Nissune gnove ni dal Guvier ni de Rai.
Devant di chest imobilisim sflacjon e mufulît,
un grup di sindics de Assemblee de Comunitât linguistiche furlane
al menace une azion legâl
Cuant che si cjatisi a vê a ce fâ cun codiçs linguistics diferents al pues ancje sucedi di stracapîsi, massime cuant che no si dâi masse abade a chel che nus sta denant o si intint di tignîlu sot scorie, parcè che stimât inferiôr. Cussì, a nassin fraintindiments che a puedin ancje deventâ ocasion di contrascj jenfri lis diviersis realtâts, cemût che al è sucedût te epoche colonialiste tra Italie e Etiopie cul tratât di Uccialli, indulà che, par vie di une traduzion che e dave spazi a interpretazions diferentis, il nestri stât al veve cirût di dâi capot a chel dal negus, che però al veve nasade in curt la ferade.
Magari cussì no, no covente lâ tant indaûr te storie e ator pal mont par cjatâsi denant di câs inmò plui stramps e paradossâi. Tant par restâ te nestre regjon, al baste cjalâ ce che al sucêt cu la presince des lenghis minoritariis (ma forsit al sarès plui just fevelâ di lenghis minorizadis) tes telecomunicazions, viodût che, daspò 20 agns, la leç 482 dal 1999, aben che scrite in lenghe taliane, no je ancjemò stade ni intindude ad implen dal nestri guvier, ni metude in vore.
Tal Istât dal an passât, si jerin lassâts cu la aprovazion di bande dal Consei regjonâl di une mozion presentade dal grup conseâr dal Pat pe Autonomie, indulà che si domandave un rinfuarçament des sedis periferichis de Rai regjonâl, di mût di garantî un servizi public plui eficaç e inlidrisât sul teritori, cuntun voli di atenzion pes trasmissions in lenghe furlane. Po e je rivade une altre mozion in Consei regjonâl par vê programs televisîfs par furlan. Ma fin cumò, de antenone di vie Carati, indulà che si cjatin i uficis di Udin, no si à ancjemò viodude rivâ anime vive, anzit, cheste situazion e somee simpri plui simile al desert dai tartars di Buzzati, cuntune spiete che si sta slungjant tal timp cence produsi nissun cambiament.
Forsit a Rome no àn ancjemò capît che no sin plui ae fin dal Votcent, cu la int pleade des faturis e de sotanance, analfabete e ignorante dai siei dirits, o magari, no àn ricognossude la impuartance dal plurilinguisim tant che valôr, ma ancje tant che ricjece e risorse. Al va dite che ancje nô furlans i vin dade man fuarte a chest ategjament, cence mai cjapâ pardabon une posizion fuarte. La sgrifade e il berli de acuile, dut câs, a son rivâts di bande di un grup di sindics che, no vint vude nissune rispueste ni di bande dal Guvier ni de Rai, stufs di chest imobilisim sflacjon e mufulît, a àn cjapade la peraule ai 26 di Zenâr intune conference stampe te sede de Regjon a Udin, par domandâ un miorament dal servizi e i fonts pes trasmissions in lenghe furlane, daûr di ce che za al ven fat pe lenghe slovene. Tal câs contrari, i aministradôrs a intervignaran cuntune azion legâl.
Ae vuide di chescj “paladins” o vin cjatât Diego Navarria, sindic di Cjarlins e president de Assemblee de Comunitât linguistiche furlane, che di cuant che e je nassude si môf a pro dai dirits de nestre minorance, cence però dismenteâsi dal aspiet plurilengâl de nestre regjon, indulà che storichementri a convivin la lenghe taliane, furlane, slovene e todescje.
__
President, cheste conference e dimostre une sensibilitât fuarte di bande dai sindics furlans.
«O vin tacât a movisi te Sierade dal an passât, cuant che, ai 23 di Otubar, e je stade mandade une letare al president de Rai, al diretôr gjenerâl e ancje al diretôr de sede regjonâl. Intune setemane, la note e je stade firmade di 76 sindics, ma a podevin jessi une vore di plui, stant che tancj di lôr nus àn dade la lôr poie tai dîs seguitîfs».
