Leu
Mancul manifature, plui “Friuli Doc” par rilançâ la economie
A son lavôr e tutele dal ambient lis prioritâts par Serena Pellegrino, 51 agns, architete, che dopo la legjislature passade a Montecitorio cumò e cîr la elezion al Senât intes filis di “Liberi e Uguali”.
1. O vin pierdût 1,2 miliarts di euros, cedûts cence cuintripartide. L’ultin “pat”, che al à modificât il Statût regjonâl, al è stât metût dentri di gnot di un emendament, cence nissun acuardi in Zonte o Consei regjonâl: pardabon un colp bas che al gjave un altri toc de nestre autonomie. Chescj pats a van abolîts in assolût.
2. Mi soi batude par otignî un seç garantît in Parlament pes minorancis linguistichis dal Friûl-Vignesie Julie. O ai vût une oposizion feroce e no soi rivade adore. Par me e je fondamentâl sedi la biodiversitât ambientâl che chê culturâl.
3. O vin di invistî su la diversificazion dal lavôr e su la distribuzion teritoriâl dai invistiments statâi. Concentrâju dome su lis infrastruturis e sui traspuarts al gjenere un indot che si fonde sul ûs di fonts energjetichis fossilis (petroli, cjarbon e gas). Par disvilupâ dute cheste logjistiche o sin daûr a butâ jù la vere ricjece dal nestri teritori. Par esempli, lis nestris aziendis vitiviniculis a scomencin a sintî des dificoltâts parcè che no sin daûr a invistî avonde in chê ricjece incredibile che e je il nestri agroalimentâr. Al è un setôr che tra l’altri nol è delocalizabil. O metìn invezit tancj bêçs su la variante di Dignan (40 milions), su la Puçui-Terençan (142 milions), su la Palme-Manzan (90 milions), e o podarès lâ indenant…
4. I numars de imigrazion de Afriche, ca di nô, a son ridicui. Invezit, o varessin di resonâ sul fat che intai ultins mês 15 mil puliês a son emigrâts in Friûl-Vignesie Julie. Tant plui preocupants i dâts de emigrazion dai nestris zovins. A son un potenziâl enormi che al moment de lauree o regalìn a altris Paîs.
5. Il sisteme industriâl, cemût che lu vin cognossût fin cumò, al à di jessi riviodût insot, parcè che nol prodûs plui ni lavôr, e nancje ricjece. La vision di une economie circolâr e je la fonde dal nestri program. Al bisugne gjenerâ lavôr midiant dal ambient e de ricjece dal nestri patrimoni agroalimentâr e paisagjistic. E je cheste la vie par risolvi ancje lis emergjencis ambientâls dal Friûl-Vignesie Julie, de Caffaro ae lagune di Maran fin ae feriere di Servola e ae invadence des infrastruturis.