Preâ par furlan al è onôr e no pecjât

Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon il volum che al è stât prontât di agnorums dai predis di Glesie Furlane daûr des indicazions une vore precisis di pre Toni Beline. E lu à fat “a la maniere taliane”, ven a stâi fasint mancjâ la maiorance cualificade dai doi tierçs di ducj i vescui talians, che e sarès coventade pe aprovazion. Come i parlamentârs, che di solit a àn simpri alc di miôr ce fâ, ancje i vescui, se a àn di sigurâ un dirit ai furlans, a son simpri di une altre bande. Ancje se ur capite, compuartantsi in cheste maniere, di lâ cuintri decisions che i lôr stes coleghis a àn cjapât cetant timp indaûr: par esempli, chê di dâ acet al Lezionari e ae Bibie, fasint deventâ il furlan lenghe liturgjiche cun ducj i crismis. A sburtâ, in chê volte, cuntun pazient e abil lavôr diplomatic, al jere stât bonsignôr Duilio Corgnali che cumò al è stât un dai prins a rimarcâ tant che un scandul il fat che, invezit di concludi chest percors in maniere coerente fasint bon ancje il Messâl, la Cei si sedi indurmidide sul plui biel, cuasi a fânus un dispiet. I vescui a son 226, e a pro dal messâl a an votât 114, cun 50 contrariis e 9 astignûts. Dut câs, o sin ben lontans de maiorance di doi tierç che e coventarès.
Glesie Furlane e à vude une reazion misurade e ferme, disint messe par furlan par “ringraciâ” la Cei no cate la sô malegracie cui furlans. Sul ôr dal Tiliment, alì de gleseute di Sant Jacum di Vilegnove di San Denêl, 400 personis a son rivadis pandint la lôr voie di no jessi bandonadis de Glesie universâl. Intant la Filologjiche e à clamât adun ducj i furlans par fâ un apel ae Cei: e je vignude fûr une robe ben fate, ma “ae taliane”, educade ma un tic lamie e burocratiche, cu la pôre di jessi “masse rivendicatîfs”, pensant che la Cei e scoltarà par sigûr la peraule dai furlans se lôr a domandaran par plasê ce che a spietin za di 17 agns.
Par nô, al continue a jessi il timp de limuesine, dal scugnî domandâ ben planc e par plasê ce che al varès di jessi un dirit e un vantaç pe stesse Glesie, che si è aromai inviade a jessi ecumeniche (e al è pardabon un ben) cun dutis lis minorancis, al di là di ogni gjenar di discriminazion o margjinalizazion. E je une Glesie inclusive cun ducj, ma no cui furlans. Chei no àn ancjemò vude la benedizion. Ma – a sintî il vescul, che si dîs “plen di marum” – se a staran bogns, prin o dopo il contentin ur rivarà.
◆ Za i Venits nus stimavin “boni et fideli furlani”, bogns e cuiets, simpri ubidients. O sarai trist, ma se nol vignarà di corse un sì al Messâl, salacor al vignarà ancje chi il timp de disubidience. La Glesie di chenti e je za stade schismatiche: se al baste preâ inte nestre lenghe par jessi scomunicâts, forsit cualchidun si visarà di chê resistence no violente che za tal timp dai Trê Cjapitui i Patriarcjis a vevin metût in vore, e al fasarà capî a Rome che e je in tuart. Par esempli, se pe Glesie çoncjâ une lenghe nol è pecjât, cualchidun che le fevele al podarès vê voie di çoncjâ il 8 par mil che fin cumò i lassave. No je dome une cuistion eclesiastiche: si fevele de dignitât di chel popul che Diu al à sgnacât su chel toc di tiere clamât Friûl. ❚