestis robis che o savevis a nivel di Consei federâl lis vêso tasudis?
L’amôr viers de Leghe al jere talmentri grant che si passave sore dut.
I gnûfs moviments politics che a stan nassint cumò sono come la Lega Nord de prime ore?
La Leghe e jere par une politiche divierse, no pe antipolitiche. Se Grillo o cui par lui al covente par mandâ a cjase i nestris politics, benvignût! Ma nol sarà la soluzion.
La Lega Nord ise destinade a spacâsi?
E starà in pîts fintremai che i puescj di distruibî a restin compagns. Se i puescj a calaran, si scjadenarà une lote interne. Ocjo ae ultime di Bossi: “Mi ricandido”. Evidentementri e je la sensazion che Maroni nol è cussì fuart.
Daspò la jessude aial ancjemò votât Lega?
No.
E ce votial cumò? Centridrete o centriçampe?
A seconde. In ogni câs, simpri cuintri.
Tornaressial in politiche?
Se o cjati alc di gnûf e interessant, no mi tiri indaûr. ■
Oscar Puntel
Presentazion / La Patrie dal Friûl e presente il libri “Fûc su Gurize” di Ferruccio Tassin e Gianni Nazzi
Redazion
La Patrie dal Friûl e presente il libri “Fûc su Gurize”.“La Patrie” e je la cjase dai furlans che no si rindin: e par chest e à volût meti dongje un libri zontant insiemi lis peraulis che chescj doi inteletuâi a doprin par descrivi ce che e jere cheste culture di cunfin e ce che […] lei di plui +
Cungjò / Mandi, Bruno.
Redazion
Al declarave “che nol è dificil fâ telecronachis in marilenghe e che il furlan al à peraulis e espressions di pueste par fâlu”. lei di plui +
L’EDITORIÂL / La lezion de bandiere par dismovisi dal letarc
Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +
La piçade / Fevelìn di autonomie pluio mancul diferenziade
Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +
Grant suces di “Stin dongje ae Patrie”, la tierce edizion de fieste dal nestri gjornâl
Redazion
Pe rassegne Avostanis, li dai Colonos a Vilecjaze di Listize, il mont des associazions, de culture, dal spetacul, dal sport si è strenzût intor dal gjornâl dut par furlan fondât tal 1946 A an partecipât: Glesie Furlane, i Bakan, Claudio Moretti – Elvio Scruzzi – Fabiano Fantini (Teatro Incerto), Serena Fogolini e Raffaele Serafini (Contecurte), […] lei di plui +
L’EDITORIÂL / No stin a colâ inte vuate de indiference
Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +