Timp pe preparazion: 45 minûts – 1 ore
Ingredients par cuatri personis
(par doi se al è il plat unic): une faraone taiade in tocs, un par di ets di cjastinis, une fete di panzete o ardiel, osmarin, vin blanc, sâl e pevar.
SI FÂS CUSSÌ
Meti a lessâ un trop di cjastinis: gjavâi vie la scusse dure maron, butâlis te pignate cuant che le aghe (salade e cun tune fuee di orâr) e tache a boli, lassâlis cuei par 20-30 minûts (al dipent de grandece, miôr gjavâlis cuant che e son “al dente”). Gjavâi la pielute restade: metudis sot de aghe frede curint e ven vie in un moment.
In tune pirofile poiâ i tocs di faraone pinelâts di spongje (par difindile dal cjalt dal for cun tun vêl di gras), e cualchi tocut in plui di spongje sul font. Po dopo zontâ lis cjastinis, osmarin a plen, une biele grampe di pevar, une sedon di batût di ardiel, un tic di sâl e 2-3 tacis di vin blanc. Meti intal for a 200°, par un 30-45 minûts (al dipent di trop che a son grancj i tocs de faraone). I vûl che il tocjio al deventi un tic fis e la cjar dal poleç ben cuete, che si stachi dal vues. Ae fin, 5 minûts in modalitât gridele, par fa suiâ un moment la croste de faraone, e po dopo meti dut intal plat di corse: cjâr e tocjio. Dongje, miôr alc di amâr (lidric o cicorie) cun un tic di garp di asêt (no cartufulis, che lis cjastinis a non bielzà farinosis avonde) e no carotis o cesarons, masse dolçs par un plat che al è bielzà dolç di bessôl. ❚
Margherita Meggy Timeus