Ravasclêt. Aziende agricule di Edda De Crignis

Decime e ultime fie di une grande famee, femine minude e di pocjis peraulis, cjavei neris peâts, mans grandis e segnadis dal lavôr dûr: cussì si presente Edda De Crignis di Ravasclêt.
Edda e à une aziende agricule indulà che e tire sù vacjis (cualitât grise alpine) e pioris di arlevament e e gjestìs il comprensori des malghis Riu Mal Crasuline (250 etars di teritori).
––
Edda e je nassude cu la passion pe campagne e pes vacjis.
“I miei a vevin vacjis – e conte -. Di piçule o jeri une paurose e cuant che mê mari e lave a rezi aes 4 di buinore mi menave daûr e mi meteve a durmî tal trasêf. Tai agns 80, cuant che il gno om si è malât, o ai cjolte une cjavale par provâ la ipoterapie. E je stade une esperience impuartante che lu à judât a saltâ fûr dal so probleme. Vê une bestie di viodi 24 oris su 24 ti puarte a no pensâ dome al to mâl. La fatorie sociâl, come che le clamin vuê, par cui che al à problemis ti da une grande man. Dopo o ai cjolt inmò cualchi cjaval, cu la idee di fâ un agriturisim, ma no ai cumbinât. Dopo e je stade la volte di un roc e di une piore, dopo di une vacje e di une manze. Vuê o tiri sù manzuts e agnei e ju vent ai comerciants che però a pain pardabon pôc. Tra vacjis, vidiei e manzutis a ‘nd ai uns 60, plui 80 pioris e 4 cjavalis. Insome, o ai une biele aziende di bestiis ma o podevi fâ altris robis che no ai podût realizâ. Dal mês di Lui al mês di Otubar a van in mont e di Invier lis lassi culì, indulà che o vîf. Chest an, lis pioris a son a passi inte Basse.”
––
Dal sigûr, il lavôr di Edda al è un grum impegnatîf e plen di sacrificis:
“Si lu fâs dome par passion. O ai i contribûts de CEE che cun lôr o rivi juste a comprâ il fen par mantignî lis bestiis. Mi cjapi cualchi ore te zornade, se di no il lavôr al è di lunis a lunis, fieste e dîs di vore. Dopo al è simpri alc di viodi: une vacje che e sta mâl, un vidiel di passi. In plui, al tocje adatâsi a fâ alc di dut: dal veterinari al mecanic. Al tocje rangjâsi ancje a comedâ il tratôr, se tu vûs doprâlu subit: se tu vadis dal mecanic e covente une setemane par che tal metin a puest. Considerât che o sei un pôc fûr dal mont, il veterinari no simpri al cumbine a vignî, e magari o cor il pericul di pierdi la bestie, cussì ce che o pues o fâs.”
––
Al è dificil ancje rivâ a tignî in vite une aziende agricule, parcè che e je tante la burocrazie “che ti smonte di fâ. Cuant che mi nas un vidiel, in 10 dîs lu ai di comunicâ ae ASL, regjistrâlu, fâ il passepuart e meti i rincjins. Compagn se mi nas une piore: tocje meti il rincjin e il timbri te panze. Di chest an, o ai scugnût declarâ ae ASL ancje lis gjalinis. Se mi mûr une vacje o scuen mandâle a brusâ e duncje e devente une spese. Il supuart tai paîs nol è plui: se mi è daûr a nassi un vidiel e no lu rivi a tirâ fûr, no pues clamâ nissun parcè che a no ‘nd è int. Chei cuatri restâts a son o vecjos o masse zovins, e no san cemût fâ. Cui clamistu? Tu ti cjatis in dificoltât. Par fortune, o ai une sûr che mi da une man.”
––
Edda il doman de Cjargne lu viôt neri ma forsit no si rint cont che propit jê e da dimostrazion che, pûr cun dutis lis dificoltâts, nol è nuie di impussibil di puartâ indevant ancje se cun tancj sacrificis. ❚
Marta Vezzi