Par risolvi il probleme de mancjance croniche di segretaris comunâi, che e penalize une vore i Comuns, la zonte regjonâl ai 9 di Jugn e à aprovât un dissen di leç di pueste. La propueste e je chê di creâ un elenc regjonâl di chestis figuris, par rindi plui facilis lis proceduris di reclutament dai funzionaris. Si trate di une strade za sperimentade des Provinciis autonomis di Trent e Bolzan e in Val di Aoste. Une atuazion ad implen de autonomie speciâl, duncje, che dut câs e viôt la contrarietât dai segretaris (une cuarantine) che vuê a gjestissin i 216 Comuns de Regjon. No vuelin jessi obleâts a sielzi se deventâ dipendents de Regjon o restâ sot de ombrene di Rome (la leç e impon la opzion dentri dal 2022), parcè che a vuelin tignîsi viertis dutis dôs lis puartis.
◆ Stant che i Comuns cence segretari a viodin ralentade la lôr azion aministrative, la Assemblee de Comunitât Linguistiche Furlane cul so president Markus Maurmair e sburte par puartâ indevant cheste leç, magari cjatant maniere di comedâle un pôc, ma cence fermâ un percors necessari. Di fat, nol è pussibil imagjinâ di lâ indevant cui segretaris che a son cumò, cence reclutâ ancjemò gnovis professionalitâts in chest setôr. “Il sisteme al è a tocs e la sielte de Regjon di proponi une soluzion e va te direzion juste” al spieghe il president de Aclif Markus Maurmair, che al à mandât ai sindics un struc de norme trentine e valdostane par dimostrâ che in autonomie la dissipline di chestis figuris tal ordenament e funzione miôr. “Se la leç e va miorade, fasìnlu in curt – al siere il president dai sindics furlanofons – parcè che al è interès dai citadins e dai aministradôrs chel di cjatâ soluzion a un probleme che pai Comuns al è une bale tal pît”. ❚