Fin cumò i fats a mostrin ritarts e mancjancis intal meti in vore la leç regjonâl pal furlan
La letare che il segretari politic dal Moviment Friûl, Marco De Agostini, i à indreçât al president de Regjon Renzo Tondo par stiçâ l’esecutîf regjonâl a impugnâ la leç statâl di revision de spese e à il mert di vê riclamât la atenzion, ancje se dome par cualchi zornade, sul teme de lenghe furlane. Cence jentrâ intal mert dai diviers intervents che chê letare e à stiçât, la maniere plui semplice par capî a ce pont che o sin cui intervents a pro dal furlan e je chê di viodi se e trop che la leç regjonâl 29/2007 e je stade metude in vore.
PLANS DI POLITICHE LINGUISTICHE_ Daûr de leç, lis prioritâts di intervent a vevin di jessi fissadis par mieç di un Plan Gjenerâl di Politiche Linguistiche de durade di cinc agns e dai Plans anuâi pes prioritâts di intervent svilupâts de aministrazion regjonâl, e dai Plans Speciâi di Politiche Linguistiche che i diviers ents a vevin di dâsi. Par chel che o savìn nissun di chescj plans al è stât fat bon. La Zonte regjonâl e veve ancje di presentâ ogni an in maniere publiche une relazion sui progrès intal aplicâ la leç, ma nissun lis à viodudis.
SCUELE_ Par inviâ in maniere continuative l’insegnament dal e par furlan, la leç e domandave un regolament cul plan operatîf di sisteme pes scuelis, un altri par fissâ lis competencis dai insegnants, e la istituzion di une Comission pal insegnament de lenghe furlane. Se cheste ultime e je stade metude sù tal 2010, i doi regolaments si ju à vûts dome a cjaval tra 2011 e 2012, cul risultât che il prin an là che la leç e tacarà pardabon a jentrâ intes scuelis al sarà il 2012-2013, ven a dî passe cuatri agns e mieç dopo de aprovazion de leç. Si à dite che il ritart al dipent de impugnazion dai articui de leç su la scuele denant de Cort Costituzionâl, la decision de Cort e je però dal Mai dal 2009 e duncje, ancje se e fos vere, i agns di ritart a saressin almancul trê.
CERTIFICAZION LINGUISTICHE_ Tra i imprescj di fonde par meti in vore une politiche serie pe lenghe, la 29/2007 e previôt ancje la certificazion linguistiche. Mûts e criteris par otignî la certificazion a vevin di jessi fissâts dentri di 6 mês cuntun regolament regjonâl che invezit nol è ancjemò jessût. No si sa nuie nancje dal regjistri dai volontaris pal insegnament de lenghe furlane che al varès vût di jessi metût sù alì de ARLeF.
MIEÇS DI COMUNICAZION_ Ancje pai intervents a pro dal furlan intai mieçs di comunicazion la Regjon e veve di dâ fûr un regolament, ma lu à fat dome sul finî dal 2011, dopo di une campagne di proteste leade al azerament, par doi agns di file, dai fonts pai programs radiotelevisîfs par furlan. Tal stes an la Zonte e à tornât a meti i bêçs su cheste vôs, ma ridusûts di un cuart rispiet a prime. Tal 2012 invezit lis pratichis a son blocadis di 7 mês e intal ripart complessîf si à smiezât i fonts pai sogjets plui atîfs pal furlan, o sei lis radios. No si à po di dismenteâ che il regolament aprovât al fronte dome la part dedicade a radios e televisions, ma al lasse fûr cjarte stampade e internet.
La 29/2007 e previôt ancje che la Regjon e finanzii, in maniere proporzionade ae lôr ativitât, i sogjets indotâts di une organizazion stabile che a davuelzin une ativitât cualificade e continuative a pro dal furlan. Lis promessis dal esecutîf regjonâl di fissâ dai criteris obietîfs par definî chescj sogjets e par ripartî tra di lôr lis risorsis a restin letare muarte. Si à po di dî che tai ultins agns la Regjon e à sbassât lis risorsis par chescj sogjets cun tais fats in maniere orizontâl, ven a dî cence tignî cont de proporzion tra lis variis ativitâts davueltis.
AGJENZIE REGJONÂL_ Cundut che la ARLeF e ven indicade tant che riferiment pe politiche linguistiche, ta chescj agns si le à viodude dispès in dificoltât par vie de precarietât dal so personâl. Invezit di frontâ chest probleme però, l’esecutîf regjonâl al à dome modificât il statût de Agjenzie cul risultât primari di rindi il Comitât Tecnic Sientific un organisim a clamade, cence nissune capacitât propositive reâl. Daûr de leç, par fissâ lis liniis de politiche linguistiche, la ARLeF e varès di vê il jutori di une Comission pal ûs sociâl de lenghe furlane, che però il president de Regjon nol à mai nomenât.
UFICIS REGJONÂI_ A ingredeâ inmò di plui la situazion al è il fat che, intai ultins agns, si à ancje ridusût al vues il personâl di chel che al jere il Servizi regjonâl pes identitâts linguistichis e si à dividût lis competencis su la lenghe furlane jenfri doi assessorâts regjonâi. Cun di plui une part des risorsis e ven passade drete aes Provinciis che a van ognidune pe sô strade, al pont che chê di Pordenon e à metût i bêçs pal furlan su altris setôrs. Al è duncje evident che un dai elements di fonde par une politiche linguistiche eficiente, ven a dî il coordenament dai intervents, al mancje dal dut.
Par leç, prime di jentrâ tai ultins sîs mês de legjislature, il president dal Consei regjonâl al à di clamâ dongje une Conference par controlâ se e cemût che e ven metude in vore la 29/2007. Ai 27 di Avost il president al à fat savê cheste Conference si tignarà dentri de fin dal an. E pues jessi la ocasion juste par sclarî, di là des cjacaris, cuâi che a son i fats vêrs. Fats che a disin a clâr che si à fat masse pôc e ancje chel tart. ■
Carli Pup
