In ocasion de fieste dai Patrons di Udin e dal Friûl Sants Ermacore e Fortunât, il mês passât la Provincie di Udin e à ricuardât pre Antoni Beline che chest an a son dîs agns de sô muart. E lu à fat presentant il dvd Testemoneancis di pre Antoni Beline, fat in colaborazion cun Videotelecarnia. Une ore plui o mancul di filmât là che e je racuelte une interviste, o miôr une fevelade, fate di Celestin Vezzi intal Març dal 1997, là che pre Toni al conte il so rivâ «plen di sperance ma ancje di pôre» e la sô esperience di predi inte parochie di Sant Martin di Rivalp-Val di Darte e Treli (frazion di Paulâr) dulà che al è stât ancje mestri. Pre Toni al conte ancje de ativitât di Glesie Furlane, de domande de Universitât, de traduzion de Biblie par furlan, de colaborazion cul nestri mensîl La Patrie dal Friûl, dal caratar dai furlans, des dificoltâts de Cjargne tra crisi economiche e dispopolament.
A inricjissin la interviste “pirulis” finâls là che pre Antoni Beline al sclarìs cierts concets tant che omologazion, identitât, lidrîs, lenghe, patrie.
Letare pe aprovazion dal Messâl. «O vin volût visâsi pre Toni midiant de sô vôs e dai siei concets» al à afermât il president de Provincie di Udin Pieri Fontanini dilunc de presentazion. Fontanini al à anunziât di volê inviâ une letare al gnûf president de Conference episcopâl taliane, il gardenâl Gualtiero Bassetti, propit par solecitâ la aprovazion definitive dal libri liturgjic de Eucaristie in marilenghe, il Messâl, «un altri lavôr impuartant di pre Antoni Beline, che al è daûr a spietâ di agns che al vegni fat bon dal Vatican».
✒ Redazion