Scritôrs in struc si sfidin in 3 riis li dai Colonos

Al è timp inmò cualchi setemane par partecipâ al concors leterari plui curt dal Istât.
La Associazion Culturâl Colonos e à metût fûr il bant pe cuinte edizion dal concors leterari par romançs in lenghe furlane, clamât “In trê riis” daûr di une invenzion leterarie dal scritôr anarchic francês Felix Fenenon dal secul passât.
Il concors, organizât in colaborazion cu la Arlef – Agjenzie Regjonâl pe lenghe furlane e cul contribût dai assessorâts a la culture de Provincie di Udin e de Regjon Friûl-Vignesie Julie, al rivuarde tescj di narative par furlan, che a àn di sei inedits, scrits cu la grafie uficiâl e in cualsisei varietât lenghistiche, cun no plui di 180 batudis (cjapâts dentri ancje i spazis). Tal spirt da la iniziative, che e à chê di stiçâ i zovins a creâ oparis animadis di inovazion e creativitât, il bant al specifiche che “no vignaran cjapadis in considerazion poesiis, filastrocjis o componiments fûr dal gjenar da la narative”
Ancje pe edizion di chest an e je stade confermade la struture in dôs sezions, une fin a 16 agns di etât, e chê altre di 17 a 35 agns.
I partecipants a podin mandâ no plui di trê composizions ognidun, par mieç de pueste eletroniche, ae direzion mail info@colonos.it, cul test alegât. La mail e à di vê i riferiments dal autôr (non, cognon, vie e numar civic, puest di residence e telefon), la sô etât e la direzion di pueste eletroniche.
Lis voris e varan di rivâ dentri di miezegnot dai 30 di Jugn 2014 (e fâs fede la ore dal computer). La Jurie dal concors “Romanç in trê riis” e je dade dongje di Carlo Tolazzi (president), Lorenzo Casadio, William Cisilino, Enrico Michelutti, Elisabetta Pozzetto, e e darà un premi par ognidune da lis dôs sezions, ma e podarà ancje no dâlu tal câs che i lavô€s rivâts no vein un nivel di cualitât suficient.
Al prin classificât de sezion fin a 16 agns i vignarà dât in premi un smartphone Samsung Galaxy Ace (o ecuivalent), chel de sezion di 17 a 35 agns al vinçarà un iPad2 16 GB Hifi Apple (o ecuivalent).
Considerant il valôr e il numar des voris rivadis al vignarà publicât un librut di pueste “progjet Colonos” daûr di une selezion fate da la jurie.
La cerimonie di premiazion si le fasarà a Vilecjasse, tal curtîl dal Agriturisim Ai Colonos ae fin di Avost, dentri di Avostanis, intune serade spetacul organizade di pueste.
Il bant intîr dal concors al è publicât ancje sul sît web www.colonos.it ❚
Redazion