La bataie in difese dal Tiliment umiliade dal consei regjonâl
Par cualchidun al è dome une alternative a bon presit a di une vacance al mâr, par cualchidun altri un confin naturâl che al marche une division mentâl, inmò prime che fisiche, jenfri il “di ca” e ce che al sta di chê altre bande. Par altris, invezit, massime par chei che a vegnin di difûr, il Tiliment al è un case study, un model di cjapâ tant che riferiment par rivâ a conservâ la naturalece di chei altris flums dal mont.
◆ No par nuie, il nestri cors, che par no barufâsi ancje pal non (Tiliment, Tiument, Taiament) o clamìn dispès dome “la aghe”, intai agns Novante al jere stât batiât tant che “re dai flums alpins”. Cjale ce câs, a tirâi fûr chel sorenon al jere stât un forest, vignût culì de Gjermanie propit par studiâ la sô straordenarietât, in agns che par noaltris invezit al jere un parc di divertiments bon par lâ a cjapâ soreli o par lâ a fâ lis corsis cul fûrstrade.
◆ Di chê volte, a son stâts inmaneâts cetancj seminaris e conferencis, fasint cressi la curiositât e l’interès di studiôs di dute Europe. Cussì come che a son aumentâts i dibatiments intai scagns dal consei regjonâl e intai comuns tocjâts di chest sarpint licuit, cu lis spaltadis a dividi cui che al pontave a difindi la naturalitât dal teritori e cui che invezit al cirive di fâ rindi in cualchi altre maniere chê lenghe di glerie cul so grum di claps e di boscam, cuasi simpri intindint di dâi une biele sbeletade di ciment.
◆ Par fortune, dut câs, nol è dit che la vôs di chei che a cirin di rispietâ la nature e sedi dome un berli tal desert, massime intai timps che o sin daûr a vivi, indulà che l’aspiet de sostignibilitât sociâl e ambientâl si dimostre simpri plui une cjarte buine di zuiâ, no dome in sens etic, ma ancje cun prospetivis di profit economic.
◆ I conseîrs regjonâi dal Pat pe Autonomie, Massimo Moretuzzo e Giampaolo Bidoli, di fat, a àn presentade propit in chescj dîs une mozion che e je stade fate buine dal rest de oposizion, par che la Zonte si impegni a tutelâ il plui pussibil la naturalitât dal flum, dilunc di dut il so percors.
◆ La propueste, cun di plui, e smirave a creâ une taule taronde jenfri lis realtâts dal puest e i sogjets che a àn cualchi interès peât al flum, di mût di inviâ un dialic cul ministeri dal Ambient e di presentâ cussì il progjet di candidature al Unesco dal Tiliment, re dai flums alpins, tant che Patrimoni di dute la Umanitât.
◆ La Zonte dut câs no à volût impegnâsi, ancje in maniere economiche, par che il progjet al jentri inte Tentative list, la liste dai bens segnalâts dal Stât che a puedin lâ indenant intal percors di candidature. E il consei regjonâl al à votât cuintri cheste propueste di valorizazion dal flum, umiliant une bataie onorevule e stiçant marum in tancj che a vuelin ben al Tiliment e lu volaressin tutelâ.
◆ Par sensibilizâ la int su chest teme, al è stât clamât il gjeolic Mario Tozzi, che intune une direte facebook al à fevelât de impuartance di chest flum a nivel european, tant che al è stât cjapât di model par tornâ a dâi vite al Isar (il flum che al passe par Munic), aromai cuasi muart, plen di refudums chimics e di sbaraments. Par tutelâ il Tiliment, il studiôs al à ancje proponude la creazion di un Parc, che al podarès deventâ une oportunitât di no crodi ancje pal turisim.
◆ La azion dal Pat, al è clâr, si inlidrise intun progjet di tutele che al à la sô fuarce inte vision dal Tiliment tant che ecosisteme plen di vivarositât, une sorte di creature che di agnorums e parone il nestri teritori, madrac pacific bon di mudâsi intun demoni, par ricuardâur ai oms che timp o tart al tornarà a cjapâsi ce che i è stât puartât vie.
◆ Plui che un re, forsit, al sarès miôr fevelâ di une regjine, o di une magne (forsit chê dal miluç di aur de liende?), e no dome par vie de particolaritât de sô morfologjie, a canâi instreçâts, ma parcè che, di cuant che la nestre regjon e je inabitade, al è simpri stât rispietât e venerât tant che une divinitât mari, simbul di vite e di feconditât.
La prossime volte che o lin a fâ il bagn, duncje, provìn a pensâ che chê aghe alì no je dome une podine par meti in muel lis biris. E je la nestre storie, il nestri passât e, dome se o stin ben atents a ce che o fasìn vuê, al podarà deventâ il nestri avignî. Soredut se la politiche no si plate daûr di un dêt ma e decît di dâi il valôr che al merte. ❚
