«La autonomie e je fuarce di guvier e no di proteste: e jude a aministrâ miôr»

La nestre serie di intervistis a sindics che fasin part de ACLiF- Assemblee de Comunitât Linguistiche Furlane e sbarcje, cun grant plasê, te “Contee di Gurize” a Caprive, un Comun piçul ma siôr di storie e une vore ferbint di ativitâts, come che nus conte il sindic Daniele Sergon.
__
Sindic, voaltris tant che Comun, cuant sêso jentrâts te ACLiF, e parcè?
La ACLiF e je nassude par vie de riforme dai Ents Locâi che e à disfat lis provinciis. Jo no soi mai stât dacuardi cun cheste riforme; però, invezit di meti i bastons fra lis ruedis, o ai viodût subit la ACLiF tant che l’unic organisim restât che al podeve puartâ indevant une cierte idee di Friûl, e duncje o sin dentri dal sô inizi, tal 2016. Cumò, di cuant che il sindic Bernardis al è stât elet Conseîr regjonâl molant la cjame, o soi ancje tal Consei diretîf.
__
Cuâl isal stât il percors fin cumò e cuâi sono par lui i compits che e varès di davuelzi pal futûr?
Al è stât un percors complicât e dificil. Mi fâs plasê marcâ il grant rûl che al à vût l’ex president Diego Navarria, che cun lui o vin fat un grant lavôr di chei che no si viodin, ma che a son tant impuartants. O olsarès dî “a la furlane”. Chest par rivâ a cumò cul gnûf president Maurmair, che o stin cirint di dâi struture ae Associazion. La vite dai sindics di vuê e je za plene di impegns, duncje par mandâ indevant une associazion fate di lôr o vin bisugne di struture in plui.
Une bataie che o volìn puartâ fin insom e je chê par une Rai cun plui lenghe furlane, cumò che si sta discutint il gnûf contrat di servizi.
O vin di fâ jentrâ di plui il furlan te vite di ogni dì tant che une lenghe normâl di comunicazion, che no resti dome familiâr o folcloristiche.
__
Il so Comun al fâs part dal Friûl orientâl, ce puedial contâmi di chest teritori?
Il Friûl gurizan al è puartadôr di une vision politiche, aministrative e culturâl di grande storie e impuartance. Ai 23 di Març dal 1896 bonsignôr Faidutti al rivà a fâ fondâ la prime Casse Rurâl propit chi a Caprive. Chel al fo un grant periodi di svilup par chest teritori, che al fo interot de Grande Vuere. Chês grandis inovazions che a son stadis di esempli ancje fûr dal Friûl par me a fasin viodi ancje in dì di vuê ce pussibilitâts che al pues vê il Friûl se al rive a organizâsi e a autotutelâsi, un esempli che autonomisim al vûl dî jessi vierts.
__
Ce vuelial dî  autonomisim par lui?
Jo o soi autonomist tal sens che un sindic al à di pensâ al ben dal so teritori, di là des apartignincis ai partîts. Duncje, par esempli, fâ acuardis cui Comuns dongje ancje se no son dal stes colôr. Jessi bogns di jessi autonoms dai partîts centrâi. Une strade dispès complicade, ma jo no viôt altri mût par fâ un bon lavôr pe comunitât. O soi un autonomist ancje par chel che al tocje la (ex) provincie di Gurize: o sin part dal Friûl, di sigûr, ma cu la nestre particolaritât che e va rispietade.
__
Lui al à fevelât di “autotutele”. Par vêle, e covente ancje plui autocussience. Isal par chest che la ACLiF e à promovût incuintris su storie e culture dal Friûl?
Sigûr cognossi la nestre storie nus judarès par chel procès che o disevi. Chei incuintris a son tacâts par informâ su robis aministrativis, ma a planc a planc o vin viodût che la domande e jere chê di savê di plui su la nestre storie e culture, e duncje ju vin indreçâts, cun plasê, viers di chê direzion. Par me al è stât un segnâl impuartant.
__
Jo mi visi dal sît de provincie, che al jere impostât in trê lenghis, talian, furlan e sloven. Par me un model par dute la Regjon…
Mi visi di chel, e i puartarai ancje l’esempli dal Patto Collio Isonzo, che al met dongje dîs Comuns e li che a son presintis dutis lis lenghis di chest teritori, e li che dutis a àn la lôr vôs dentri dal Pat. Al è un patrimoni che no vin mai pierdût, ma si sta pôc a sminuîlu e duncje al va simpri rispietât tant che al merete. Simpri in chest sens, la designazion di Gurize e Nova Goriza a Capitâl Europeane de Culture pal 2025 le viôt come un segnâl impuartant pal nestri teritori e che o vin di sfrutâ ad implen fasint viodi ce che o vin.
__
I fâs une domande che e à a ce fâ cu lâ sô profession di project manager in cjamp informatic. A ce pont ise la digjitalizazion de Regjon, e no saressial alc di proponi in chest cjamp par spindi i bêçs dal Recovery Fund?
Prime di fevelâ di chel, jo o volarès fevelâ di un procès di fonde li che il Friûl al podarès jessi di esempli. Fâ spindi chei bêçs ai sindics, i unics che a podaressin superâ dute la trafile burocratiche che si à tal Stât talian: ancje no fasint di pueste, aromai la situazion e je ingredeade par struture. Va ben la ideazion centrâl, ma la realizazion e à di lâ ai ents teritoriâi reâi, che a àn rapuarts cul teritori. Cuant che la autonomie e je fuarce di guvier e no dome di proteste e je une vore eficace te aministrazion.
Pe digjitalizazion jo o pensi che si fevele tant di citât, ma invezit o procurarès di curâle di plui tes realtâts piçulis, periferichis o di campagne. Chest al crearès un nivel medi di digjitalizazion dal Stât cuntun potenziâl fuart par un teritori tant che chel talian, fis di particolaritâts che si puedin spindi dopo a nivel turistic, di alimentazion bio e di cualitât.
__
Par finî, mi disial dôs robis dal sô Comun particolarmentri furlanis?
Nô o sin un Comun cun 1.700 abitants, ma che al pensi che dentri a son 25 associazions ativis, un tiessût sociâl di no crodi! Mi plâs però dî di dôs realtâts: une e je chê dai grups folcloristics – o ’nt vin adiriture doi, un dedicât ai plui zovins –, e chê altre e je chê dai côrs, che o ’nt vin cinc!
__
Chê dai côrs e je une ecelence dal Friûl che e ven trascurade masse de culture “alte” de regjon, no pensial?
Sigûr! O soi dacuardi ad implen: mi visi che vie par une trasfierte a Treffen, in Carinzie, a son restâts maraveâts de nestre realtât tant siore e le cjalavin cun grande invidie.
Ultime robe, no fevelarai di chê grande ecelence che a son Vile Russiz e il Cjistiel di Spesse, ma o ai gust di finî la interviste invidant i letôrs a provâ a informâsi: no son dome ecelencis in cjamp enologjic e imprenditoriâl, ma storie dal Friûl. Mandi! ❚
Dree Venier