Pre Renzo e pre ‘Sef

Pre Renzo Dentesan e pre ‘Sef Cjargnel, compagns di seminari di pre Antoni Beline, a jerin rivâts te plevanie di Guart in Cjargne tal an 1972. Si jerin cumbinâts par stâ ben insiemi; pre Renzo al jere il braç, al partive a buinore a cjoli il pan, il gjornâl e a dâ il bundì in ostarie, e al tignive sot voli cjartis, burocraziis soredut dopo dal taramot dal ’76 e i conts di une cuindisine di glesiis…; pre ‘Sef al jere la ment che si dedicave tal cidin de canoniche ai studis su la glesie di Aquilee e soredut su lis tradizions musicâls, patriarcjinis e corâls dal popul furlan.
◆ Pre Checo, te grande assemblee diocesane dal 1975, al veve dit che il predi al à di sedi cul so popul come il pes te aghe dal Tiliment e pre ‘Sef, inacuart che i cjargnei a conservavin ancjemò, in graciis dai vecjos cjantôrs di glesie, un patrimoni antîc, patriarcjin, popolâr, subit si è dât da fâ passant borcs e paîs par regjistrâ ce che al restave. E jere la aghe frescje e vive li che come un gjavedon al varès nadât pal rest de sô vite. Al è so grant merit se un patrimoni furlan che in pôcs agns al sarès lât pierdût par simpri, si è salvât.
◆ Di chest materiâl al sarès vignût fûr in pôc timp il libri “Cjantis di glesie dal popul furlan”, tal Març dal 1976, li che lis peraulis, ogni consonante e ogni vocâl, ogni note musicâl e sbrissul dopo sbrissul, dut al è stât metût jù su la cjarte midiant dai trasferibii, come che si usave in chei timps. Contant, o savìn che ogni sfuei dal libri, tal devant e daûr al à parsore in medie 800 segnuts; se ju moltiplichin pes pagjinis che a son un centenâr, nus risulte che pre ‘Sef al à trasferît, un par un, sù par jù 80.000 segnuts. Une opare di une pazience infinide di restâ a bocje vierte, incocalîts. Pre ‘Sef, al jere il munic benedetin di un scriptorium de Ete di Mieç sorevivût ae invenzion de stampe dal Gutenberg dal 1455.
◆ Nissun al savarà mai il numar des sôs oris di studi e di lavôr; lu san dome il cîl pontât di stelis des gnots di Guart o i flocs di nêf che si poiavin vie pal Invier sul muret dal curtîl o il rosâr che lui al leve a bagnâ tal cjanton de canoniche. Come che al è scrit tes oparis di Diu: la volte des stelis la sô vore e conte; / une dì i passe il mês a di chê altre, / la gnot a la gnot i passe la gnove. / Nol è un fevelâ, no son peraulis / no si rive a sintî sunôr di sorte (Sal 19, 2-4).
Pre ‘Sef al veve dute la preparazion solide dal seminari par chel che al tocje la musiche e il cjant di glesie, in plui si jere notât a cors di gregorian a Vignesie li che al veve cognossût pari Pelegrin Ernetti, benedetin inamorât di Aquilee e dal cjant furlan e che noaltris o levin ogni tant a cjatâ ae Madone de Salût sul Canâl grant.
◆ Ciert, se un al à sot man la produzion musicâl di pre ‘Sef si inacuarç subit che i siei studis si scuen tignîju in considerazion. In mût particolâr si à di ricuardâ:
◆ “Cjant Patriarcjin di tradizion orâl”, “Il cjant dai Salms responsoriâi che a compagnin lis messis des domeniis e fiestis grandis pal cicli liturgjic dai trê agns”; “Hosanna, Cjants e preieris dal popul furlan” che al cjape dentri: “Sacraments e Sacramentâi, L’an liturgjic, Preiere salmodiche, Devozions e preieris”; in pratiche dut ce che al covente tes celebrazions dal an liturgjic e pe preiere personâl.
Chescj a podaressin sedi i cjantonâi par jentrâ tal spirt di pre ‘Sef e te sô opare liturgjiche musicâl, ma la produzion che nus à lassât e je tant plui bondante.
No ducj, o sai ben e mi ven dit, a jerin o a son dacuardi cu lis sieltis liturgjichis e musicâls di chest predi; a nivel personâl o pues dome che ringraciâlu. Mi à insegnât che la liturgjie e je contemplazion de opare di Diu, floridure de anime profonde e popolâr de nestre int e soredut no si ridûs a regule di rîts clericâi o di stamp sociologjic ma e je azion umane e semplice che nus introdûs al misteri de salvece. Li la comunitât e cjate la risultive de vite tal sacri e tal sant.
◆ Spieli di dut chest e jere ogni an la fieste de Sunte dal mês di Avost: li la glesie de plêf si vistive come un nuviç che si met une corone / e une nuvice che si furnìs cu lis sôs zoiis (Isaie 61, 10) e in chês messis ducj a gjoldevin di un clime spirituâl che al nudrive e al consolave anime e cuarp.
◆ O ai dit dome alc di chest grant predi che al mertarès studis plui profonts e che in diocesi al è stât emargjinât, dismenteât. No dome lui, ma ancje altris predis che nus àn lassât in chescj ultins agns repertoris religjôs di dut rispiet. Al baste ricuardâ pre Albino Perosa e pre Oreste Rosso: animis furlanis metudis di bande par mantignî tes glesiis un repertori di cjants talians che za pape Benedet XVI al jere intervignût “sulle canzoncine devote che si ascoltano ogni domenica in tutte le parrocchie della penisola, quasi sempre desolanti, banali, lagnose o bizzarre, talora ridicole e a volte perfino sbadatamente eretiche” (La Repubblica, 16. 06. 2011).
◆ Pre ‘Sef al à tirât sù e nus à lassât un fi di anime, un dissepul che al è pre Loris De Piere, za retôr dal nestri seminari interdiocesan, diretôr dal Ufici Liturgjic Diocesan e cumò diretôr dal Istitût di Liturgjie Pastorâl “Santa Giustina” di Padue. Al è lui che ogni domenie te glesie di Guart al continue la tradizion lassade di pre Renzo e di pre ‘Sef.
◆ Si spere che al sarà lui che nus puartarà a bon fin la aprovazion dal Messâl par furlan ingredeât tes rêts des burocraziis de Conference episcopâl e dai Dicasteris romans. Come competence e posizion, pre Loris al è l’om plui adat par une opare di mediazion che, insiemi ae presince indispensabile dal nestri vescul bons. Riccardo Lamba, si spere che e puartarà al ricognossiment dal Messâl te assemblee dai vescui dal mês di Mai dal 2025.
◆ In chê dì, ancje pre Renzo e pre ‘Sef, fate justizie al popul di Diu in Friûl, a cjantaran cu la corâl “Rosas di mont” dal Paradîs une cjante gnove e i lôr vues a polsaran finalmentri in pâs tal biel tombâl dongje la lôr amade plêf di Guart. ❚