Ricors cuintri dal Italicum, la leç eletorâl che e fâs dam al Friûl, tal cidinôr di ducj

Al è stât il prin a fevelâ dal Italicum tant che di un probleme politic: za tal mês di Mai dal 2015, cuant che nissun ancjemò al fevelave di chest argoment, Federico Simeoni al à presentât in consei provinciâl un ordin dal dì che al fevelave “di une discriminazion injustificade de minorance linguistiche furlane”. E cumò, tal cidinôr di dutis lis fuarcis politichis che no rivin a justâ i dams evidents che cheste leç eletorâl e provocarà ae rapresentance dal popul furlan, il conseîr autonomist di Palaç Belgrât (vicin al moviment Patrie Furlane) al à decidût di passâ a une forme diferente di azion: un ricors. “O larìn al Tar par sostignî fin da pît la nature incostituzionâl e discriminatorie di une leç che e je une violazion no dome dal dirit talian ma ancje di chel european. Di fat, la Convenzion pe protezion des minorancis e previôt che i Stâts che le sotscrivin no ledin a diluî la concentrazion des minorancis in tiermins eletorâi, parcè che e va tignude di cont e sigurade la lôr rapresentance politiche”.
FRIÛL CREVÂT IN DOI
Chest al è propit il contrari di ce che al è sucedût cul Italicum “che al à çoncjade in doi la comunitât furlane”, crevant pal mieç il Friûl storic e ancje la cussience identitarie di une popolazion che forsit le steve za pierdint di bessole. “Ma a colps di leç, di Macroregjons e di citâts metropolitanis taiadis su misure par Vignesie o par Triest, il procès di distruzion de identitât furlane che il centralisim roman al sta puartant indevant al sta lant pardabon masse di corse”. Il Friûl al riscje “di jessi scancelât”, di pierdi no dome la specialitât, ma la democrazie: “par chest, o ai domandât il jutori par une azion legâl di Felice Besostri, za parlamentâr e pari dal ricors cuintri dal Europorcellum che al jere un altri element di lesion de rapresentance democratiche des minorancis”. Ma alì a jerin dutis lis comunitâts a jessi penalizadis: cumò e je une situazion diferente “parcè che Trentin e Sudtirôl di une bande, la Val d’Aoste di chê altre, a àn vût rapresentants che a àn difindût i lôr dirits e a àn otignût garanziis di vê une componente di minorance a Montecitorio. I nestris parlamentârs invezit a durmivin e si son sveâts masse tart, cuant che il purcit al jere aromai scjampât dal cjôt”. Risultât: i furlans a podaressin no rivâ a vê nissun parlamentâr. E Simeoni par chest al veve domandât al president de Provincie Pieri Fontanini di puartâ indevant une rivendicazion cu la Regjon e cul Stât talian par denunziâ la ilegalitât dal proviodiment: “ma no vin rivât a otignî nissun risultât. I parlamentârs dal Pd, ma ancje chei de Leghe tant che Massimiliano Fedriga, a tegnin plui a favorî la lôr ricandidature che a oponisi a cheste leç disgraciade”. Dal rest, in Venit e fintremai in Trentin, al spieghe Simeoni, “la Leghe e je favorevule ae Macroregjon”.
EMERGJENCE
“Come singui eletôrs che a son stâts deprivâts dai lôr dirits, jo e ducj chei che a volaran fâlu – al siere il conseîr provinciâl – o presentarìn duncje un ricors al Tar par ribati che no si passe parsore de nestre identitât. O rivarìn in Cort Costituzionâl se al covente, ancje se la operazion e sarà costose e a voli i bêçs par cheste operazion o varìn di tirâju sù cul contribût di ducj chei che a volaran judânus”. Pal moment l’interès dai furlans su cheste tematiche nol è cuissà ce: “si viôt cheste leç tant che un probleme tecnic, a tancj no ur somee une robe masse impuartante. Invezit e je une emergjence democratiche, se lis decisions sul nestri teritori a vegnin cjapadis cence une nestre rapresentance ma dome dai oms catapultâts dai partîts di Rome”. ❚
✒ Walter Tomada
Par cui che al vûl contribuî a lis spesis pal ricors, al è un cont corint di pueste cul iban: IT 96Y 08375 63710 000000 708611 intestât a “Patrie Furlane”. Segnâ la causâl “Ricorso Italicum” insiemi a non e cognon e comun di residence.