L’architet di Pradaman, che al vîf di 17 agns insiemi cun “mister Parkinson”,
al à cjatât intal cori in biciclete la sô cure
par stâ miôr e pal so ecuilibri
Par introdusi la figure di Simone Masotti, la sô personalitât, il so inzen, la sô voie di vivi, il stes architet di Pradaman, che di 17 agns incà al è obleât a vivi cul mâl di Parkinson, al cite lis peraulis di Nelson Mandela, il storic cjâf di popul dai neris dal Sud Afriche: “Il Sport al à la fuarce di cambiâ il mont, di stiçâ emozions, di tornâ a dâ dongje lis personis lontanis come pocjis altris robis. Al rive a dismovi la sperance indulà che prime e jere dome disperazion”.
◆ Simone al è un passionâl: une persone che no si è rindude ae malatie e che, invezit di sierâsi di bessôl, al à cjatade la ispirazion e la fuarce par dâi cuintri a chel che lui al clame “Mister Parkinson”. E, par rivâ a fâ dut, al à sielzût un mût une vore particolâr: cori in biciclete. Une ativitât che, pedalade dopo pedalade, al à capît che i fâs une vore ben sedi ae salût, sedi al spirt, sedi a dut ce che al è ator di lui.
◆ “Par gno cont – al dîs Simone – chestis peraulis di Nelson Mandela a metin adun dutis lis personis intal sport. Jo o ai la passion pe biciclete di cuant che o jeri frut. O vevi trê agns che o ai tacât a pedalâ. Forsit, mi soi svicinât al ciclisim par vie che no mi plaseve il balon, come ducj chei altris. La biciclete e jere une amie cidine e dut câs buine di dâmi simpri emozions. Vêr no fossial, 17 agns indaûr i miedis mi àn diagnosticade la malatie dal Parkinson e o scuen ricognossi che no le ai cjapade masse ben”.
__
Cemût âstu passât i prins timps, dopo vê savût de malatie?
“O ai tacât subit a cirî informazions pardut. Tu pensis simpri a cualchidun che, cuant che al devente vieli, al treme. O ai let inte Enciclopedie une frase che e diseve: “Cul passâ dal timp, la situazion e va in piês e si reste dûrs e fers dal dut”. A sintî che o vevi chê malatie e a lei chês peraulis, al è mancjât pôc che o les fûr cu la cassele. In chel moment, o ai cjapade la biciclete, i ai dade fidance, cun dutis lis esitancis che mi vignivin intal cjâf. Inte mê profession di architet, no rivavi a dissegnâ, o jeri dûr, no sintivi odôrs, savôrs, o jeri apatic e o fasevi fature a scrivi: o jeri dongje a lâ in depression”.
__
Continus dal jutori che ti à dât la biciclete.
“Mi soi inacuarzût che, cul lâ in biciclete, o rivavi a cjoli mancul medisinis e, in gjenerâl, o stavi miôr. Massime, o jeri mancul rigjit, mi sintivi plui content e a lavin miôr ancje lis funzions cognitivis. Un studi al à dimostrât che tignî une ande sostignude di pedaladis, par almancul cinc o sîs setemanis, al da cetant benefici a un che al è malât di Parkinson. O savìn ducj che une malatie si cure cu lis medisinis, cu la chirurgjie e cul lavôr dai miedis. Dut câs, jo o ai vût une vore di zovament dal cori in biciclete e dal mangjâ san e controlât”.
__
Di ce gjenar di zovaments fevelistu?
“In gjenerâl, o rivi a stâ intal mieç de int cence fastidis, o rivi a fâ tantis robis, o stoi miôr e o pues ancje lavorâ. In struc, e je une vite plui normâl. E, dut câs, e garantis un sparagn, sedi economic, sedi sociâl”.
__
Si che duncje, dut ben?
“Biacemai! Siet agns indaûr o ai scugnût tacâ a cjoli medisinis che mi inderedavin di cori in biciclete. Di vueli, mi soi metût sot par un intervent di instalazion di un aparât eletric par stimolâ il cûr a funzionâ miôr. Passât un an, o ai tacât a stâ simpri miôr, o ai capît la ande dal aparât e, cun chel, a son tornâts fûr i siums di lâ a torzeon in biciclete. Su internet, o ai cirût informazions su percors, aventuris di fâ in biciclete in dut il mont e, un pôc par volte, o ai metût in vore dut”.
__
Dut di bessôl?
“In tancj filmâts che o viodevi su YouTube, il protagonist al jere simpri Sergio Borroni, un che al è usât a cori in biciclete par passion e par mistîr. Une sere mi soi fat anim e i ai scrit a Sergio, par domandâi sugjeriments e conseis: indulà lâ, stradis, struturis. Lui mi à rispuindût in curt e mi à domandât: “âstu voie di vê informazions o che jo o vegni cun te?”. Sergio al à zirât plui di novante paîs in dut il mont, no podevi disi di no. Tal principi, nol cognosseve i miei problemis e mi à dite di lâ fintremai in Alaske. Cuant che i ai dit che fin là jù no rivavi, mi à dit di decidi jo. O sin partîts par fâ un zîr ator pes isulis de Cravuazie. Tu sâs che la aventure e fâs part dal viaç e, propit intal lûc plui lontan di cjase, il gno stimoladôr eletric si è fermât. Cuant che al è sucedût, no vevi voie di spaurî i miei compagns di aventure: se l’imprest eletric nol va, o soi tant che un vegjetâl, ma no mi soi rindût. O ai scugnût tornâ a cjase in machine, cu la promesse di tornâ prime pussibil”.
