Se la indipendence e devente un valor in plui pe economie

La Scozie e à dit di no, la Catalogne si è viodude imponi il stop de Cort costituzionâl spagnole. Pai referenda indipendentiscj nol tire aiar bon, e se nancje la “potente” Catalogne e pâr che e rivi a fâje, e somee impussibile la mission che si è proponût il Venit, e nancje di azardâ la ipotesi che il Friûl-VJ (che al à un cuart dai abitants dal Venit) al puedi pensâi. Ma, tant che zûc: e se il referendum “serenissim” al vignìs celebrât e al vincès il sì? Il Friûl-VJ al deventarès une sorte di “enclave” taliane cenglade di altris stâts europeans “indipendents”: un cuadri tant intrigon. E se ancje il Friûl al otignìs la sô autonomie reâl? Il Prodot interni sporc regjonâl a valôr corint dal 2012 – dât disponibil plui resint – al lenç i 36 miliarts di euros, par un Pil pro capite di plui o mancul 29.560 euros (dâts Istat pal 2013: Friûl-VJ 29.106, medie de Italie 25.728); dâts che, pal agravâsi de crisi economiche gjenerâl a àn patît un câl, tant che pal an in cors si stime un Prodot interni sporc regjonâl di 35,850 miliarts cirche e un Pil pro capite di plui o mancul 29 mil euros.
A chest fin, al va visât che su la base de leç sul Federalisim fiscâl aprovade cinc agns indaûr, il Stât al trasferìs al Friûl-VJ i 6/10 de Irpef paiade in regjon e des ritignudis ae font, i 4,5/10 de Irpeg (Ires), i 8/10 de Ivz, i 9/10 di pocjis altris impuestis (tabacs consumâts in Friûl-VJ – e o savìn ben trop che in chest câs la situazion e sedi dramatiche, cu la fuide di là dal confin pai acuiscj – e concessions idroeletrichis) e plui o mancul il 30% de jentrade des acisis par benzine e gasoli di autotrazion. Al è però vêr che il Stât al garantìs risorsis zontadis pes dibisugnis des spesis sanitariis.
Insume, se il Friûl-VJ al podès contâ su almancul une part di chês risorsis che a restin a Rome, di fonts par finanziâ invistiments e servizis a ‘nt saressin… Ancje parcè che il Friûl-VJ, regjon “export-oriented” o “export-led” cemût che si vûl definîle, al pues contâ suntun salt comerciâl che si è mantignût positîf ancje in chescj agns di crisi, tant di passâ di pôc i 5 miliarts, in gracie de diference tra esportazions par plui di 11,4 miliarts e importazions par 6,3.
E al confuarte pensâ che, di là dal agroalimentâr (in mût particolâr intal setôr vitivinicul), ancje intal compart des manifaturis – che in sens storic si espuartin in Paîs a economie indenant e duncje prodots a alte tecnologjie e valôr zontât – lis spietis dai imprenditôrs a restin positivis. Un dât che si sume a fatôrs impuartants tant che la spese pro capite in ricercje e disvilup (sinonim di voie di inovazion) che in Friûl-VJ e rive ai 430 euros (cuintri i 390 dai Nordest, ancje se tant distants dai 860 de Carinzie) e al tas di disocupazion che, cundut che la crisi e vedi petât dûr, si ateste ancjemò ator dal 7,1%, cuntun tas di ocupazion (15-64 agns) dal 64,3%.
Insume, i numars par fâ ben, ancje bessôi, a saressin. Cussì tant che lis dotazions infrastruturâls e logjistichis, di là des risorsis naturâls (che, cuntun meteo plui clement a pet di chel di cheste stagjon, a compuartaressin ancje une riprese pal turisim).
Fin chi, il zûc. Tornant invezit ae realtât, nol pues no fâ rifleti un saç curt di Giuseppe Ieraci, professôr associât dal Dipartiment di Siencis politichis e sociâls de Universitât di Triest, che sul numar 1 dal 2012 de riviste di studis juridics e politics “Istituzioni del federalismo” al sotlineave cemût che i pilastris de politiche fiscâl regjonâl a lessin indevant a jessi costituîts de finance “compartecipade” e dai trasferiments finanziaris dal Stât. Fin de sô nassite – al rilevave Ieraci – la classe politiche regjonâl e à vût miôr no doprâ il strument de jeve fiscâl in propri, fasint in mût che la autonomie finanziarie dal Friûl-VJ e restàs “no puartade insom”.
Secont Ieraci, “in ogni câs, lis prospetivis dal federalisim fiscâl a aparissin inciertis dal osservatori dal Friûl-VJ e chest in reson dal fat che la finance “compartecipade” bessole no baste a cuvierzi i coscj. Si fâs riferiment, in particolâr, ae contribuzion nete al fonts di solidarietât e perecuazion dal federalisim (370 milions di euros anuâi) che, intune fase di ralentament de cressite economiche e duncje dal Pil regjonâl, e poie su lis financis dal Friûl-VJ”. Une situazion “dificilmentri sostignibile intal medi lunc periodi. La opzion politiche e je tant secje, ma ancje tant cjare: cressi la tassazion, agjint infin ancje su la jeve finanziarie proprie; o taiâ lis spesis regjonâls, magari in prime batude cun misuris “popolârs”, ven a stâi ridusint i coscj de politiche. Ma cence fal, in curt o tart, intervignint su lis spesis regjonâls e duncje sui servizis. Cussì – al conclût Ieraci – la istituzion dal federalisim fiscâl e sburtarès la politiche a lâ daûr stradis ineditis e evitadis in maniere caute intai decenis passâts: tassâ i citadins par ce che a àn e che prime al jere garantît in sostance dal Stât; passâ di politichis distributivis finalizadis a gjestî consens imediât, a politichis redistributivis e di disvilup par garantî la sostignibilitât dal gnûf sisteme”. E il zûc al è finît. ❚
Linux