«Mi ispiri al Parlament dal Friûl storic»

Interviste a Markus Maurmair che dal an passât al è il gnûf president de Assemblee de Comunitât Linguistiche Furlane
La Assemblee de Comunitât Linguistiche Furlane cualchidun le viôt tant che l’embrion di une sorte di autoguvier dai furlans, altris tant che un cuintripês a Triest intune regjon là che i vecjos ecuilibris fra i teritoris a son saltâts, par tancj e à di esercitâ dome une tutele culturâl e storiche de comunitât furlane. Sul tacâ di un gnûf an di lavôr, o vin sintût il so president Markus Maurmair, nomenât l’an passât, par fâ un belanç dai prins mês dal so impegn.
_
President, daûr de esperience di cualchi mês di lavôr, puedial dîmi par lui ce che je la ACLiF e ce rûl che e varès di zuiâ?
Cumò o sin un “organisim juridic” che al vûl dî dut e nuie, cence funzions pardabon vincolantis e par cierts passaçs o sin sometûts al judizi di funzionaris regjonâi. O volarès che si definìs miôr la sô personalitât juridiche, danti funzions plui concretis. Par me e à di racuei la ereditât di chel che al è stât il Parlament dal Friûl e jessi il pont di confront vêr fra lis personis. Viodût che e je componude di sindics, al à un rapuart diret cul teritori reâl.
_
Sindics che, tignint cont dai 173 comuns furlanofons, no àn aderît ducj. Cualchidun al stime che il procès di adesion al sedi machinôs…
Jo no lu cjati machinôs. I comuns a àn di deliberâ la adesion midiant di une votazion, che tra l’altri  par solit e je aprovade in maniere unanime di dut il consei comunâl, di maiorance e oposizion. Chest al da une grande legjitimazion a cheste Assemblee.
_
Cuant che al è stât nomenât, intal Lui dal 2020, lis adesions dai comuns a jerin 119. Cemût ise la conte a vuê?
Vuê o sin za a 129 comuns aderents. Aromai la vicende des Uti e je in pratiche rivade insom e, colade cheste prejudiziâl, lis adesions a son plui facilis. O viôt une buine predisposizion ancje di bande dai comuns furlanofons restâts ancjemò fûr: dentri dal 2021 o stimi che o podarìn rivâ a 140.
_
In cuâi teritoris des trê ex provinciis i parial che a sedin plui entusiascj di aderî?
Plui che par apartignince gjeografiche, o viôt che a àn plui entusiasim i comuns plui piçui o plui rurâi, chei plui grancj forsit mancul. Di notâ che e je une fasse di “entusiascj” dilunc dal Tiliment. Ma o ai di dî che jo o viôt une grande voie di apartignince, di definîsi furlans, in ducj.
_
L’an passât o vês inviât un cors pe formazion dai aministradôrs su storie e culture dal Friûl. Cemût isal lât?
Al è stât un esperiment cun pôcs incuintris, e duncje cuntune partecipazion relative, ma o ai sintût tant interès in cui che al à partecipât. Lu calcoli tant che un incoragjament e o larìn indevant cun ancjemò plui convinzion, vierzint ancje ae societât civîl. O ai viodût fam di cognossince de nestre storie.
_
Par lui, ogni comun varessial di adotâ il Plan speciâl di politiche linguistiche (PSPL)?
Dal sigûr. O informarìn i comuns che ancjemò no vedin clâr di ce che si trate, e ju esortarìn a adotâlu.
_
Cualis altris iniziativis vêso in program?
O vevin in progjet un sussidiari bilengâl pe scuele che si è fermât par vie che e je someade une soreposizion di rûi cu la ARLeF. Chest al fâs part di chei “controi” che la Assemblee e je sometude de Regjon, che o fevelavi prime. O volìn patrocinâ concors par valorizâ la furlanetât, plui in gjenerâl jo o volarès sburtâ par che la assemblee e vedi un rûl economic e sociâl plui grant, ancje in relazion a timps che si prefigurin dûrs pai furlans.
_
Su la presince dal furlan in Rai, invezit?
O vin in program une cunvigne sul argoment, dulà che al sarà sclarît ancje ce che a fasin in chês altris regjons e a ce nivel reâl di presince che a son altris lenghis minoritariis in Rai. Jo dopo o ai une convinzion: a van ben i cartons animâts o altris trasmissions culturâls, ma jo o vuei vê la informazion in lenghe furlane, che o calcoli che e sedi ce che i interesse a la int. Propueste concrete: rivâ a fâ in maniere che a ogni edizion dal notiziari regjonâl al sedi almancul un servizi par furlan. E in paralêl, o vuei iviâ la cuistion cun sogjets privâts.
_
Cuale ise la sô posizion su cuistions simbolichis tant che cartei stradâi, là che il bilinguisim al è dispès violât, e cjarte di identitât bilengâl?
Sui cartei e je la Arlef che e vuardie la situazion, mandant segnalazions cuant che a coventin. Nô o podìn vê – e o esercitarìn – une funzion di stimul tant che su tantis altris robis. Dal sigûr o soi favorevul che i comuns a puedin furnî la cjarte di identitât bilengâl, come pûr tancj altris servizis: o pensi a ducj i centralins cui messaçs preregjistrâts che a varessin di jessi ancje par furlan, se no fintremai tant che prin messaç.
_
Un altri argoment problematic al è la scuele…
O vin l’intindiment di monitorâ la situazion no dome par evitâ fats tant che chel di Tisane, dulà che si à cirût di cjapâ la scuse dal Covid par evitâ l’insegnament de lenghe furlane, ma o volìn ancje tignî di voli la cualitât de ufierte. Se l’insegnament dal furlan al è une opzion pes fameis, lis istituzions scolastichis a àn di garantî chest insegnament, e insegnament vêr nol à di jessi imparâ a memorie cualchi filastrocje, ma une vere alfabetizazion in furlan. ❚
Dree Venier