__
Par solit, se une persone e pense di fâ un zîr in biciclete, partint di Udin e rive a Pagnà, in Culine, dal câs a Glemone o al massim su lis monts in Friûl o viers de Basse e dal mâr. Tu tu fasis 700 chilometris: parcè?
“Jo no pensi ai 700 chilometris. O soi concentrât sui obietîfs, ven a stâi che, cuant che o ai voie di lâ a viodi alc o di cognossi un puest, o fâs il calcul dai miei 70, massime 100 chilometris di autonomie ogni dì e o partìs”.
__
Un fatarel particolâr che tu ti impensis ancjemò?
“Intal viaç in Cravuazie, cun nô al jere ancje Pino, malât di Alzheimer. Intal cori, i spiegavin di cambiâ i rapuarts de biciclete e lui al rispuindeve simpri “Cemût si fasial?”, ancje se i vevin za dit cemût fâ dome un minût prime. E, intal mieç dal viaç, si sveave vie pe gnot par domandânus indulà che o jerin, parcè che si jere dismenteât. Cun Pino no si pues fevelâ al passât, ma dome al presint: une robe che mi è restade dentri”.
__
Lavoristu simpri, ancje tant che architet?
“Si, o soi simpri a vore. Jenfri une baruchele e chê altre in biciclete”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::
Cori par vivi: un model di ispirazion
Acetâ la malatie e mateâ par puartâ dut câs insom une idee
Il pinsîr di Simone Masotti al è une vore clâr. “Dispès mi domandi se al è just vivi simpri dì par dì e cemût cjalâ bande l’avignî. Se o pues vê sperance di gnovis terapiis. Jo o cîr dome di vê simpri cure di Simone. L’impuartant al è acetâ il fat che la malatie e esist e che no ai di cjalâ ce che o varai plui indenant, ma ce che o pues fâ cumò. Al è il sisteme miôr par cjapâmi la mê libertât. Il gno contâ lis aventuris in biciclete ator par il mont nol è di intindi tant che esibizion di alc di eroic: a son condivisions di une esperience di ce che o pues fâ dopo di 17 agns di convivence cun “Mister Parkinson”. Cu la mê ativitât o cîr di sburtâ indenant lis personis che a patissin la malatie, e no dome: o ai voie di pocâ ancje chei che no àn nissun probleme di salût e che, dut câs, no son contents e si sintin inadeguâts. Si scuen crodi aes passions, parcè che i pinsîrs positîfs a son chei che ti fasin stâ miôr. Jo o vîf par meti adun i miei siums.” ❚
::::::::::::::::::::::::::::::::::::::::::::::::::::::::::::::::::::::::::::::::::::::::::::
Il prossim viaç: in Americhe, ae fin dal mês di Lui
Dai 23 ai 30, il furlan al parteciparà al Ragbrai 2022, la corse a tapis plui vecje dal mont par turiscj in biciclete
Il prossim viaç di Simone al è stât bielzà presentât: ae fin dal mês di Lui al larà in Americhe par cori la corse che si clame “Ragbrai”. Il non al è un acronim des peraulis “Register’s Annual Great Bicycle Ride Across Iowa”, ven a stâi il zîr anuâl dal Stât dal Iowa cun ducj i cicliscj regjistrâts.
◆”Plui che un viaç, e je une matetât – al conte Simone –. O voi in Americhe cun Sergio Borroni e Lorenzo Molinari. Daspò doi agns che o spietìn, o vin la oportunitât di lâ vie”.
◆ La prime edizion dal Ragbrai e je stade intal 1973, metude adun dal ciclist John Karras. Si corin plui di 700 chilometris, intal mieç de Americhe, in siet zornadis.
◆ “Mi vegnin iniment lis peraulis di Alex Zanardi – al va indenant ancjemò Simone –. Lui al disarès che al è smaniôs pe esperience e, dut câs, ancje un pôc nostalgjic, parcè che il viaç, che al tacarà in curt, al finirà svelt. O sin bielzà dongje de rese di cont, a ogni mût il biel al è stât vivi ogni zornade cul pinsîr di meti adun la aventure e il viaç. Nol è dome par lâ in Americhe, tant par fâ alc. Ogni an, e partecipe la Associazion di Davis Phinney, un ciclist che al à vinçût tapis al Tour de France e che cumò al scombat cuintri dal Parkinson: la idee di cori cu la malatie e je sô. Il percors al è avonde in plan. Forsit, la part plui dure e sarà dopo de corse, cuant che la mê femine e gno fi a vignaran in Californie a cjatâmi, par lâ a fâ un zîr des bandis di San Francisco”. ❚
