Sapade/Plodn biadelore in Friûl! La buine gnove tant spietade e je rivade | Il “bentornade” a Sapade/Plodn | Mwrits e fortunis

Sapade e jere bielzà furlane. Anzit, che se nol fos stât cussì no varessin fat une bataie lungje scuasit dîs agns. Dut câs, cumò e je furlane ancje par dirit, stant che ai 22 di Novembar la Cjamare dai deputâts e à votât in maniere definitive la leç che e previôt il passaç dal Comun dolomitan dal Venit al Friûl-Vignesie Julie: 257 sì, 20 no e 74 astignûts.
In pratiche, il contrari di ce che al jere sucedût 165 agns za fa, cuant che Sapade e le cu la provincie di Belum daspò secui che e jere stade prin sot dal Patriarcjât e po dal imperi austroongjarês, dutun cul Friûl. Duncje leams storics, culturâi, di mentalitât e di frecuentazion che a motivin in forme uniche chê domande che il Parlament le à fate buine. E gnove cumò e je la strade tecniche e aministrative che si varà di fâ par rindi concret chest proviodiment; gnove par vie che mai nissun paîs al è passât di une Regjon ordenarie a une Speciâl. Tant al è vêr che ancjemò nissun al sa cun precision in ce timps che si podaran mudâ i confins su la cjarte gjeografiche e il stes sindic di Sapade, Manuel Piller Hoffer, al à dit che al è in spiete di savê se al rivarà un comissari e, se sì, par trop timp. Nancje la «mari» de leç, la eurodeputade Isabella De Monte, che cuant che e jere senatore sul imprin de legjislature e veve presentât il dissen di leç, e cognòs i timps. Si sa par sigûr che la leç e à di jessi metude in pratiche midiant di decrets atuatîfs dal Guvier, ma no si sa in trop timp. «O crôt che i prins interlocutôrs dal Guvier a saran lis dôs regjons» e à dit la politiche, che cumò e à bielzà scomençât a sburtâ par che te prossime legjislature i tocji a Cint di tornâ in Friûl.
Ancje chest paîs, cumò in provincie di Vignesie, al à pandude la sô volontât cuntun referendum, come Sapade. Alì la prime mosse le à fate il Consei comunâl tal Lui dal 2007 e ai 8 e 9 di Març dal 2008 il referendum al mostrà che il 95% di chei che a votarin – il 75,5% di chei che a vevin dirit – a jerin pal sì al Friûl. Di in chê volte si è rivâts al mês di Mai di chest an par che il Parlament al cjapàs in considerazion la facende, fasint buine la leç. Un troi che al dave simpri batiment di cûr e dispès ai sapadins e je tocjât di tignî il flât e sperâ che la robe e les indevant. Cun di fat, no son mancjâts i tentatîfs di fermâ il procès, che dut câs al è rivât a lâ indevant: ae fin di Setembar al à votât a favôr il Senât e po si è lâts di buride par podê rivâ a fâ votâ ancje la Cjamare prime che e finìs la legjislature.
A pene fate la leç, i contraris dal Venit a àn subit cirût il mieç par blocâle. Il venezian e cjâf grup ae Cjamare di Forza Italia, Renato Brunetta, al à scrit al president de Republiche par che no le firmi, e il president dal Consei regjonâl dal Venit al à bielzà dit che la Regjon le contestarà devant de Cort Costituzionâl. Dut câs, la plui part dai interessâts no si dan pinsîr, par vie che a considerin che lis obiezions no àn sostance. A lavorâ a bracecuel par che Sapade e fos adimplen furlane a son stadis ancje lis istituzions dal Friûl-Vignesie Julie, i siei parlamentârs e la Assemblee de comunitât linguistiche furlane. La Anci Fvg, la Associazion dai Comuns, e à bielzà invidât il sindic di Sapade/Plond pe assemblee di Dicembar e il president de Provincie di Udin, Pieri Fontanin, al à dit che al à di passâ a palaç Belgrado che al à di regalâi la bandiere dal Friûl.
✒ Antonella Lanfrit
……………………………………………………………………………….
Il “bentornade” a Sapade/Plodn
E je stade fiestone grande a Sapade a pene che la Cjamare e à votât ai 22 di Novembar. Il Comitât, che tal 2008 si incaricà di metin in pîts il referendum e in chescj agns al à simpri tignût dûr, si è butât sù e jù pes stradis dal paîs e ancje lis cjampanis a àn sunât a fieste. Al jere parfin comovût Alessandro Mauro, il coordenadôr dal Comitât, che al à ricuardât chei che cumò no son plui ma che a àn tant scombatût par chest risultât. E in gjonde ancje il puartevôs dal Comitât, Danilo Quinz, mestri di schi e di dîs agns incà impegnât a puartâ Sapade in Friûl.
«Bentornade», le à saludade il president de Provincie di Udin, Pieri Fontanin. E la presidente de Regjon, Debora Serracchiani: «Chest vôt al è un at di justizie tai confronts de comunitât di Sapade. Cumò o speri che l’aiar al sarà plui seren e a saran poiadis di bande lis polemichis e lis contraposizions». Content ancje il president dal Consei regjonâl, Franco Iacop, che al à dade la gnove in direte ai conseîrs riunîts in Aule e chei a àn rispuindût cuntun lunc batimans.
Gjonde de politiche, di çampe e di diestre e gjonde ancje tai Comuns de Assemblee linguistiche furlane: «O ai il cûr a Sapade – al à dit il president Diego Navarria -. O speri che nissun si intesti cheste vitorie che e je dute e dome dai sapadins che a son stât testarts e a àn vût la convinzion e la costance di tignî dûr». (✒ A.L.)
____________________________________________________
MERITS E FORTUNIS
Sapade/Plodn e torne a cjase, in Patrie, e il merit i va dut ai sapadins: politics e gjornâi a àn simpri strissinade indevant la cuistion come se e fos une crôs che i jere tocjade, obleâts dal ativisim dal Comitât par Sapade/Plodn in Friûl.
L’obietîf, invezit, al jere rimandâ, distrai, scjafoiâle a planc a planc. Ma al è sucedût un colp di fortune: prime des elezions, i partîts talians a àn vût di fâsi biei e alore a àn puartât biadelore la cuistion in Parlament. Li che il passaç in Friûl nol podeve che jessi fat bon, parcè che e jere une robe juste. Cumò, la stesse robe e à di sucedi pal Comun di Cint, che al à fat i referendum pal passaç, e il nestri gjornâl di cumò indevant a ‘nt fevelarà ancje se nissun lu fasarà: come che o savês che al à simpri fat par Sapade/Plodn.
✒ Dree Venier