In chê dì che Gjisulf al colà de mont
***
Cemût che e je lade
E jere le domenie di Pasche dal an 568 cuant che Alboin, re dai Langobarts, al decidè denant dai siei vuerîrs di partî de Ongjarie insieme cu lis fameis, lis bestiis e ducj i strafaniçs che a podevin puartâ vie cun lôr: in dut 30.000 oms bogns di combati, cence contâ vecjos, feminis e fruts. Seguint lis stradis di Rome, passant par Emone, ven a stâi Lubiane, vie indevant pe valade dal Vipau prime e daspò dal Lusinç, fin cuant che al rive su la ponte plui alte dal Mataiûr, che di in chê volte e sarès stade clamade “La Mont dal Re”, tal principi dal 569. E di là, dal alt, cjalant la tiere sot dai siei voi, al proclame che chel li al sarès stât il so ream. Al clame dongje di se il nevôt Gjisulf, che al jere il so “marpahis”, ven a stâi scudîr, e i promet il titul di prin siôr dal ducât di Forum Julii, cun sede a Cividât e cul compit di difindi la avanzade Langobarde cuintri Sclâfs e Bizantins. Come che la storie nus insegne, Gjisulf al fo duncje il prin siôr di une stirpe che e varès vuidât la Patrie par plui di dusinte agns, prime di jessi concuistade dai Francs di Carli il Grant. La ete langobarde e fo cetant impuartante pal Friûl, pe sô identitât, pal disvilup di une Glesie Mari aquileiese autonome di Rome, che la Citât eterne e jere peade ae potence e al control dai Bizantins. Cence la presince di Gjisulf e dai Langobarts, la identitât e la memorie dal nestri popul e sarès stade dal dut difarente, sepi Idiu ce tant! Nol sarès stât il schisme dai trê cjapitui, la specialitât marciane e petrine e sarès stade platade di chê apostoliche pauline, i Bizantins a varessin controlât il teritori e al puest di un Patriarcje, Aquilee e varès vût, probabilmentri, un Metropolit a Grau, dongje dal rapresentant dal Esarche di Ravene. Insome, dute une altre solfe!
Cemût che e podeve lâ
E jere une buinore sclete e grivie di Zenâr, cuant che il grant re Alboin, rimpinantsi su la piche di une mont, al clamà dongje di se i siei oms plui fidâts par funzionâ il rituâl antigon di investidure, imparât dai sclâfs te plane de Panonie, là che di monts no ‘nd jere nancje par insium: la mont tant che un tron di piere, par pandi al Mont la concuiste di un teritori. Al cjalà sot, il grant re, la planure fertile e biele che inte zornade invernâl si sparniçave lontan fin te marine, stralusint sclesis di lûs. E fuart al clamà il non di Wotan, par vê la gracie de potence, chel di Freie, par che i cjamps a podessin simpri florî di arbui e di rosis, e Thor, che al tignìs lontane la tormente e la tampieste. Tal grant cidinôr, ducj i vuerîrs a berlarin invocazions che a rondolarin vie pai crets come che e fos stade la vosate di un ton. Dut al someave rispuindi ben al rituâl. Al mancjave dome Gjisulf, il nevôt fidât e scudîr fedêl, l’om destinât a cjapà su di se il control de citât di “Forum Iulii”, trasformant un teritori sogjet ai bizantins intune tiere di Farie e di Arimanie, controlade dai Langobarts. Gjisulf, obedient ae clamade dal barbe, al jere bielzà dongje di lui, ae sô diestre, cu la spade in man, i cjavei sparniçâts de buere, ingrisignît di frêt ma plen di spiete: tra un moment, al sarès stât nomenât prin Siôr Langobart di chê bielissime plane che e cucave di sot dai peçs e dai rôi. Ma si sa che Loki, il diu dal malan, se al pues al met i cuars par che lis robis a vadin mâl… E cussì, cuant che Alboin al à slargjâts i braçs berlant “Cjale dabàs, Gjisulf, fi di Grasulf gno fradi: dute chê Tiere che si slargje di chi ae marine e sarà sot il control de tô spade”, cence volê al à tucât la spadule di Gjisulf, che al è colât jù pai crets di chê mont – che di in chê volte e ven ricuardade tant che “La Piche Gjisulfe” -, sfracaiantsi tal bas e consegnant la sô anime aes Valkiriis che le puartassin fin sul Walhalla. Si sa che i Langobarts a jerin une vore superstiziôs. La disgracie e fo interpretade dai siamans tant che un avertiment di Wotan a cambiâ i plans e a cirî une gnove strade. E cussì Alboin, i siei 30.000 oms armâts, lis feminis, i vecjos, i fruts, i strafaniçs e i nemâi a cjaparin la volte dal Lusinç viers Nord, in direzion de Drau e de Save, probabilmentri par cjatâsi ancjemò une volte su la Danau e tornâ in Panonie, ingomeâts di tante sfortune, sperant che i Avars, che a jerin restâts là vie, no reclamassin. Vignût a cognossince dal fat, l’Esarcje di Ravene, par evitâ dut câs un ripensament dai Langobarts, al invià te citât di Aquilee un Basileus so rapresentant, un ciert Andronicus, cuntune flote di vuere potentone a presidiâ il puart di Grau. Par vie di chest Basileus, la Tiere che dal Lusinç e rive fin ae Livence e ven clamade ancjemò in dì di vuê Basilicade. Chestis informazions a forin scritis di un diacun che al fo fat studiâ te cort bizantine, un ciert Pauli, autôr di une “Historia Basilicanorum”, componude par ordin dal imperadôr bizantin Porifrogjenit, chel stes che par pandi une interpretazion centralistiche de storie dai Basilicants al à dât l’ordin di brusâ la uniche copie, scrite in onciâl, di un Vanzeli che al sarès stât componût adiriture di Sant Marc Evangjelist, e che al varès dimostrât la specialitât di une Glesie Basilicane, peade al so teritori e a la sô int. Ma chestis a son dome bufulis fatis zirâ di cualchi storic mâl intenzionât. Ancje in dì di vuê, in cheste Regjon si fevele une lenghe neogreghe, che miscliçade cu la tabaiade antighe di chel popul che al viveve vie par chei trois, e fasè nassi il Grecan, tutelât vuê di une leç regjonâl, ancje se al pâr che si fasi di dut par fâlu dismenteâ, nancje che e sedi la vendete di Gjisulf. Che ancje il poete talian Dante, scjampant de sô citât e esiliât fintremai ca sù, ospit dal Metropolite di Grau tal 1313, sintint a fevelâ la int di chestis bandis, al à scrit tal so famôs tratât su lis lenghis: “aquilegenses et istrianos qui crudeliter accentuando eructant “τι κάνεις εκεί?”
✒ Angelo Floramo
