La topografie miscliçade e riflet une identitât a trê cjâfs, come la spice de Mont Terglou
Prime che a rivassin i Talians, daspò de Prime vuere mondiâl, no si clamave “Cave del Predil”. Pai Furlans e je simpri stade Rabil, pai Todescs Raibl e pai Slovens Rabelj. Mi plâs partî di ca, par chest itinerari che nus puartarà a cognossi miôr e a esplorâ il Friûl di Soreli jevât. E je une sielte che mi pâr significative. Parcè che chest lûc mi somee simbolic in maniere straordenarie. Propit tacant de sô topografie, tant miscliçade di pandi la anime plurâl e instreçade dai Furlans di chenti, che par secui si son rapuartâts cun chês altris culturis stratificadis sul nestri teritori par miârs di agns, intun profîl plurâl che nus conte ben il spirt de frontiere. Di cheste frontiere in particolâr. Chê linie discontinue e naturâl, rote e mai continue, là che l’Uman, cun dutis lis sôs espressions, e la Nature si incuintrin prime che un confin maledet – par solit decidût di int che e vîf lontane, a Viene, a Lubiane, a Rome, a Londre o a Parîs, e segnât cul sanc di chei che invezit lu abitin di simpri! – al vegni a separâ e a dividi ce che al è simpri stât tignût insiemi dal dirit des Nazions. A meti ordin, duncje. Copant la libertât. Eh sì, parcè che se za il Friûl al è un teritori incalmât sul ôr di tantis prospetivis diferentis, cheste sô part periferiche, cuasi une spice fate di crets, valadis, aghis e boscs, une lenghe che e leche insiemi Friûl, Carinzie e Slovenie, e je di sigûr la sintesi perfete di une cundizion uniche, privilegjade ma ancje dramatiche, che intai secui passâts e à rapresentât pardabon intal stes moment une ricjece, ma che e je stade ancje ocasion di scuintris, di lotis, rivendicazions e scjafoiaments di chel spirt identitari che si ricognòs inte complessitât e che si alimente cul confront. A pene fûr dal confin atuâl cu la Republiche di Slovenie, nancje passât il pas principâl, si cjate la antighe strade patriarchine che di chi e smontave jù, rivant fin a Gurize e lant daûr dal cors de Soča/Lusinç. Pal prin toc, la aghe che le compagne e je chê de Kortinica, che e cjape il non di “cortine”: confin, apont. Il piçul borc di Mude al è pôc dongje, propit a contânus che une volte li e jere segnade la “dogane” (chest al vûl dî il so toponim) che e divideve i teritoris dal Patriarcje di Aquilee di chei dal Vescul di Bamberg, il princip che al dominave su dute la Valcjanâl. Par secui, tacant fintremai de ete preromane, la panze de tiere culì e à produsût zinc e plomp, materiâi di impuartance straordenarie. E duncje e je stade sfrutade par miârs di agns come miniere. Une gjave, e di li al ven il non par talian. Chest puest al è simpri stât considerât magjic e sacrâl dai popui che lu àn abitât, dal moment che il Mangart, che al vegle propite parsore dal vilaç, al cjape il non di “Mond”, ven a stâi “lune”, e di “Garten”, che al sarès “zardin”. Il zardin de lune, duncje, templi antîc di rituâi che i nestris antenâts a praticavin intune dimension cosmologjiche profonde, li che Cîl e Tiere si incuintrin simpri par mostrâ ai Oms il viaç misteriôs de vite. No masse lontan, si alce sù cu la sô maraveose muse di piere la Mont Terglou, o ben il Triglav, che par sloven al vûl di “trê cjâfs”: propit come il grant diu venerât in dute la Europe slave, de Russie fin a Praghe e sù in Polonie, Svetovit, il potent Siôr de Lûs sante. I storics a pensin che dute cheste regjon e fos stade duncje une specie di grant templi naturâl, un santuari cosmologjic là che si podeve celebrâ il cercli misteriôs dal timp, il cjant des stagjons, cjalant cemût che lis stelis dal cîl, il soreli e la lune si disponevin a formâ lis lôr gramatichis inte alternance di scûr e di lusôr. La storie dai grancj events e je passade par chi. Lis galariis des minieris a son stadis dopradis dal esercit austroongjarês e di chel todesc par fa passâ i soldâts intal Otubar dal 1917 che, no viodûts, a cjaparin di sorprese i “regnicui” talians, contribuint al esit de grande bataie di Cjaurêt: une disfate pal esercit savoiart, la ultime vinçude di chel imperiâl. Chi la resistence cuintri il fassisim e je stade fuarte, tacant dai agns ’20: e passave ancje pe lenghe, chê furlane e chê slovene, tabaiade tes stalis, sul lavôr dûr des malghis o dai menaus, fin dentri dai budiei de miniere. Si resisteve ancje cussì ae matetât nazionalistiche dal regjim. Forsit ancje par chest, partigjans e naziscj, fassiscj e titins si son scuintrâts ancje cun plui crudece che no di altris bandis sui trois di chestis monts. Finide la grande burascje des vueris mondiâls, cheste tiere no à vût pâs. Segnade di un confin politic potent, che al partive di Danziche e che al spacave la Europe in dôs parts come che e fos un miluç, e à continuât a jessi regjon di separazion dolorose. Ma bisugne dî che la costumance antighe de int che e viveve in chestis borgadis, la abitudin di miscliçâsi e di cognossisi par miârs di agns, e à fat in mût che ancje intal timp scûr che al cjape il non di “Vuere frede”, cuant che l’Ocident al smicjave di brut – e cetant ben ricambiât! – la Jugoslavie di Tito, che si slargjave di chê altre bande de “sbare”, al fos pussibil movisi libars, cence masse dificoltâts, di une bande a di chê altre. Sigûr, a jerin soldâts, finanziots, vuardiis. Ma no baste mai une divise e un fîl spinât a fermâ la Storie. A jerin in tancj i furlans che “a lavin di là” a cjatâ parincj e amîs, e ancje i “Jugoslâfs” che a passavin di ca. Une sdrume di lôr a lavoravin inte miniere, stant che a jerin operaris “transfrontalîrs”, prime ancjemò che cualchidun al inventàs cheste maniere par definîju. O pensi che la dimension plui fondante di chest piçul paîs alpin e seti duncje stade, di simpri, chê de fadie, che si lee tant ben a une fuarte identitât. Parcè che bisugne jessi dûrs par spacâ il cûr de mont, ma no tu puedis fâlu cence chê cjame di solidarietât che ogni comunitât di minadôrs e à simpri vude tant che componente essenziâl dal so jessi. Dal moment che ogni famee, ca sù, e à cualchi muart intal cimitieri, copât de miniere. La ultime grande lote operarie di une Italie che si dismentee masse svelte ce che al sucêt des nestris bandis, le àn fate propit lôr. Cuant che cualchidun al à decidût di sierâ, tal 1991, lôr si son trincerâts tal fonts. A àn resistût fin cuant che a àn podût. Disesiet dîs, disesiet gnots. Tant, là sot, nol cambie. Cualchidun al dîs che tal cidinôr, cuant che il rest dal mont al durmive, si podeve rivâ a sintîju cjantâ, sot des lidrîs de mont. Cuissà mai in ce lenghe che lu varan fat? ❚
