«Il gno percors al è partît par câs, cu la scuvierte dal Vanzeli
in lenghe furlane di pre Checo Placeran»
Pre Roman Michelot, nassût a Murùs dal 1946, cumò al è Dean di Glesie Furlane, la associazion che e met dongje i predis furlans che e sostegnin il popul furlan. O ai fevelât cun lui di ce che lu à puartât jessi un protagonist de culture furlane e furlaniste.
_
Pre Roman, in ce ambient sêstu cressût?
Intune famee contadine dal dopo vuere, in paîs, li che si fevelave par furlan dapardut, no si fasevisi nancje il lambic se il furlan al jere lenghe o dialet: al esisteve dome chel. In paîs, il talian tu vevis mût di sintîlu dome dal predi in glesie, a messe, insiemi cul latin doprât par dî messe. Pal rest, ancje il predi fûr di chel ambit al fevelave furlan cun ducj. E dopo il talian o ai vût di fevelâlu in seminari, li che o soi jentrât a 11 agns.
_
Parcè la sielte dal seminari? Par studiâ?
Di piçul o lavi in glesie par la dutrine e a fâ il zagut, o fevelavi cul predi, o soi stât inmagât di chel mont e cussì o ai fat chê sielte.
_
E tu sês jentrât te “fabriche dai predis”, cemût che le clamave pre Toni Beline.
Sì, o ai fat 13 agns di studis fin cuant che o soi jessût intal 1963. E li si veve di fevelâ talian par fuarce, al jere il famôs articul 100 li che in seminari si improibive di fevelâ par une altre lenghe che nol fos il talian. Mi visi che al jere cun me un dal gno paîs: puars nô se nus brincavin a fevelâ par furlan fra di nô.
_
E cuant ti ise nassude une cussience plui profonde dal furlan tant che lenghe, dal furlan tant che popul? Isal un fat che te à stiçade?
Eh sì, mal visi ben. Al è stât lei il Vanzeli voltât par furlan di pre Checo. Comprât par câs a Udin li des Paoline, ai 17 di Novembar dal 1970, in Jugn o jeri stât ordenât predi. Lu ai ancjemò achì e o vevi segnât la date e il gno non. E je une biele edizion cu la cuvierte di carton, i ai subit metude la plastiche di chês che si protezin i libris e pense che le ai gjavade par cambiâle juste un pâr di setemanis fa, e jere simpri chê di in chê volte.
_
E cemût ti aial colpît?
E je stade une leture che mi à cambiade la vite. In seminari o vevi let e studiât il Vanzeli ancje par grêc, ma chei studis a jerin tant che il lavôr di un anatomopatolic, la peraule dal Signôr ti rivave midiant de analisi dal test. Il Vanzeli let par furlan al jere une robe che ti vierzeve il cûr, che al dave une dimension umane e duncje profonde de Peraule. E cussì o ai cirût di cjapâ contat cun cui che lu veve scrit e planc a planc o soi jentrât tal grup di Glesie Furlane, li che jerin pre Checo, pre Toni Beline, par me dôs figuris di riferiment, e tancj altris.
_
Chel al è stât l’inizi duncje, ce altris tescj sono stâts impuartants par te?
In chê volte a vignivin fûr tancj libris che son stâts fondamentâi, mi visi di «L’aghe da pît de cleve» di Dino Virgili, o il «Par amôr o par fuarce» di pre Toni. In cjamp de lenghe, la gramatiche di pre Bepo Marchet, che ti faseve viodi che la nestre e je une lenghe di plante fûr, che tu imparavis in maniere empiriche, cul fevelâ, ma che in gracie dal so lavôr tu viodevis che e veve une sô struture.
A jerin timps ancje di cambiament sociâl, cu la Glesie che cul Concili e veve decidût di incjarnâsi di plui tal popul, par esempli bandonant il latin tes celebrazions in glesie e doprant la lenghe dal popul. Par nô di Glesie Furlane al jere il furlan. Mi visi dal biel test «Tornare con la gente. Clero e identità friulana» di Francesca Uliana, li che e intervistave tancj predis di chenti. E fo storiche la Samblee dal clero dal 1975 volude dal vescul Battisti, rivât intal 1973.
_
Une grande iniziative…
Pardabon! Si è tacât a fevelâ no dome di problemis eclesiastics, ma de societât furlane, cun temis su lis servitûts militârs, par vê une Universitât dal Friûl, fâ alc cuintri la plaie de emigrazion che e jere in chê volte… Nô di Glesie Furlane le vin cjapade tant che une ocasion par stâ dongje dal popul, però pecjât che a un ciert pont Battisti, no si sa ben parcè, al cjapà un tic pôre e al frenà dut. Ma mi visi che pre Checo Placerean al disè che no si faseve une robe cussì dai timps di Marquart.
_
Di fat, un altri argoment platât al è la storie dal Friûl, ise vere?
Mi visi tant che une scuvierte la leture de storie dal Friûl di Menis, par esempli. E ancje «Storie dal popul furlan», fat par furlan, di Pietro Londero “Pieri Piçul”, che al à vût scrit ancje «Ristret de storie da l’art furlane», ma che a jerin robis che in seminari no si veve mai fevelât. Londero nus fevelave di Michelangelo o di altris grancj talians, ma nol contave che intant in Friûl a esistevin artiscj tant che Zuan Francesc di Tumieç, il Pordenon, Zuan Pauli Thanner… Eco, une robe stranie e jere che dute cheste int – Menis al insegnave storie de Glesie – dentri dal seminari no fevelave di Friûl e fûr invezit sì, cun studis di gale: une sorte di schizofrenie strambonone!
