SIUMS DI STORIE. Chê bolp di Rommel

La rubriche storiche e continue ma cuntune variazion: cemût saressie stade la storie dal Friûl se no fos lade come che invezit e je lade te realtât? Noaltris o provìn a rispuindi cussì…
***
Cemût che e je lade
Il non di Cjaurêt al è peât ae grande disfate dal esercit talian inte Prime vuere. I Mucs, cetant plui organizâts, cuntune strategjie di combatiment une vore moderne e dinamiche, a rivarin tal Otubar dal 1917 a sfonderâ lis liniis di difese dai Regnicui e cence nissune bariere si sburtarin fin al flum Plâf, ocupant une buine part dal Friûl e dal Venit. Ma pôcs a san che propite inte prime zornade di combatiment, decisive e fo la azion di un zovin tenent todesc, Erwin Rommel, chel che al sarès deventât inte Seconde vuere mondial l’eroi dal desert, la bolp, come che lu clamarin i inglês dal gjenerâl Montgomery. Un strateghe militâr gjeniâl ma ancje un om di valôr, preseât dai siei soldâts, stimât ancje dai nemîs, coinvolzût tal 1944 tal plui grant atentât organizât cuintri Hitler e duncje “obleât” a suicidâsi par salvâ la sô famee di un svindic inevitabil e crudêl dal Führer. Ai 24 di Otubar dal 1917, jenfri Cjaurêt e Tulmin, Rommel al comandave un repart dal bataion di mont dal Württemberg. Insiemi cun cinccent soldâts, al rivà cidin cidin a fâ presonîrs centenârs di talians, chei de brigade Arno, concuistant la piche de mont Nagnoj: une posizion impuartantone par dominâ i moviments dai nemîs. Di là sù al tacà a bombardâ l’esercit talian, procurant un dam ireparabil. Po dopo, al cercenà il Mataiûr, garantint il sucès de imprese. Ae fin, dome sîs soldâts todescs a restarin muarts sul cjamp di bataie: de bande taliane invezit lis pierditis a forin di 9.150 oms. Ai 3 di Novembar, Rommel al jere bielzà a Curnin di Forgjarie, dopo vê passât il Tiliment, cu la intenzion di pontâ viers Midune, Claut, e di là a Longaron, fin su la Plâf.
***
Cemût che e podeve lâ
“Par me e je stade la bolp. Ancjemò une che mi fâs e tu viodarâs cemût che e larà a finîle!”. No jere la prime volte che Catine e cjatave vueit il gjalinâr de sô cjasute di clap propite in muse al Tiliment. “A fasin la tane sot de roste. E vie pe gnot ti fischin dut ce che al à la plume, besteatis. Ma la prossime volte al sarà di ridi. Come che si dîs, cent al jeur e une al cjaçadôr”. E Bepo, tant che cjaçadôr, no lu superave pardabon propit nissun, di Curnin a Flavuigne. Sclope in spale, al lave fin insom al Cjanêt, prime che il soreli al cucàs. Si sa che, in timp di vuere, puartâ a cjase un cjavrûl o un cenglâr, di scuindon, nol lave mâl. E ancje vendi la piel di cualchi bolpate al podeve tornâ bon. Ti copavin nuie mancul che i farcs par fâ maneçutis, pense tu duncje ce fortune rivâ a brincâ une bolp! Cui bêçs vuadagnâts, tu podevis vê une risierve di lat e di formadi di siôrs. Cuant che Catine i domandà di fâ la vuaite a di chê sassine, Bepo al jere benzà daûr a onzi la sclope. La gnot dai 3 di Novembar, il tenent Rommel al fumave il so macubin cjalant la aghe pantanose dal Tiliment. Al veve plot cetant par dute la gnot e la dì prime. I soldâts a vevin tirât sù il cjamp a mieze cueste, dongje des primis cjasis di Curnin, propite par evitâ i dams di une pussibil esondazion. Ancjemò une tirade di cjiche a plen pet e cun grande sodisfazion, pensant che pôcs dîs prime al jere ancjemò rimpinât su lis monts parsore di Cjaurêt. Al varès fate cariere. Cuissà. Magari, se al lave indenant cussì, in cualchi an al varès podût mostrâ su lis spalutis i grâts di Feldmaressial. E mentri che il zovin uficiâl todesc si insumie di glorie, ve che une poleçute di cort i sgarbete a un tîr di sclope. Cuessutis ben tarondis, plume biele lustre: sigurementri alc di miôr dal mangjâ militâr, ven a stâi mignestron di verzis e pan di galete sfracaiât tal sbrudiot. So nono, inte vecje cjase di Heidenheim, al saveve preparâ un “Haenchen vom Spiess” che po dopo tu ti scugnivis lecâ i dêts. E plui che il tenent al cjalave la poleçute, plui che al viodeve il spêt voltolâsi su lis boris cjaldis dal fûc. Ma chê ludre, cuant che si è inacuarte des intenzions dal muc, vie che e tache a cori sù pe roste, a zigo zago come che a fasin lis gjalinis po. Nol sarà sigurementri un mût di fâ marziâl, la monture e je simpri la monture, ma la fam e je la fam. No si jere mai viodude prime la sene di un uficiâl decorât dal esercit dal Reich che, cun tant di crôs di vuere, stivalons e medaiis, si inçopedave par gafâ une gjaline furlane. Evidentementri une vore plui brave dai gjenerâi talians, stant che Rommel nol rivave a cjapâle tal sac. Cuant che Bepo al sintì dut chel tramai te boscaie, al corè a cjoli sù la sclope. “Catine, o voi a fâ finalmentri justizie dal nestri gjalinâr!”. La pipe strente jenfri i dincj, un voli sierât, distirât par tiere nancje che al fos un fant in trincee, al spietave che la poleçute, cirint di scjampâ ae bolp, e corès viers di lui. E, di fat, vele – clocjint e piulant – vignî fûr di corse di une ramace a confin dal ort. E daûr, tal fruç di plantis, sigûr la bolp.
“Catine, cjape sù dut ce che al podarès coventâ par vivi di profucs, che nus tocje lâ vie, e di corse. No varès mai crodût che difindi une poleçute al varès puartade tante disgracie su la nestre cjase. Se mi cjapin i mucs mi fusilin a colp, a brusin dut e sepi Diu ce che ti fasaran”. Catine lu cjalà cun doi voi stranîts: “O Signôr! Ma dome par une bolp?”. ❚
Angelo Floramo