S.O.S. Friûl. sveâsi o sparî

Al è un mont strani chel dulà che un popul al à di domandâ il permès par continuâ a esisti. Epûr intal 2023 i Furlans a vegnin definîts, su la stampe e sui social, une “identitât ipotetiche” puartade indevant di int che e dopre in maniere strumentâl la “retoriche des lidrîs”. La “inteligencija” nostrane e pant un fastidi mostro par dut ce che al marche la specialitât de lenghe e de storie di chenti. Salacor a son chei che a crodin a un mont globalizât dulà che ducj, di un continent a chel altri, a puedin crodisi “citadins dal mont”. Di un mont dut compagn, là che si mangje Mac Donald’s e si compre Amazon, là che jessi colonizâts al è biel e ogni identitât origjinâl e je une complicazion inutile.
◆ Al sarès plui sempliç inneâ la identitât furlane tal “mâr grant” de omologazion. Si fâs mancul fadie. In buine part lu vin za fat, cence visâsi, tal non dal benstâ. La agriculture si è modernizade ma intai agns e à semenât tai nestris cjamps e tes nestris stalis une cuantitât di porcariis che vuê nus met devant il pericul di une cressinte puaretât biologjiche, che e ven de monoculture e de estinzion di tantis specis che – stant che la plui part di nô no vîf plui tal mieç de nature – no si sin nancje inacuarts di vê pierdût. Lis vin pierdudis inte lenghe, intant: tropis varietâts di uciei, di plantis, di pes, di rosis sono za muartis par nô prin ancjemò di estinguisi, stant che ancje se lis viodìn no savìn cemût clamâlis? Fevelìno di paisaç? Cui no si inacuarzial che il nivel di straçarie di teren al è intolerabil e che ingrumâ ancjemò asfalt e ciment al pues dome fâ cressi il dissest, e no il svilup? La omologazion nus à jemplât di centris comerciâi come la Vuere Frede di casermis: prin o ubidivin ae leç de jeve obligatorie, cumò a chê de consumazion obligatorie. Dut câs, simpri sotans.
◆ Un grant imbroi: tal non de comoditât si scancele la nestre comunitât. Ce deventarìno? Efevugjins, venits, padans, fradis di Italie o citadins de realtât virtuâl? No si sa. In spiete di savêlu, une maniere di resisti e je: lei la “Patrie”, la comugne di chei furlans che no si rindin ae scancelazion de lôr identitât, di chei fantats, plui o mancul zovins, che a berlin ancjemò la lôr braùre di jessi ce che a son, e no ce che altris ur ordenin di deventâ.
◆ Abonâsi al gjornâl chest an al puarte doi vantaçs: ricevi cul prin numar “Anime in crôs” di Agnul Floramo e pre Toni Beline, ultin prodot de nestre golaine “La machine dal timp”, e ricevi ogni mês une svearine par fâ dismovi il nestri sens identitari. Parcè che cumò al è il moment di un gjenerâl “S.O.S. pal Friûl”: che al vûl dî “Sveâsi o sparî”. Savint che tancj furlans a laran indevant a durmî cence pinsîr… ❚