Chest an a colin i 50 agns de disparide dal mestri gurizan dal violin
Tra i tancj inovâi di musiciscj e compositôrs che o vin gust di ricuardâ in chest an bisest, un altri che al merete une cierte atenzion al è chel dal violinist, compositôr, docent e diretôr di orchestre gurizan Rodolfo Lipizer. A son cincuante agns che al è disparît chest fi di art nassût a Gurize ai 16 di Zenâr dal 1895 e muart simpri te sô citât di nassite ai 8 di Jugn dal 1974.
Une cariere, la sô, une vore particolâr, tacade intune tiere no ancjemò taliane, e finide cun lustri internazionâl che inmò vuê al fâs lûs ancje graciis al concors di violin che i àn dedicât: il Premi Rodolfo Lipizer, che chest an al rive ae sô edizion numar cuarantetrê.
◆ Rodolfo al à tacât a sunâ in etât cree, stiçât dal pari che al jere un liutâr preseât, erêt di une maestrie tal costruî violins di dissendence antighe, chê dai Pelizons, tra chês plui rapresentativis dongje dai Guarineri, dai Montagnana, dai Serafin, ducj artesans deventâts siôrs cul fâ struments musicâi de famee dai arcs.
Lipizer al à vût di rangjâsi za di piçul, tant che zovine promesse dal violinisim, par vie che al veve pierdût i gjenitôrs che nol veve inmò la etât maiôr, e cussì al à scugnût inzegnâsi une vore par tirâ sù ancje i siei doi fradis e la sûr, plui piçui di lui. Intant che al studiave, vint come mestris Erminio Bovi e Alfredo Lucarini, il secont alt rapresentant de scuele napoletane, al sunave dentri de orchestre dal Teatri Verdi de citât, in orchestrutis di ocasion e ancje in Domo par cjapâ un franc e podê cussì disfamâ se stes e la famee. Studiôs e plen di dedizion, si à formât inte Civiche Scuele di Musiche, e al è rivât ancje a otignî la maturitât ae Staatsoberrealschule di Gurize e cun chest titul, tal 1914, al è partît à Viene par restâ un an cun chê di perfezionâsi tal violin ae Staatliche Hochschule für Musik. Chi al à vût grancj mestris, come Hugo von Steiner, Gottfried Feist, e tant par no fâsi mancjâ nuie, vie pe sô formazion al à studiât ancje inte Universitât de capitâl austriache, frecuentant i cors di filosofie e siencis musicâls di Guido Adler, tra i fondadôrs de musicologjie austriache, e di Egon Wellesz, nuie di mancul che un arlêf dal pari de dodecafonie Arnold Schönberg. Par rivâ a fâ dut chest, al à vût il jutori di une borse di studi di bande dai Görzer Landesfonds, ven a stâi i fonts statâi gurizans.
◆ Al tornarà a Viene tal 1921 par perfezionâsi ancjemò, simpri tal violin, inviantsi ancje ae composizion cui mestris Joseph Marx, Eusebius Mandyczewski, che al jere stât amì di Johannes Brahms, e Franz Schalk, arlêf di Anton Bruckner, che lu invie ae direzion di orchestre.
Cuant che al jere tornât a Gurize tal 1918, aromai sot de Italie, al à scugnût tornâ a fâ l’esam di violin al Conservatori Giuseppe Verdi di Milan par vê il ricognossiment legâl talian, te stesse maniere che in dì di vuê si scuen ancjemò domandâ in Italie la ecuivalence dai titui academics otignûts tal forest par che a sedin calcolâts valits dentri dal Stât talian. Robis di no crodi, intune Europe che si vûl unide.
◆ Tornant al nestri Rodolfo, vivarôs di tantis esperiencis in ambients di grande nomee, cuntune formazion esemplâr di no vê compagns chi in Friûl, tornât a cjase si da al conciertisim, sedi come solist, sedi fondant formazions musicâls di cjamare, come i “Amici della musica”, nassûts tal 1924. Organizadôr di concierts, diretôr e solist, tal 1927 al vinç il concors par deventâ diretôr stabil de Orchestre Sinfoniche di Abbazia (Opatija) e al è promotôr di tantis iniziativis, come i “Sabati musicali”, tirant sù la Orchestre sinfoniche di Gurize, une des primis realtâts slargjadis de Regjon. Al invide grancj nons dal timp par fâ di soliscj, tant che Pina Carmirelli, Gioconda De Vito, Jan Kubelik, Alessandro Costantinides. Al è lui a direzi la formazion tal 1938 in ocasion dal conciert pe scree dal Teatri Verdi di Gurize, ristruturât su progjet dal architet Umberto Cuzzi, e al è simpri lui che al ten la bachete in ocasion de viertidure dal Cjistiel daspò de seconde vuere mondiâl, tal 1947.
◆ Lant a dâ un voli ae sô opare compositive, al à dât tant ae musiche vocâl di cjamare ma ancje par orchestre e musiche corâl, dimostrant une atenzion savinte ae tradizion de musiche furlane che al à savût tornâ a lei in clâf culte ma sclete tal stes timp. La vilote par côr a cuatri vôs mistis “Cjante pûr” su viers di Tite di Sandri, la trascrizion par côr virîl e orchestre di arcs di “Oh tu Stele” su lis peraulis di Franco Escher, la prime rapsodie “Gotis di rosade” di Augusto Cesare Seghizzi, elaborade par côr virîl, orchestre di arcs e arpe, la “Orazion a la Madone di Mont Sant” par côr, orchestre di arcs e cjampanis, fate insiemi a Antonio Lasciac, a son un esempli clâr de sô scriture.
◆ Al merete ancje ricuardade la sô produzion intal cjamp de didatiche, là che si è impegnât dai agns Trente indenant cu la scriture de sô “La tecnica superiore del violino”, stampade tal 1933 a Florence e comprade intai agns Cincuante di bande di Ricordi. Un volum che al è deventât une Biblie par cui che al sune il violin, adotât, dal 1938 indenant, di bande dai conservatoris talians par decision dal Ministeri de Educazion. In chest cjamp al à ancje scrit “L’arte e la tecnica del vibrato sul violino e viola” (Firenze, 1967), “Corde doppie” (inedit), “Quaderni per la tecnica basilare del violino” e i “Studi tecnici”. Grande personalitât chê di Rodolfo Lipizer, grant artist e grant insegnant. Tant al à vût dai siei mestris e inmò plui tant al à dât, e no dome in Friûl. ❚
