Il program di Avostanis dal mês Setembar al tache ai 2, cuant che jo che o scrîf, insiemi al musicist Rudy Fantin, o presentarai lis trasformazions de iconografie musicâl sacre furlane, dal prin secul prime di Crist fin al Nûfcent, ven a stâi doi mil agns di storie, doprant une mê ricercje su la art visive sacre traviersant la nestre Patrie, intant che Fantin al trasformarà musichis di Debussy, Ravel, Bach cul estri des sôs improvisazions al Fender Rhodes.
◆ Ai 6 di Setembar al torne il storic espert di cristianisim antîc Gabriele Pelizzari, inte Sale dal Consei dal Comun di Aquilee. A dialic cun Alessio Peršič e Emiliano Fiori, al presentarà il gnûf libri, un progjet dai Colonos: “O ricuardarai cui che o soi: Aquilee e il futûr da la memorie”. Si capirà trop che Aquilee e sedi il paradigme perfet di un ideâl de memorie alt, necessari e, tal stes timp, fragjil e di tratâ cun cure. La tradizion aquileiese e à dibisugne di jessi difindude, di jessi metude tal centri di un progjet di avignî dulà che si domandi di jê di mostrâ l’orizont dal pussibil. E dal miôr.
◆ Ai 8 di Setembar, tal curtîl de storiche sede di Vilecjaze di Listize, par cure di Michele Bazzana, e torne la gare artistiche “A brene vierte”, rivade ae cuinte edizion. Di matine buinore al tart dopomisdì, materiâi di scart, robe di ogni gjenar come fier, lens, cartons, plastiche, tiessûts e dut ce che si calcole zaromai scovace, a deventin elements par cambiaments demiurgjics cun plui mans che a dan forme al teme che ur vignarà comunicât ai concorints dome cuant che la gare a tacarà. Al sarà il public a votâ la opare vincidore e ai 8 di Otubar al vignarà proietât il video documentari di chest concors particolâr che al sarà realizât di Paolo Comuzzi. A Gardiscje dal Lusinç, inte sede de Galarie Regjonâl di Art contemporanie Luigi Spazzapan, si contaran e viodaran i moments plui significatîfs di une aventure creative che, a pet dal panorame gjenerâl di tantis iniziativis artistichis che a vegnin inmaneadis sul teritori, si disvele dal dut fûr dal normâl e pardabon origjinâl.
◆ Il finâl di Avostanis 2024 al sarà ai 12 di Otubar a Vile Manin di Passarian, cun “Tierç Paradîs: l’ecuilibri jenfri nature e artifici”. E vignarà presentade la Cittadellarte e la Academie Unidee intun incuintri cul artist, pitôr e scultôr Michelangelo Pistoletto. Al sucêt che Cittadellarte e puarte in Friûl L’Art de Demopraxia, dentri de grande mostre “T3RZA TERRA”, cussì che il museu al devente un agregadôr e un esempli, midiant di un program di azions intens di coinvolziment cussient. Dut di scuvierzi ancje chest incuintri, continuant a sostignî i Colonos che nus risiervarà inmò tantis sorpresis e events di spessôr a difese de nestre unicitât furlane, proietade tra introspezion e estroversion intun contest par nuie sierât, ma in realtât dal dut viert. ❚
