7. Conclusions
Duncje Gjesù di Nazaret, come tancj altris ebreus, al è stât in ecuilibri tra une vision “identitarie” ebraiche e une vision “universalistiche”. Il moviment ebraic che al à cjapât vite partint di lui, ven a stâi chel che al è stât clamât cristianisim, al à vût une propulsion cussì universalistiche che chei altris ebreus no àn volût ricognossilu come part dal ebraisim.
Di chê altre bande, la focalizazion su la Leç, su lis regulis di separazion dai “vêrs” ebreus rispiet a ducj chei altris, insiemit al studi de Bibie ebraiche e a la proibizion dai matrimonis cui no ebreus a àn puartât il popul ebraic a sorevivi, cence Stât e cence il Templi, par plui di 2.000 agns.
Cemût puartâ chestis riflessions inte situazion furlane di vuê? La globalizazion rapresentade dal mût di vivi dai americans, de imigrazion meridionâl e extracomunitarie, de television taliane e par finî de lenghe inglese e di internet nus àn puartât sul cei di un anientament culturâl! Cemût rispuindi a cheste situazions cussì complicade? Nissun lu sa.
Forsit la strade juste e podarès jessi chê di sostignî i “valôrs identitaris” cun fuarce, onestât e eficience politiche culturâl. Prime di dut, bisugnarès cjapâ sù la cussience di jessi une nazion (alc di plui di un individui), daspò bisugnarès, cence machinazions e bassecis personalistichis o politichis, produsi robis buinis a nivel organizatîf e culturâl che a incressin chê che o ai clamât braure furlane. Tal stes timp, nô no podìn no vierzisi a une vision dal mont universalistiche, cognossi lis lenghis, doprâ i struments di cognossince e di comunicazion che il mont al à metût a nestre disposizion. Duncje, a peraulis la cuestion di cemût salvâ l’identitât furlane e pues someâ avonde facile, ma tai fats nol è propit cussì. ■
Franc Fari – de Universitât dal Friûl