__
La vuestre domande, dut câs, e devi jessisi pierdude par strade, stant che no vês vude rispueste…
«Te note, si domandave di garantî azions concretis pe tutele e pe valorizazion des lenghis furlane e todescje tai programs radiotelevisîfs, cuntune informazion plui ecuilibrade su dut il teritori regjonâl. Magari cussì no, no si è fat sintî nissun, nancje di bande de politiche. Al è par chest che o vin metude in pîts cheste iniziative, parcè che se cu lis buinis no si rive a otignî nuie, bisugne deventâ triscj e clamâ in cause ancje i avocats. O vin za individuât cui che nus supuartarà te azion legâl, che o sin daûr a studiâ».
__
Ae conference stampe dai 26 di Zenâr, però, la presince politiche de nestre regjon e je stade une vore flape.
«E je vere. O vin ricevût i messaçs di cuatri parlamentârs (Mario Pittoni, Aurelia Bubisutti, Guido Germano Pettarin e Tatjana Rojc) e dal deputât Daniele Moschioni, che a àn dade la lôr disponibilitât a vignînus incuintri. De zonte regjonâl nol jere nissun, dome i conseîrs Massimo Moretuzzo, pal Pat pe Autonomie, e Diego Bernardis, pe Leghe. In efiets, e jere une zornade cun tancj altris events ator, ancje i sindics a jerin impegnâts in altris manifestazions. Però al è stât un segnâl scjarsut di rapresentance».
__
Par cumò, la lenghe furlane e je presinte cun 90 oris di programazion radiofoniche par an. Ce proponêso voaltris?
«Ce che o vin cumò a son fruçons, se ju metìn a confront cu lis 4517 oris di programazion radiofoniche e lis 208 di television in lenghe slovene. Che al sedi clâr, chel che la minorance slovene (che e à ancje une sede di pueste pes trasmissions) e je rivade a otignî al è just, noaltris o domandìn di vê almancul il stes numar di oris, viodût che o sin la minorance linguistiche plui presinte in regjon. Te stesse maniere, si domande un rinfuarçament dai uficis di Udin, che a àn di deventâ la sede centrâl pai teritoris di lenghe furlane e todescje. La convenzion e scjât ae fin di Avrîl, se no si fasìn sintî cumò, o lin a risi di no saltâ plui fûr di cheste discriminazion».
__
Cualchi an indaûr, però, e jere stade fate cualchi trasmission televisive in lenghe furlane, cu la poie de Regjon.
«No à di jessi la Regjon a meti i bêçs, ma ben il Guvier centrâl e la Rai. Ce che al jere stât fat al leve cuintri de leç 482, che e dîs che la Regjon e pues integrâ cun fonts siei, ma no à di fâ une azion sostitutive di chê dal Stât. Cun di plui, bisugne tignî cont dal fat che la Rai e cjape bêçs ancje cui abonaments televisîfs che i furlans a pain ducj i agns: e podarès ancje meti in vore chescj progjets in autonomie, cuntune azion virtuose a pro dai siei abonâts».
__
Sui social a son saltadis fûr tantis vôs. Cualchidun us à criticât par vie che cheste no je une prioritât.
«Si sin fintremai sintûts dî che o vivìn ancjemò te Ete di Mieç. Il probleme al è ben plui seri: cuant che si cres cuntune imposizion nazionaliste, lis minorancis a vegnin metudis in bande e tignudis tant che element di folclôr e di pôc valôr, fasint crodi che cui che nus sta dongje al sedi un nemì (slovens e todescs). Al baste viodi il davoi che al è saltât fûr par chê ufierte di lavôr li che si domandave la cognossince de lenghe furlane. Nô o crodìn che la diversitât e sedi un valôr zontât, une oportunitât. Par fortune, o viodìn che la int e je daûr a cjapâ simpri plui cussience di chest e o lin indevant a scombati la nestre bataie in fuarce di cheste convinzion». ❚
Serena Fogolini
