In spiete dai prins proviodiments, “La Patrie dal Friûl” e stimole il GNÛF governadôr
ZAGA BALOG
No ae aziende sanitarie uniche regjonâl
“Cumò si spietìn un cambi di rote decîs su la riforme sanitarie”: Zaga Balog, referente pal Coordenament dai Comitâts a difese dal Ospedâl di Glemone (e infermiere tal pont di Pront intervent dal nosocomi glemonàs e dai 29 di Avrîl ancje conseire comunâl inte maiorance dal neu sindic Revelant), no fâs zîrs di peraulis, ancje se e amet che “il gnûf president al varà bisugne di timp par visionâ i risultâts de riforme Serracchiani in ducj i aspiets dal teritori regjonâl. Però, za dal moment si pues procedi cuntun conzelament de riforme”. E je fiducie par vie che i Comitâts si son cjatâts cun Fedriga in campagne eletorâl (come pûr cul Movimento 5 Stelle, intant che il centriçampe al à declinât l’invît al confront), e lui si è dimostrât “une persone tant disponibile a scoltâ”.
Cuâi sono i ponts fondamentâi di une pussibile svolte? “A son chei che o vin denunziât simpri, fin di cuant che si son tacâts a intuî i lineaments de riforme Serracchiani-Telesca – e sclarìs Balog -. Unificâ la sanitât teritoriâl cun chê ospedaliere e cu la ricercje universitarie al è stât un erôr grâf parcè che i fins di chescj trê comparts a son cetant diferents tra di lôr. Si è creât un cjalderon di no podêlu gjestî. Si spietìn che Fedriga al sielzi i siei colaboradôrs plui direts tra i professioniscj e i operadôrs de sanitât, personis competentis e formadis, par cjapâ in man la situazion”.
La esperience di chescj cinc agns, secont Balog, “e à dimostrât che il depotenziament dal Ospedâl di Glemone in Presidi pe salût nol à fat altri che stropâ chei altris nosocomis di rêt di San Denêl e di Tumieç, creant discomuts ae popolazion dal Friûl de Alte e de Pedemontane. Cumò no si trate semplicementri di tornâ ae situazion pre riforme, ma al bisugne vierzi gnovis prospetivis. Si à di partî di un studi seri su lis esigjencis dal teritori in dutis lis sôs variabils, ancje orografichis, cence rimetisi a modelins prestruturâts e pensâts a taulin, che a valin di Tarvis a Triest. Nô o proponìn une aziende gnove che e fasi riferiment ae aree largje udinese, che no sedi plui unide al teritori di Codroip ma che e inglobi chel di Tarcint, e là che l’ospedâl di Glemone al recupari lis sôs funzions di rêt insiemi cun Tumieç”.
Semafar ros invezit pe ipotesi di une aziende sanitarie uniche regjonâl, che e jere stade puartade indenant dal Centridiestre cul president Tondo: “E je une soluzion dificile di gjestî – e conclût Balog -. O pensìn che si puedi lâ viers trê areis largjis (Triest, Pordenon e Udin) dividudis in distrets, tant che la aree di mont”.
di Roberto Pensa