Cetant sufiert il troi par che Sapade e rivi in Friûl-Vignesie Julie, come che e à domandât in grandissime maiorance la sô int cul referendum dal 2008, cul 95% di sì, ven a stâi il 71,73% di chei che a àn dirit di vôt. Une volontât che e à vût il bon acet ancje dai doi Conseis regjonâls, chel dal Venit e chel dal Friûl-Vignesie Julie, ma che cumò e riscje di restâ scjafoiade in Parlament.
Cun di fat, dal mês di Mai, cuant che la leç che e fasarès deventâ realtât il passaç di Regjon e à rivât a jessi metude tal lunari dai lavôrs dal Senât, par un motîf o par chel altri la sô discussion e je stade simpri rimandade.
Une pinitince cence fin che e à tignût cul cûr in man la int par dut l’Istât, fintremai ai prins di Avost, cuant che il Parlament al à sieradis lis puartis. Ce che al sucedarà cul inviament des voris ai 12 di Setembar al è cuasi un misteri. Tal sens che la leç e je in agjende e duncje e varès di jessi discutude, ma nol è dit che al sucedi.
E cheste volte no dome par vie che se al rive un decret leç che al à di jessi tramudât in leç al à a prioritât (come che al è sucedût dilunc i mês di Mai, Jugn e Lui), ma ancje par vie che la corint contrarie a chest passaç e à tornât a cjapâ pît, forsit ancje dentri dal Guvier.
Se il senatôr triestin dal Pd, Francesco Russo, ai prins di Avost al sigurave che no fos une contrarietât politiche tal Guvier e nancje tal partît e che invezit a podaressin jessi lis prioritâts dai dibatiments in Aule a fâ slitâ la leç su Sapade, il senatôr pordenonês Lodovico Sonego, ex Pd e cumò di Mdp, di simpri contrari al trasferiment, juste ai ultins di Lui al à scrit al premier Paolo Gentiloni par domandâi che «al sedi il Guvier a ritirâ il dissen di leç».
Sonego al motive la sô domande cun argomentazions ancje di caratar costituzionâl. Par lui, in sostance, l’ingrès di Sapade in Friûl-Vignesie Julie al modifiche il teritori di une regjon a Statût Speciâl, che e à i confins «definîts dal articul 2 dal so Statût – al scrîf -. Un document che par cambiâlu i covente une leç costituzionâl, no une leç ordenarie». Si che, ancje che il Senât le fasès buine, e sarès daspò considerade une norme incostituzionâl e duncje cence valôr. Che se po si ves di lâ daûr di «omogjeneitât etniche e nazionâl par definî i confins – al zonte il senatôr te letare -, si rivarès al principi che la Italie e varès di tornâ indaûr Bolzan, Tarvis e Pontebe ae Austrie».
Di dute altre vision la senatore belumate Raffaella Bellot (liste Fare!), che si è cjapade a pet la cuistion di Sapade. «Si continue a movi il centri dal probleme che al reste dome un – e dîs in rispueste ae gnove azion di Sonego -: i sapadins a àn dirit di vê une rispueste e lis Cjamaris dal Parlament a àn di esprimisi cuntun vôt».
La cuistion, e zonte la senatore, «no je ce che al sucedarà dopo che lis Cjamaris a àn votât. Invezit al è di dî che a son stâts fats ducj i passaçs che lis leçs a previodin e cumò bisugne rivâ fintremai in insom”. Cun di fat, il dissen di leç al à passât il vôt de Comission belanç e afârs costituzionâi, dulà che la domande di Sapade e je stade sostignude ae unanimitât, e la Aule dal Senât si è esprimude tal mês di Mai cul “ricognossiment de necessitât di rivâ al vôt».
In sumis, e dîs Bellot, «si à di rivâ ae conte dai sì e dai no. La democrazie e je un concet plui larc dai virtuosisims dulà che si pare dispès il mistîr di cualchi politic. Cjapìnsi lis responsabilitâts».
Sul imprin dal mês di Mai ancje la presidente de Regjon Debora Serracchiani, dutun cul sindic di Sapade Manuel Piller Hoffer, e veve dit di spedî une letare a Rome, al president dal Senât Aldo Grasso, par discuti la leç.
✒ Antonella Lanfrit
