Siums: cuant che il teatri nol dîs nuie e invezit in Europe…

Siums al è un spetacul inutil e costôs produsût de Farie Teatrâl Furlane. Ma daûr dal faliment de ativitât de Farie si plate une cuistion plui serie che e rivuarde dute la societât. Di par se la idee di meti in pîts la Farie no je sbaliade, parcè che a son stâts tirâts dentri i plui impuartants sogjets culturâi dal Friûl teatrâl, vâl a dî il Teatron, il CSS e la Nico Pepe. Chel che nol à funzionât e je stade la gjestion, la sielte dai spetacui, il sierâsi intun cercli polvarôs di robis za masanadis (cirint erois e rivocs di condivision), l’intignîsi a cjalâ par daûr, viers de cuiete e confuartante culture furlane che fin cà nus veve puartât. Ma la crise de Farie e je la crise di une interie societât furlane. Vâl a dî che se la societât no à un progjet par se stesse, no podarà trasmeti il so discors a cualsissei ambient culturâl che al puedi fâ di spieli, di strument di elaborazion, di rispueste e di sburte. Dulà si aie di sburtâ se nissun al domande alc? Alore ve ca il dubi, esistie une societât furlane cui siei valôrs o esistie dome une societât taliane dulà che cetancj di lôr a fevelin par furlan?
Se une societât e vîf la sô nature tal passât cence che si produsi un mecanisim di identificazion e azion tal presint, chê societât no à plui nuie ce dî. Se Siums al propon une altre volte la rileture poetiche dai miracui di Trave, dai benandants di Ginzburg e dal armamentari contadin furlan, cence lassâsi nancje sfiliâ di une analise sociologjiche, alore al vûl dî che il spieli al è voltât par ledrôs: i furlans a vivin in dì di vuê, cence nancje un fastidi, il lôr discors integrât e disdopleât te societât taliane, e il lôr inmagjinari al è di une altre bande. Cheste e je la dissezion di une cualsisei societât.
La Farie e à falît parcè che no à rivât a condividi e integrâ i aspiets plui inovatîfs dal pinsîr di une societât in conflit cun se stesse e si è indurmidide intun sium. Ma tra Pieri di Brazzaville e Siums o vin viodût che il re al è crot (e ancje la sô siore, e varès dit mê none), vueit di contignûts, di inovazion, di pinsîrs, di conflits. Puar di confronts. E a rinfuarç di ce che o dîs, mi ven sù la bielissime stagjon di chest an dal Teatri Contat. Cjan da l’ue! E il furlan? Simpri a reventâ salate tal ort? O vin vût une Farie sierade su se stesse a coltivâ une idee inmagjinarie di un furlanisim mitic e fûr de societât in dì di vuê. Dome il confront su cemût altris realtâts a puartin indenant il discors dal rapuart cuntune societât di riferiment e pues judânus.
O soi lât in Gales trê voltis tal ultin an, un paîs che dai agns 80 in cà al à fat un grant lavôr di riscat de lenghe e dai valôrs di une societât identitarie. A àn fondât il teatri nazionâl, il Sherman Cymru (no ûs dîs nancje la pronuncie…) che al fâs produzions in lenghe galese e al ospite spetacui par inglês intun confront continui. In cartelon, di Zenâr a Jugn, a son cinc spetacui in galês (plui un pai fruts). Alore, viodìn: Cynnau Tân al esplore il malcuiet viaç des sperancis di un fantat fin ae realtât di un om di mieze etât; Dyled Eileen al fevele de proteste di une famee tal 1958 che no voleve paiâ lis tassis ai inglês parcè che la cartele no jere scrite in galês; Llwch O’r Pileri al conte dal rapuart fra amicizie e tradiment intune societât ucroniche dominade dai naziscj; Myfanwy Yn Y Moorlands al mostre l’incuintri di une femine e un fantat fra sium e inlusion e, in ultin, Traed Bach Concrit al resone, denant de distruzion di Cardiff, se al è miôr ricostruî o lâ indenant cjalant l’avignî. Coventie che jo o zonti alc?
Cemût sono rivâts in Gales a fevelâ de contemporaneitât? Parcè che là vie e esist une societât identitarie. E i tescj, cui ju aie scrits? Zovins scritôrs saltâts fûr dai progjets dal Sherman Cymru, come Lucid (comunitât di produtôrs indipendents che, intun lavôr di mentoring, si confrontin, a cjatin oportunitâts, dialic e riflessions,); o l’Advanced Writers Course (dîs scritôrs prometents selezionâts che par sîs mês a partecipin a sessions di teatri, visitis a companiis, e a scrivin tescj che a deventaran il patrimoni in galês pal Sherman).
Ancjemò: o soi stât a Avignon, dulà che si fâs un dai plui grancj festival di companiis indipendentis dal mont, cun plui di 900 spetacui in trê setemanis, ma soredut un moment di creativitât indescrivibil, che dome cui che al è stât al rive a capîlu. Parcè no tachìno a meti i bês in robis come chistis: a) Semençâl di scritôrs prometents che a scrivin tescj che a deventaran il patrimoni leterari de Farie; b) Confront permanent cul mont de culture in laboratoris, world cafè, worshop; c) Colegament dal bas e no verticistic e ricatatori cu lis piçulis companiis; d) Progjet di scambis cu la Catalogne, l’Euskadi o il Gales; e) Piçul festival internazionâl di teatri in lenghis identitariis fra companiis indipendentis (dôs, trê tant par scomençâ); f) Oops, mi dismenteavi… Us interessavie la recension di Siums? Lait a leile su www.francomarchetta.net/lassassinio-del-teatro-friulano/.
Franco Marchetta