La Vitorie maladete de prime vuere mondiâl
Vuè, come mil agns indaûr, le Vuere e je une “robe di oms”. Cualchidun si è ancje svantât di chest. Al bastarès pensâ a ce che al diseve chel dordel di Giovanni Papini, intal so “Elogio della Guerra” su lis pagjinis de riviste taliane “Lacerba”. Al jere l’Otubar dal 1914 e il mont al sbrissave jù intal profont dal abìs, come che o savìn ben ducj. L’inteletuâl al ricuardave cun grande retoriche, imbolside di chê matetât che di li a pôc e sarès deventade la anime nere e fassiste di une Itale che ancjemò no le à dismetude, che finalmentri al jere rivât il moment de rabie e dal svindic. Vonde, al continuave, cul clip e il fof dal lat des maris e des lagrimis dai fradis. A ce coventino mai, lis maris, massime dopo une cierte etât, se no a vaî, al scriveve? Nol viodeve la ore, Papini, di podê vendemâ il sanc dal nemì sul cjamp dal onôr. In Galizie, su la Somme o sul Cjars gurizan. Al diseve che la vuere e je buine ancje pe agriculture, dal moment che dopo di un maçalizi i cjamps a produsin plui patatis e plui verzis par chei che a restin. Duncje parcè mai lamentâsi? La esortazion finâl dal so toc le lassi inte sô lenghe origjinâl, parcè che e fâs ancjemò plui impression, tignint cont dal fat che chi di noaltris furlans la becjarie dal 1914-1918 e je stade pardabon, plui che no di altris bandis, une vuere fra fradis. Il tratât di Cormons, firmât intal 1866, al puartave il confin orientâl talian fin sul Judri e sù a Pontebe. Chest al vûl dî che furlans sot dal Re e furlans sot dal Imperadôr si saressin copâts in trincee par difindi bandieris di sorestants che a guviernavin di Rome e di Viene e che cun lôr no vevin propit nuie a ce fâ. E come che i letôrs de Patrie a san ben, cheste cundizion e à fat in maniere che il prin muart de Austrie Ongjarie, intal Cuindis, al fos un furlan di Aquilee, Eugenio Sandrigo, e il prin muart talian simpri un furlan, l’udinês Riccardo Giusto. Ce cûl e ce privileç, no mo? E alore, cun chestis premessis, scoltìnlu, Papini, cence voltâlu par furlan, juste par no ofindi le nestre lenghe: “Amiamo la guerra ed assaporiamola da buongustai finché dura. La guerra è spaventosa – e appunto perché spaventosa e tremenda e terribile e distruggitrice dobbiamo amarla con tutto il nostro cuore di maschi”. Velu. Cun dut il nestri cûr di mascjos. Che se a fossin lis feminis a decidi, o soi plui che sigûr dal fat che nissune mari, nuvice, fie, sûr o morose e sarès cussì contente di viodi tornâ a cjase une carogne massacrade e involuçade dentri di une bandiere sassine. Cualchi setemane indaûr o ai fat viodi a scuele dôs fotografiis che a mostravin il stes sogjet: une mari che e cor su lis maseriis cuntun frut insanganât e muart in braç. E o ai domandât: “Savêso dîmi cuale des dôs e je la palestinese e cuale la israeliane?” Clâr che la uniche rispueste pussibile e je stade un tasê amâr. Dîs agns fa, firmant une “Cuintristorie de Prime Vuere Mondiâl”, un rubriche pes pagjinis di chest nestri mensîl, che po dopo e je ancje deventade un librut cuintri la retoriche dute taliane che e celebrave il prin bot de “Grande Vuere”, come che ancjemò si ustine a definîle cualchidun, mi è capitât di vê pes mans documents inedits di grant interès. Letaris, fotografiis, ma ancje memoriis de int come me, int comune, che metude insiemi e fâs la Storie, chê vere, no chê dai gjenerâi o dai ministris. Ulderica Da Pozzo, fotografe di clare innomine e ricercjadore cjargnele maraveose, une dì mi à puartat intun piçul cimitieri di vuere in mont. Sot des crôs dutis compagnis a durmivin i soldaduts, come che al varès dit Giorgio Verigo, sacrificâts intal non di une Patrie che, al è probabil, nancje no ricognossevin. Ma ce che mi à comovût ancjemò di plui, dopo de rabie, al è stât il fat che lis fotografiis e jerin dutis di frutins di un an o li ator. Ulderica mi à spiegât il parcè. Ma cumò scoltìnlu di une des lôr maris. Une mari di Vuere. Ae fin de leture o sarês convints ancje voaltris che se ognidun di nô al vivès in tune Matrie pluitost che intune Patrie, vergognis cussì penzis no laressin indenant a esisti mai plui!
◆ “Le clamin il giorno della vittoria della Patria cheste zornade maladete. Il 4 di Novembar. La Vitorie! Lis bandieris che a fasin svintulâ a varessin di puartâ dome che il colôr dal sanc dai nestris fîs, che al è ros, no blanc e nancje vert. Dome ros. Come che ros al è il colôr de nestre bandiere. Noaltris, che o sin maris, no le volin le medaie dai gjenerâi. Chei che a fasin sunâ la fanfare par ricuardâ a chei che a son restâts in vite che il sacrifici pe Patrie al à di jessi simpri ufiert, un doman. La Patrie! Ma ce vuelial mai dì, Patrie? Al sarès tant miôr che e fos une Matrie, pluitost. Dal moment che nissune mari e pues jessi contente di ufrî al canon la cjar di so fi, par che le masani par ben prime di mastiâle e di glotile. Cuale mari podaressie jessi braurose di tante disgracie? E cumò, cui mi tornial indaûr gno fi? I fîs che a muerin in vuere a son ducj compagns: il gno come chel di dutis chês altris, che cumò a vain propit come me, di chê altre bande de frontiere. Dal moment che ancje il nemì, come che lu clamais, al à une mari. O disês che al è biel lâ a murî pai sacris confins! Benon, alore lait pûr voaltris, se us plâs, intal pantan des trinceis, blestemant, vaìnt. Lassant par simpri la int di cjase. Tal dolôr e te miserie. O soi lade jù inte caserme dai carabinîrs di Tumieç, îr, dal moment che a noaltris maris nus vevin domandât di puartâur une fotografie dal milite caduto con onore. E diseve cussì la letare, vele chi, firmade nuie mancul par cont dal Re! Une fotografie di meti su la crôs intal cimitieri di vuere, sù pes monts indulà che si à scombatût e là che ju àn sepulîts insiemi. Cuant che o sin rivadis, une cincuantine di nô, vignudis dai Mions, di Pesaria, di Paluce, o tignivin dutis in man la imagjin di consegnâ: e jere chê di un frut. Parcè che cui mai, ca sù di noaltris, si isal mai fat un ritrat se no inte dì des gnocis? E pûr e je tradizion di clamâ il fotograf sul finî dal prin an dal frut. Cuant che al rive a stâ sentât di bessôl intal scagn. Chê li sì, po, che le vevin dutis! Cussì, su la taule dai carabinîrs, le vin lassade. Bon. Des crôs dal cimitieri a riduçaran lis musis di tancj frutins, no di soldâts. Che par me al è come dî che la colpe par no jessi cressûts e je dome che de Vuere. E di chei che le àn volude!” ❚
