Si torne a semenâ i plets e a lâ a passon

Semencis, ledan e vacjis no fasin plui stomi. Voltâ e lâ a fâ i plets, plantâ arbui, rezi e molzi par dopo fâ il formadi, no son plui lavôrs pe biade int. Finalmentri, la tiere in mont e sta tornant a jessi tignude in considerazion, soredut dai zovins che, finide scuele, a tachin a specializâsi, a dâ une man aes aziendis di famee: in cualchi câs, a son lôr diretementri che a vierzin un gnove imprese. Badait ben, nol è di iludisi che tic e tac si puedi tornâ a inviâ la economie di un teritori, stant che dal 1990 a vuê sedi in Cjargne che te Val Cjanâl e Cjanâl dal Fier si son pierdudis plui dal 80% des aziendis agriculis: di plui di cuatri mil, o sin rivâts a mancul di cinccent. Tai ultin agns però, cemût che al tocje tal rest de Italie, la inversion di tindince pai plui atents osservadôrs, si note: i agricultôrs sot i 30 agns a son cressûts dal 4%; i etars che si son tornâts a coltivâ a stan dopleantsi di an in an, cussì come lis vacjis di lat; plantis che a someavin dismenteadis, si stan tornant a semenâ; si àn simpri di plui prodots di altissime cualitât che a rivin a cjatâ il gradiment dal consumadôr.
Il merit al va dal sigûr a chei che in chescj agns a àn dimostrât previdence e a àn savût lâ cuintri tindince, come l’Ufici agriculture de Comunitât di Mont de Cjargne, che dal 2011 al à fat partî, insiemi cul Ersa, un progjet di svilup des pomis e des jerbis che al è rivât a coinvolzi une ventine di aziendis dal teritori. Chestis, a stan coltivant 30 etars complessîfs tra miluçârs, cartufulis, fasûi, verze ma ancje frambolârs e cerniculis. La volontât e je chê di dopleâju tai prossims doi agns e zontâ gnovis culturis, ma ancje rivâ a vierzi un centri pe racuelte e la trasformazion alimentâr di chescj prodots. La struture e je in pîts a Tumieç za di un pâr di agns ma e spiete di jessi completade e furnide di celis frigorifar. Po dopo, si pense di coinvolzi scuelis e mensis aziendâls ma ancje cjadenis locâls di alimentârs par podê vendi in maniere direte chel che si à produsût.
Intant, insiemi cui tecnics dal Ersa e cul Cirmont, si sta pontant ancje a riscuvierzi prodots de tiere che a someavin dismenteâts, e cussì si à tornât a semenâ il lidric cul poc, il cren, il râf di Verzegnis, il lidric di mont, i urtiçons. Ducj prodots che a puedin vê tal marcjât un grum di interès e spontâ presis un grum alts.
No dome cjamps però, o disevin, parcè che e sta tornant a jessi cjapade in man ancje une altre ativitât storiche primarie de mont, vâl a dî la zootecnie. Pensait che dome intun piçul comun come Denemonç si rezin 400 bestiis, tra chês di macel e chês di lat.
Un grum miorade e cualificade ancje la ativitât des piçulis produzions, des scuetis ai formadis di malghe, fin a rivâ a gnovis sperimentazions come la “burrata cjargnele” de Val Pesarine, simpri par merit dai zovins che si stan butant te agriculture e tal arlevament.
Determinant in chest percors di riscuvierte dal setôr primari, e je naturalmentri ancje la scuele: a Tumieç e je stade positive la ativazion dal cors pes lavorazions agroalimentârs li dal Isis Solari che ben al va dacuardi cu la scuele alberghiere dal Linussio, dulà che a stan cressint i cogos dal doman.
No stin a dismenteâsi che però a son un pâr di problemis di risolvi se si vûl permeti aes gnovis gjenerazions di continuâ a invistî su la lôr tiere: prin di dut al è vignût il moment di definî une volte par dutis il riordin fondiari de mont, che al sconte ancjemò confins segnâts come cusiduris di bregons e duncje apeçaments masse ridots e framentâts par permeti coltivazions di une cierte cuantitât. Altre cuistion e je chê des malghis che a vegnin fitadis a forescj che magari no àn nuie a ce fâ cu la ativitât tipiche di chestis vals.
Po dopo, al sarès il câs di completâ il percors di agregazion des varis produzions locâls, un tic come che si veve tentât cu lis latariis di Friulmont, in maniere di lâ a vendi cu la fuarce di un scuadron ce che la mont e sa produsi individualmentri. L’impuartant al à soredut no lassâsi scjampâ i fonts comunitaris che a vignaran assegnâts tra pôc cul PSR 2014-2020. ❚
David Zanirato