_
In sumis, lis istituzions a vevin di jessi “italocentrichis”, e dome fûr di chês si podeve fevelâ di Friûl…
Esat, e jere passade la vuere e il fassisim, ma la impostazion e jere restade chê.
_
Un che al fevelave tant di storie al jere pre Checo Placerean, ma par citâle tai siei discors tant che lidrîs pe atualitât e pal futûr dal Friûl…
Vere. Tantis des datis che cumò si celebrin e a son riferiments lis à tiradis fûr lui: il 3 di Avrîl, l’Avôt a Ermacore e Fortunât in Avost, e tant altri. Mi visi che intal 1975 al fasè su Telefriuli un cors di storie a pontadis. Fat sentât suntune bancjute in Zardin Grant a Udin: al jere une gjonde scoltâlu. O vin cirût di recuperâ chel materiâl domandant ae television, ma al è lât pierdût: in chê volte no jerin archivis, magari a tornavin a regjistrâ parsore des cassetis dopo finide la trasmission… Sâstu tu. Ce pierdite!
_
E par chel che al tocje la politiche, par une autonomie de Patrie, cui isal stât impuartant par te?
Il riferiment al è stât simpri pre Checo, che al è stât anime dal Moviment Friûl, no ai mai cognossût Fausto Schiavi (grant leader dal MF, ndr). Placerean al diseve che dome un partît furlan, cun dentri i nestris valôrs culturâi e sociâi, al podeve viodi ad implen des necessitâts de int furlane. «Dome une politiche nostrane e pues seguî la int nostrane».
_
Tu tu seguissis ancje il discors de musiche, li che a esistin particolaritâts di chenti che a jerin pôc cognossudis.
Sì, in particolâr il discors dai cjants patriarchins. Li il model al è stât pre ‘Sêf Cjargnel che al à fat une ricercje massime in Cjargne, stant che là vie si jerin conservâts di plui, che a pandin une tradizion lade indevant par secui e secui. Al à metût adun chest materiâl straordenari tal libri «Canti sacri aquileiesi della tradizione orale». Melodiis e tescj che a derivin de tradizion aquileiese che no si cjatin in altris lûcs, dome in Istrie che e jere sot dal Patriarcjât. Nus disin trop che e jere fuarte cheste realtât, che di jê cumò si sa pôc.
_
Une Aquilee contade tant che dome romane e taliane?
Sì, a son i studis di pre Guglielmo Biasutti, un altri grant om di culture, che a ipotizin la divignince marciane (di Sant Marc, ndr) e alessandrine de glesie di Aquilee, ven a stâi rivade in Friûl “vie mâr” di Soreli Jevât e no di Rome, disvilupantsi tal III secul, ma ancje prime. Une prove e sarès il credo trascrit di Rufin, datât tor dal III secul, ma che al à dentri elements specifics che si riferissin a timps plui antîcs. Gjilbert Pressac si pues dî che al è un so arlêf, puartant indevant la teorie che la glesie di Aquilee e ven di Alessandrie di Egjit. Ma dut chest i gjave centralitât ae glesie di Rome e duncje al cole tal cidinôr.
_
Disimi cualchi personaç o concet che si varessin di cognossi o pandi di plui…
Une prime robe che si fevele pôc e je la fin dal Patriarcjât, par chest o consei di lei «Eutanasie di un Patriarcjât» di pre Toni Beline. Vignesie nus al à robât tal cidinôr di ducj. Seconde robe, dute la storie antighe di Aquilee che si diseve prime, platade pal interès di scuindile di bande sei de Glesie di Rome che dal Stât Talian. ❚
……………………………………………………………………………………
FOCUS. Il personaç
GUGLIELMO BIASUTTI Al nassè a Forgjarie ai 8 di Avost dal 1904. Di divignince umile e contadine, al fo ordenât predi intal 1926, al si laureà in teologjie e in filosofie. Intal 1938 al scrivè un opuscul in favôr dai ebreus, inimicantsi il regjim fassist, e intal 1941 al fo mandât capelan militâr in Russie. Intal dopovuere al è stât atîf intai Comitâts civics e inte assistence ai presonîrs e ai disabii. Om di fede e di culture, in lui si fondevin il religjôs, l’inteletuâl e il citadin impegnât. Intal 1952 al è stât nomenât ispetôr dai archivis diocesans, archivist dal Cjapitul, bibliotecari arcivescovîl.
◆ Il so caratar sclet e cence miezis misuris lu puartà a vê vie pai agns contrascj e incomprensions bogns di puartâlu, dal 1975, a ritirâsi a vite separade dedicantsi ai studis. Grant studiôs di storie de Glesie aquileiese, al à formulât gnovis ipotesis in contrast cun chês di Pio Paschini, che a valutavin che intal cristianisim origjinari di Aquilee al fos une componente fuarte di stamp marcian e judaicocristiane di divignince alessandrine. Al murì a Udin ai 23 di Fevrâr dal 1985 e al è stât sepulît a Forgjarie. ❚
