Si disvele il misteri furlan di Giorgio Mainerio

Pal Mittelfest un spetacul
in colaborazion cun ARLeF
Al torne simpri e forsit nol è mai lât vie, di cuant che al è rivât in Friûl. Al jere l’an 1560. E ancje di muart, rivade a Acuilee tal 1582, la sô musiche e la so liende religjose e esistenziâl, e continue a fâ vibrâ lis cuardis e lis gjambis dai furlans.
◆ Il music, predi, altarist tal domo di Udin e daspò mestri di capele inte Basiliche di Acuilee, acusât dal tribunâl de incuisizion tal 1563 di necromanzie e di pratichis ocultis, al torne a cjase e chest viaç cuntun spetacul dal titul “Giorgio Mainerio, un misteri furlan”. Musiche antighe e eletroniche miscliçadis insiemi, recitazion in plui lenghis, coreutiche, videoinstalazions, un grant spetacul ideât e direzût dal musicolic Marco Maria Tosolini, cu la colaborazion inte dramaturgjie di Paolo Antonio Simioni, che al interprete Mainero. Une produzion che e conferme lis sinergjiis tra Mittelfest e ARLeF, la Agjenzie Regjonâl pe Lenghe Furlane, cun altris tantis realtâts che a colaborin par cheste imprese, tant che il Teatri Stabil Furlan, La Fondazion Liriche Verdi e il Conservatori di Triest, Musicologi, il Comun di Udin, i Cjastinârs e la Compagnie Teatrâl di Ruvigne, il grup storic Citât di Palme e cul patrocini dal Comun di Ruvigne. L’apontament al è par domenie ai 13 di Setembar tal teatri Ristori di Cividât (mittelfest.org), par rivivi, cun ricostruzions storichis e senis di avanvuardie, la storie di Mainerio, un om di largje culture che al à dât cetant ae musiche e in particolâr cul “Primo libro de’ balli”, editât a Vignesie intal 1578. Une prime antologjie di bai europeans che e conte vincjeun composizions scritis par podê jessi sunadis cun cualsisedi strument. Tra chestis, lis famosis “La puta nera”, “Ballo furlano”, “L’arboscello”, “Schiarazola Marazola”, interpretade ancje in chescj timps di cetancj musiciscj di ogni gjenar. Un autôr che al à lassât ancje bielis pagjinis di musiche sacre, tant che i dîs “Magnificat” metûts dongje tal titul “Sacra cantica Beatissimae M Virg omnitonum sex vocum parium canenda”, e il motet “O sacrum convivium”. La storie e viôt , in plui di Simioni intal rûl di Mainerio, Massimiliano Sassi in chel di Fra Felice da Montefalco, Gianna Barbacetto inte Puta Nera, Nauli Pauli tal Benandant Orso Zanutto, Martina Buttazzoni inte Agane e Paola Bacchetti intune fantasime, e la partecipazion straordenarie di Gabriele De Cecco tal rûl dal frut sparît. Musichis antighis di Fabio Accurso e eletroacustichis di Angelo Comisso.
◆ Al dîs l’ideadôr Marco Maria Tosolini: «Il spetacul – che al puartarà cun se ancje elements dal contest plurilinguistic e pluriculturâl dal nestri teritori – si manifestarà intune sorte di opare videoteatrâl realizade in plui localitâts furlanis, che dome sul finî e cjaparà “cuarp” sul palc. L’audio in esafonie al judarà a creâ efiets sensoriâi une vore particolârs. Il public al sarà part ative de pièce, ma, stant che si trate di un Misteri, no si puedin disvelâ daurman dutis lis sorpresis». ❚